Yashaayaah 52

zanjeeron ko tod!

¹ai siyyoon, uth, jaag uth! apnee taaqat say mulabbas ho ja! ai muqaddas shaher yarooshalam, apnay shaandaar kapday say aaraasta ho ja! aainda kabhee bhee ghairmakhtoon ya naapaak shakhs tujh men daakhil naheen hoga. ²ai yarooshalam, apnay aap say gard jhaadkar khadee ho ja aur takht par baith ja. ai giriftaar kee huee siyyoon betee, apnee gardan kee zanjeeron ko khol kar un say aazaad ho ja! ³kyoonki rabb farmaata hai, “tumhen muft men becha gaya, aur ab tumhen paisay diay baghair chhudaaya jaaega.”

⁴kyoonki rabb qaadir-ay-mutlaq farmaata hai, “qadeem zamaanay men meree qaum misr chalee gaee taaki vahaan pardes men rahay. baad men asoor nay bilaavajah us par zulm kiya hai.” ⁵rabb farmaata hai, “ab jo ziyaadtee meree qaum say ho rahee hai us ka meray saath kya vaasta hai?” rabb farmaata hai, “meree qaum to muft men chheen lee gaee hai, aur us par hukoomat karnay vaalay shekhee maar kar poora din meray naam par kufr baktay hain. ⁶chunaanchay meree qaum meray naam ko jaan legee, us din vah pahechaan legee ki main hee vahee hoon jo farmaata hai, ‘main haazir hoon’!”

⁷us kay qadam kitnay piyaaray hain jo pahaadon par chaltay huay khushkhabaree sunaata hai. kyoonki vah amn-o-amaan, khushee ka paighaam aur najaat ka elaan karega, vah siyyoon say kahega, “tera khuda baadshaah hai!” ⁸sun! teray paheredaar aavaaz buland kar rahay hain, vah mil kar khushee kay naaray laga rahay hain. kyoonki jab rabb koh-ay-siyyoon par vaapas aaega to vah apnee aankhon say is ka mushaahada karengay.

⁹ai yarooshalam kay khandaraat, shaadiyaana bajaao, khushee kay geet gaao! kyoonki rabb nay apnee qaum ko tasallee dee hai, us nay ivzaana day kar yarooshalam ko chhudaaya hai. ¹⁰rabb apnee muqaddas qudrat tamaam aqvaam par zaahir karega, duniya kee intiha tak sab hamaaray khuda kee najaat dekhengay.

¹¹jaao, chalay jaao! vahaan say nikal jaao! kisee bhee naapaak cheez ko na chhoona. jo rabb ka saamaan uthaaay chal rahay hain vah vahaan say nikal kar paak-saaf rahen. ¹²lekin laazim naheen ki tum bhaag kar ravaana ho jaao. tumhen achaanak faraar honay kee zaroorat naheen hogee, kyoonki rabb tumhaaray aagay bhee chalega aur tumhaaray peechhay bhee. yoon israaeel ka khuda donon taraf say tumhaaree hifaazat karega.

rabb ka paighambar hamaaray gunaahon ko uthaaegaa

¹³dekho, mera khaadim kaamyaab hoga. vah sarbuland, mumtaaz aur bahut sarfaraaz hoga. ¹⁴tujhay dekh kar bahuton kay rongtay khaday ho gaay. kyoonki us kee shakl itnee kharaab thee, us kee soorat kisee bhee insaan say kaheen ziyaada bigdee huee thee. ¹⁵lekin ab bahut see qaumen usay dekh kar hakka-bakka ho jaaengee, baadshaah dam-ba-khud rah jaaengay. kyoonki jo kuchh unhen naheen bataaya gaya usay vah dekhengay, aur jo kuchh unhon nay naheen suna us kee unhen samajh aaegee.