Hosea 9

israaeel ka anjaam

¹ai israaeel, khushee na mana, deegar aqvaam kee tarah shaadiyaana mat baja. kyoonki too zina kartay kartay apnay khuda say door hota ja raha hai. jahaan bhee log gandum gaahatay hain vahaan too ja kar apnee ismatafaroshee kay paisay jama karta hai, yahee kuchh tujhay piyaara hai. ²is liyay aainda gandum gaahanay aur angoor ka ras nikaalnay kee jagahen unhen khuraak muhayya naheen karengee, aur angoor kee fasal unhen ras muhayya naheen karegee.

³israaeelee rabb kay mulk men naheen rahengay balki unhen misr vaapas jaana padega, unhen asoor men naapaak cheezen khaanee padengee. ⁴vahaan vah rabb ko na mai kee aur na zabah kee qurbaaniyaan pesh kar sakengay. un kee rotee maatam karnay vaalon kee rotee jaisee hogee yaanee jo bhee usay khaaay vah naapaak ho jaaega. haan, un ka khaana sirf un kee apnee bhook mitaanay kay liyay hoga, aur vah rabb kay ghar men naheen aaega. ⁵us vaqt tum eedon par kya karogay? rabb kay tahevaaron ko tum kaisay manaaogay? ⁶jo tabaahashuda mulk say nikalengay unhen misr ikattha karega, unhen memfis dafanaaega. khudrau pauday un kee qeemtee chaandee par qabza karengay, kaantedaar jhaadiyaan un kay gharon par chha jaaengee.

⁷saza kay din a gaay hain, hisaab-kitaab kay din pahunch gaay hain. israaeel yah baat jaan lay. tum kahetay ho, “yah nabee ahemaq hai, rooh ka yah banda paagal hai.” kyoonki jitna sangeen tumhaara gunaah hai utnay hee zor say tum meree mukhaalafat kartay ho.

⁸nabee meray khuda kee taraf say israaeel ka paheredaar banaaya gaya hai. lekin jahaan bhee vah jaaay vahaan usay phansaanay kay phanday lagaaay gaay hain, balki usay us kay khuda kay ghar men bhee sataaya jaata hai. ⁹un say nihaayat hee kharaab kaam sarzad hua hai, aisa shareer kaam jaisa jibia kay baashindon say hua tha. allaah un ka qusoor yaad karkay un kay gunaahon kee munaasib saza dega.

israaeel shuroo say hee shareer hai

¹⁰rabb farmaata hai, “jab mera israaeel say pahela vaasta pada to registaan men angoor jaisa lag raha tha. tumhaaray baapdaada anjeer kay darakht par lagay pahelay paknay vaalay phal jaisay nazar aaay. lekin baal-faghoor kay paas pahunchtay hee unhon nay apnay aap ko us sharmanaak but kay liyay makhsoos kar liya. tab vah apnay aashiq jaisay makrooh ho gaay. ¹¹ab israaeel kee shaan-o-shaukat parinday kee tarah ud kar ghaaib ho jaaegee. aainda na koee ummeed say hogee, na bachcha janegee. ¹²agar vah apnay bachchon ko parvaan chadhnay tak paalen bhee to bhee main unhen beaulaad kar doonga. ek bhee naheen rahega. un par afsos jab main un say door ho jaaoonga. ¹³pahelay jab main nay israaeel par nazar daalee to vah soor kee maanind shaandaar tha, usay shaadaab jagah par pauday kee tarah lagaaya gaya tha. lekin ab usay apnee aulaad ko baahar la kar qaatil kay havaalay karna padega.”

¹⁴ai rabb, unhen day! kya day? honay day ki un kay bachchay pet men zaaay ho jaaen, ki aurten doodh na pila saken.

¹⁵rabb farmaata hai, “jab un kee tamaam bedeenee jiljaal men zaahir huee to main nay un say nafrat kee. un kee buree harkaton kee vajah say main unhen apnay ghar say nikaal doonga. aainda main unhen piyaar naheen karoonga. un kay tamaam raahanuma sarkash hain. ¹⁶israaeel ko maara gaya, logon kee jad sookh gaee hai, aur vah phal naheen la saktay. un kay bachchay paida ho bhee jaaen to main un kee qeemtee aulaad ko maar daaloonga.” ¹⁷mera khuda unhen radd karega, is liyay ki unhon nay us kee naheen sunee. chunaanchay unhen deegar aqvaam men maaray maaray phirna padega.