Hosea 5

israaeel aur yahoodaah donon qusoorvaar hain

¹ai imaamo, suno meree baat! ai israaeel kay gharaanay, tavajjuh day! ai shaahee khaandaan, meray paighaam par ghaur kar!

tum par faisla hai, kyoonki apnee butparastee say tum nay misfaah men phanda laga diya, taboor pahaad par jaal bichha diyaa ²aur shitteem men gadha khudva liya hai. khabardaar! main tum sab ko saza doonga.

³main to israaeel ko khoob jaanta hoon, vah mujh say chhupa naheen rah sakta. israaeel ab ismatafarosh ban gaya hai, vah naapaak hai. ⁴un kee buree harkaten unhen un kay khuda kay paas vaapas aanay naheen deteen. kyoonki un kay andar zinaakaaree kee rooh hai, aur vah rabb ko naheen jaantay. ⁵israaeel ka takabbur us kay khilaaf gavaahee deta hai, aur vah apnay qusoor kay baais gir jaaega. yahoodaah bhee us kay saath gir jaaega.

⁶tab vah apnee bhed-bakriyon aur gaay-bailon ko lay kar rabb ko talaash karengay, lekin befaaida. vah usay pa naheen sakengay, kyoonki vah unhen chhod kar chala gaya hai. ⁷unhon nay rabb say bevafa ho kar naajaaiz aulaad paida kee hai. ab naya chaand unhen un kee mauroosee zameenon samet hadap kar lega.

apnee qaum par allaah ka ilzaam

⁸jibia men narsinga phoonko, raama men turam bajaao! bait-aavan men jang kay naaray buland karo. ai binyameen, dushman teray peechhay pad gaya hai! ⁹jis din main saza doonga us din israaeel veeraan-o-sunsaan ho jaaega. dhyaan do ki main nay israaeelee qabeelon kay baaray men qaabil-ay-etimaad baaten bataaee hain.

¹⁰yahoodaah kay raahanuma un jaisay ban gaay hain jo naajaaiz taur par apnee zameen kee hudood badha detay hain. javaab men main apna ghazab mooslaadhaar baarish kee tarah un par naazil karoonga. ¹¹israaeel par is liyay zulm ho raha hai aur us ka haq maara ja raha hai ki vah bemaanee buton kay peechhay bhaagnay par tula hua hai. ¹²main israaeel kay liyay peep aur yahoodaah kay liyay sadaahat ka baais banoonga.

¹³israaeel nay apnee beemaaree dekhee aur yahoodaah nay apnay naasoor par ghaur kiya. tab israaeel nay asoor kee taraf rujoo kiya aur asoor kay azeem baadshaah ko paighaam bhej kar us say madad maangee. lekin vah tumhen shifa naheen day sakta, vah tumhaaray naasoor ka ilaaj naheen kar sakta.

¹⁴kyoonki main sherbabar kee tarah israaeel par toot padoonga aur javaan sherbabar kee tarah yahoodaah par jhapat padoonga. main unhen phaad kar apnay saath ghaseet lay jaaoonga, aur koee unhen naheen bachaaega. ¹⁵phir main apnay ghar vaapas ja kar us vaqt tak un say door rahoonga jab tak vah apna qusoor tasleem karkay meray chiharay ko talaash na karen. kyoonki jab vah museebat men phans jaaengay tab hee mujhay talaash karengay.”