Yashaayaah 53

¹lekin kaun hamaaray paighaam par eemaan laaya? aur rabb kee qudrat kis par zaahir huee? ²us kay saamnay vah kompal kee tarah phoot nikla, us taaza aur mulaaim shigoophay kee tarah jo khushk zameen men chhupee huee jad say nikal kar phalnay phoolnay lagtee hai. na vah khoobsoorat tha, na shaandaar. ham nay usay dekha to us kee shakl-o-soorat men kuchh naheen tha jo hamen pasand aata. ³usay haqeer aur mardood samjha jaata tha. dukh aur beemaariyaan us kee saathee rahen, aur log yahaan tak us kee tahqeer kartay thay ki usay dekh kar apna munh pher letay thay. ham us kee kuchh qadar naheen kartay thay.

⁴lekin us nay hamaaree hee beemaariyaan utha leen, hamaara hee dukh bhugat liya. to bhee ham samjhay ki yah us kee munaasib saza hai, ki allaah nay khud usay maar kar khaak men mila diya hai. ⁵lekin usay hamaaray hee jaraaim kay sabab say chheda gaya, hamaaray hee gunaahon kee khaatir kuchla gaya. usay saza milee taaki hamen salaamatee haasil ho, aur usee kay zakhmon say hamen shifa milee. ⁶ham sab bhed-bakriyon kee tarah aavaara phir rahay thay, har ek nay apnee apnee raah ikhtiyaar kee. lekin rabb nay usay ham sab kay qusoor ka nishaana banaaya.

⁷us par zulm hua, lekin us nay sab kuchh bardaasht kiya aur apna munh na khola, us bhed kee tarah jisay zabah karnay kay liyay lay jaatay hain. jis tarah lela baal katarnay vaalon kay saamnay khaamosh raheta hai usee tarah us nay apna munh na khola. ⁸usay zulm aur adaalat kay haath say chheen liya gaya. ab kaun us kee nasal ka khayaal karega? kyoonki us ka zindon kay mulk say taalluq kat gaya hai. apnee qaum kay jurm kay sabab say vah saza ka nishaana ban gaya. ⁹muqarrar yah hua ki us kee qabr bedeenon kay paas ho, ki vah martay vaqt ek ameer kay paas dafnaaya jaaay, go na us nay tashaddud kiya, na us kay munh men fareb tha.

¹⁰lekin rabb hee kee marzee thee ki usay kuchla jaaay. usee nay usay dukh ka nishaana banaaya. aur go rabb us kee jaan kay zareeay kaffaara dega to bhee vah apnay farzandon ko dekhega. rabb us kay dinon men izaafa karega, aur vah rabb kee marzee ko poora karnay men kaamyaab hoga. ¹¹itnee takleef bardaasht karnay kay baad usay phal nazar aaega, aur vah ser ho jaaega. apnay ilm say mera raast khaadim bahuton ka insaaf qaaim karega, kyoonki vah un kay gunaahon ko apnay oopar utha kar door kar dega.

¹²is liyay main usay badon men hissa doonga, aur vah zoraavaron kay saath loot ka maal taqseem karega. kyoonki us nay apnee jaan ko maut kay havaalay kar diya, aur usay mujrimon men shumaar kiya gaya. haan, us nay bahuton ka gunaah utha kar door kar diya aur mujrimon kee shafaaat kee.