Ayyoob 13
1yah sab kuchh main nay apnee aankhon say dekha, apnay kaanon say sun kar samajh liya hai. 2ilm kay lihaaz say main tumhaaray baraabar hoon. is naatay say main tum say kam naheen hoon. 3lekin main qaadir-ay-mutlaq say hee baat karna chaahata hoon, allaah kay saath hee mubaahasa karnay kee aarzoo rakhta hoon.
4jahaan tak tumhaara taalluq hai, tum sab farebdih lep lagaanay vaalay aur bekaar daaktar ho. 5kaash tum saraasar khaamosh rahetay! aisa karnay say tumhaaree hikmat kaheen ziyaada zaahir hotee. 6mubaahisay men zara mera mauqif suno, adaalat men meray bayaanaat par ghaur karo!
7kya tum allaah kee khaatir kajrau baaten pesh kartay ho, kya usee kee khaatir jhoot boltay ho? 8kya tum us kee jaanibdaaree karna chaahatay ho, allaah kay haq men ladna chaahatay ho? 9soch lo, agar vah tumhaaree jaanch karay to kya tumhaaree baat banegee? kya tum usay yoon dhoka day saktay ho jis tarah insaan ko dhoka diya jaata hai?
10agar tum khufiya taur par bhee jaanibdaaree dikhaao to vah tumhen zaroor sakht saza dega. 11kya us ka rob tumhen khaufzada naheen karega? kya tum us say sakht dahshat naheen khaaogay? 12phir jin kahaavaton kee yaad tum dilaatay rahetay ho vah raakh kee amsaal saabit hongee, pata chalega ki tumhaaree baaten mittee kay alfaaz hain.
13khaamosh ho kar mujh say baaz aao! jo kuchh bhee meray saath ho jaaay, main baat karna chaahata hoon. 14main apnay aap ko khatray men daalnay kay liyay tayyaar hoon, main apnee jaan par kheloonga. 15shaayad vah mujhay maar daalay. koee baat naheen, kyoonki meree ummeed jaatee rahee hai. jo kuchh bhee ho men usee kay saamnay apnee raahon ka difa karoonga. 16aur is men main panaah leta hoon ki bedeen us kay huzoor aanay kee jur’at naheen karta.
17dhyaan say meray alfaaz suno, apnay kaan meray bayaanaat par dharo. 18tumhen pata chalega ki main nay ehatiyaat aur tarteeb say apna muaamala tayyaar kiya hai. mujhay saaf maaloom hai ki main haq par hoon! 19agar koee mujhay mujrim saabit kar sakay to main chup ho jaaoonga, dam chhodnay tak khaamosh rahoonga.
ayyoob kee maayoosee men duaa
20ai allaah, meree sirf do darakhwaasten manzoor kar taaki mujhay tujh say chhup jaanay kee zaroorat na ho. 21pahelay, apna haath mujh say door kar taaki tera khauf mujhay dahshatzada na karay. 22doosray, is kay baad mujhay bula taaki main javaab doon, ya mujhay pahelay bolnay day aur too hee is ka javaab day.
23mujh say kitnay gunaah aur ghaltiyaan huee hain? mujh par mera jurm aur mera gunaah zaahir kar! 24too apna chihara mujh say chhupaaay kyoon rakhta hai? too mujhay kyoon apna dushman samajhta hai? 25kya too hava kay jhonkon kay udaaay huay pattay ko dahshat khilaana chaahata, khushk bhoosay ka taaqqub karna chaahata hai?
26yah tera hee faisla hai ki main talkh tajribon say guzroon, teree hee marzee hai ki main apnee javaanee kay gunaahon kee saza paaoon. [a] lafzee tarjuma : meeraas men paaoon. 27too meray paaon ko kaath men thonk kar meree tamaam raahon kee paheraadaaree karta hai. too meray har ek naqsh-ay-qadam par dhyaan deta hai, 28go main mai kee ghisee phatee mashk aur keedon ka kharaab kiya hua libaas hoon.