¹israaeel ko shifa dena chaahata hoon to israaeel ka qusoor aur saamriya kee buraaee saaf zaahir ho jaatee hai. kyoonki fareb dena un ka pesha hee ban gaya hai. chor gharon men naqab lagaatay jabki baahar galee men daakooon kay jathay logon ko loot letay hain. ²lekin vah khayaal naheen kartay ki mujhay un kee tamaam buree harkaton kee yaad rahetee hai. vah naheen samajhtay ki ab vah apnay ghalat kaamon say ghiray rahetay hain, ki yah gunaah har vaqt mujhay nazar aatay hain. ³apnee buraaee say vah baadshaah ko khush rakhtay hain, un kay jhoot say buzurg lutf’andoz hotay hain. ⁴sab kay sab zinaakaar hain. vah us taptay tanoor kee maanind hain jo itna garm hai ki naanbaaee ko usay mazeed chhednay kee zaroorat naheen. agar vah aata goondh kar us kay khameer honay tak intizaar bhee karay to bhee tanoor itna garm raheta hai ki rotee pak jaaegee. ⁵hamaaray baadshaah kay jashn par raahanuma mai pee pee kar mast ho jaatay hain, aur vah kufr baknay vaalon say haath milaata hai. ⁶yah log qareeb a kar taak men baith jaatay hain jabki un kay dil tanoor kee tarah taptay hain. pooree raat ko un ka ghussa soya raheta hai, lekin subah kay vaqt vah bedaar ho kar sholaazan aag kee tarah daheknay lagta hai. ⁷sab tanoor kee tarah taptay taptay apnay raahanumaaon ko hadap kar letay hain. un kay tamaam baadshaah gir jaatay hain, aur ek bhee mujhay naheen pukaarta.

⁸israaeel deegar aqvaam kay saath mil kar ek ho gaya hai. ab vah us rotee kee maanind hai jo tavay par sirf ek taraf say pak gaee hai, doosree taraf say kachchee hee hai. ⁹ghairmulkee us kee taaqat kha kha kar usay kamzor kar rahay hain, lekin abhee tak usay pata naheen chala. us kay baal safed ho gaay hain, lekin abhee tak usay maaloom naheen hua. ¹⁰israaeel ka takabbur us kay khilaaf gavaahee deta hai. to bhee na vah rabb apnay khuda kay paas vaapas a jaata, na usay talaash karta hai.

¹¹israaeel naasamajh kabootar kee maanind hai jisay aasaanee say varghalaaya ja sakta hai. pahelay vah misr ko madad kay liyay bulaata, phir asoor kay paas bhaag jaata hai. ¹²lekin joon hee vah kabhee idhar kabhee idhar daudengay to main un par apna jaal daaloonga, unhen udtay huay parindon kee tarah neechay utaaroonga. main un kee yoon taadeeb karoonga jis tarah un kee jamaaat ko aagaah kiya gaya hai.

¹³un par afsos, kyoonki vah mujh say bhaag gaay hain. un par tabaahee aaay, kyoonki vah mujh say sarkash ho gaay hain. main fidya day kar unhen chhudaana chaahata tha, lekin javaab men vah meray baaray men jhoot boltay hain. ¹⁴vah khuloosdilee say mujh say iltija naheen kartay. vah bistar par letay letay “haay haay” kartay aur ghalla aur angoor ko haasil karnay kay liyay apnay aap ko zakhmee kartay hain. lekin mujh say vah door rahetay hain.

¹⁵main hee nay unhen tarbiyat dee, main hee nay unhen taqviyat dee, lekin vah meray khilaaf buray mansoobay baandhtay hain. ¹⁶vah tauba karkay vaapas a jaatay hain, lekin meray paas naheen, lihaaza vah dheelee kamaan jaisay bekaar ho gaay hain. chunaanchay un kay raahanuma kufr baknay kay sabab say talvaar kee zad men a kar halaak ho jaaengay. is baat kay baais vah misr men mazaaq ka nishaana ban jaaengay.