Hosea 8

allaah kee bevafa qaum par adaalat

¹narsinga bajaao! dushman uqaab kee tarah rabb kay ghar par jhapatta maarnay ko hai. kyoonki logon nay meray ahd ko tod kar meree shareeat kee khilaafvarzee kee hai. ²beshak vah madad kay liyay cheekhtay chillaatay hain, ‘ai hamaaray khuda, ham to tujhay jaantay hain, ham to israaeel hain.’ ³lekin haqeeqat men israaeel nay vah kuchh mustarad kar diya hai jo achchha hai. chunaanchay dushman us ka taaqqub karay! ⁴unhon nay meree marzee poochhay baghair apnay baadshaah muqarrar kiay, meree manzooree kay baghair apnay raahanumaaon ko chun liya hai. apnay sonay-chaandee say apnay liyay but bana kar vah apnee tabaahee apnay sar par laaay hain.

⁵ai saamriya, main nay teray bachhday ko radd kar diya hai! mera ghazab teray baashindon par naazil honay vaala hai, kyoonki vah paak-saaf ho jaanay kay qaabil hee naheen! yah haalat kab tak jaaree rahegee? ⁶ai israaeel, jis bachhday kee pooja too karta hai usay dastakaar hee nay banaaya hai. saamriya ka bachhda khuda naheen hai balki paash paash ho jaaega.

⁷vah hava ka beej bo rahay hain aur aandhee kee fasal kaatengay. anaaj kee fasal tayyaar hai, lekin baaliyaan kaheen nazar naheen aateen. is say aata milnay ka imkaan hee naheen. aur agar thoda bahut gandum milay bhee to ghairmulkee usay hadap kar lengay.

⁸haan, tamaam israaeel ko hadap kar liya gaya hai. ab vah qaumon men aisa bartan ban gaya hai jo koee pasand naheen karta. ⁹kyoonki us kay log asoor kay paas chalay gaay hain. janglee gadha to akela raheta hai, lekin israaeel apnay aashiq ko tuhfay day kar khush rakhnay par tula raheta hai. ¹⁰lekin khwaah vah deegar qaumon men kitnay tuhfay kyoon na taqseem karen ab main unhen saza denay kay liyay jama karoonga. jald hee vah shahenshaah kay bojh talay pech-o-taab khaanay lagengay. ¹¹go israaeel nay gunaahon ko door karnay kay liyay mut’addid qurbaangaahen taameer keen, lekin vah us kay liyay gunaah ka baais ban gaee hain. ¹²khwaah main apnay ahkaam ko israaeeliyon kay liyay hazaaron dafa kyoon na qalamband karta, to bhee farq na padta, vah samajhtay ki yah ahkaam ajnabee hain, yah ham par laagoo naheen hotay. ¹³go vah mujhay qurbaaniyaan pesh karkay un ka gosht khaatay hain, lekin main, rabb in say khush naheen hota balki un kay gunaahon ko yaad karkay unhen saza doonga. tab unhen dubaara misr jaana padega. ¹⁴israaeel nay apnay khaaliq ko bhool kar baday mahel bana liyay hain, aur yahoodaah nay mut’addid shaheron ko qil’aaband bana liya hai. lekin main un kay shaheron par aag naazil karkay un kay mahelon ko bhasm kar doonga.”