Ayyoob 1
ayyoob kee deendaaree
1mulk-ay-ooz men ek beilzaam aadmee raheta tha jis ka naam ayyoob tha. vah seedhee raah par chalta, allaah ka khauf maanta aur har buraaee say door raheta tha. 2us kay saat betay aur teen betiyaan paida hueen. 3saath saath us kay bahut maal-maveshee thay : 7,000 bhed-bakriyaan, 3,000 oont, bailon kee 500 jodiyaan aur 500 gadhiyaan. us kay beshumaar naukar-naukraaniyaan bhee thay. gharaz mashriq kay tamaam baashindon men is aadmee kee haisiyat sab say badee thee.
4us kay beton ka dastoor tha ki baaree baaree apnay gharon men ziyaafat karen. is kay liyay vah apnee teen bahenon ko bhee apnay saath khaanay aur peenay kee daavat detay thay. 5har dafa jab ziyaafat kay din ikhtitaam tak pahunchtay to ayyoob apnay bachchon ko bula kar unhen paak-saaf kar deta aur subah-saveray uth kar har ek kay liyay bhasm honay vaalee ek ek qurbaanee pesh karta. kyoonki vah kaheta tha, “ho sakta hai meray bachchon nay gunaah karkay dil men allaah par laanat kee ho.” chunaanchay ayyoob har ziyaafat kay baad aisa hee karta tha.
ayyoob kay kirdaar par ilzaam
6ek din farishte [a] lafzee tarjuma : allaah kay farzand. apnay aap ko rabb kay huzoor pesh karnay aaay. iblees bhee un kay darmiyaan maujood tha. 7rabb nay iblees say poochha, “too kahaan say aaya hai?” iblees nay javaab diya, “main duniya men idhar udhar ghoomta phirta raha.”
8rabb bola, “kya too nay meray banda ayyoob par tavajjuh dee? duniya men us jaisa koee aur naheen. kyoonki vah beilzaam hai, vah seedhee raah par chalta, allaah ka khauf maanta aur har buraaee say door raheta hai.”
9iblees nay rabb ko javaab diya, “beshak, lekin kya ayyoob yoon hee allaah ka khauf maanta hai? 10too nay to us kay, us kay gharaanay kay aur us kee tamaam milkiyat kay ird-gird hifaaztee baad lagaaee hai. aur jo kuchh us kay haath nay kiya us par too nay barkat dee, nateejay men us kee bhed-bakriyaan aur gaay-bail pooray mulk men phail gaay hain. 11lekin vah kya karega agar too apna haath zara badha kar sab kuchh tabaah karay jo usay haasil hai. tab vah teray munh par hee tujh par laanat karega.”
12rabb nay iblees say kaha, “theek hai, jo kuchh bhee us ka hai vah teray haath men hai. lekin us kay badan ko haath na lagaana.” iblees rabb kay huzoor say chala gaya.
13ek din ayyoob kay betay-betiyaan maamool kay mutaabiq ziyaafat kar rahay thay. vah baday bhaaee kay ghar men khaana kha rahay aur mai pee rahay thay. 14achaanak ek qaasid ayyoob kay paas pahunch kar kahenay laga, “bail khet men hal chala rahay thay aur gadhiyaan saath vaalee zameen par char rahee theen 15ki saba kay logon nay ham par hamla karkay sab kuchh chheen liya. unhon nay tamaam mulaazimon ko talvaar say maar daala, sirf main hee aap ko yah bataanay kay liyay bach nikla hoon.”
16vah abhee baat kar hee raha tha ki ek aur qaasid pahuncha jis nay ittila dee, “allaah kee aag nay aasmaan say gir kar aap kee tamaam bhed-bakriyon aur mulaazimon ko bhasm kar diya. sirf main hee aap ko yah bataanay kay liyay bach nikla hoon.”
17vah abhee baat kar hee raha tha ki teesra qaasid pahuncha. vah bola, “baabal kay kasdiyon nay teen gurohon men taqseem ho kar hamaaray oonton par hamla kiya aur sab kuchh chheen liya. tamaam mulaazimon ko unhon nay talvaar say maar daala, sirf main hee aap ko yah bataanay kay liyay bach nikla hoon.”
18vah abhee baat kar hee raha tha ki chautha qaasid pahuncha. us nay kaha, “aap kay betay-betiyaan apnay baday bhaaee kay ghar men khaana kha rahay aur mai pee rahay the 19ki achaanak registaan kee jaanib say ek zordaar aandhee aaee jo ghar kay chaaron konon say yoon takraaee ki vah javaanon par gir pada. sab kay sab halaak ho gaay. sirf main hee aap ko yah bataanay kay liyay bach nikla hoon.”
20yah sab kuchh sun kar ayyoob utha. apna libaas phaad kar us nay apnay sar kay baal mundavaaay. phir us nay zameen par gir kar aundhay munh rabb ko sijda kiya. 21vah bola, “main nangee haalat men maan kay pet say nikla aur nangee haalat men kooch kar jaaoonga. rabb nay diya, rabb nay liya, rabb ka naam mubaarak ho!”
22is saaray muaamalay men ayyoob nay na gunaah kiya, na allaah kay baaray men kufr baka.