Ayyoob 17

allaah say iltijaa

¹meree rooh shikasta ho gaee, meray din bujh gaay hain. qabristaan hee meray intizaar men hai. ²meray chaaron taraf mazaaq hee mazaaq sunaaee deta, meree aankhen logon ka hatdharm ravayya dekhtay dekhtay thak gaee hain. ³ai allaah, meree zamaanat meray apnay haathon say qabool farma, kyoonki aur koee naheen jo usay day. ⁴un kay zahenon ko too nay band kar diya, is liyay to un say izzat naheen paaega. ⁵vah us aadmee kee maanind hain jo apnay doston ko ziyaafat kee daavat day, haalaanki us kay apnay bachchay bhookon mar rahay hon.

⁶allaah nay mujhay mazaaq ka yoon nishaana banaaya hai ki main qaumon men ibrat’angez misaal ban gaya hoon. mujhay dekhtay hee log meray munh par thooktay hain. ⁷meree aankhen gham kha kha kar dhundala gaee hain, meray aaza yahaan tak sookh gaay ki saaya hee rah gaya hai. ⁸yah dekh kar seedhee raah par chalnay vaalon kay rongtay khaday ho jaatay aur begunaah bedeenon kay khilaaf mushtail ho jaatay hain. ⁹raastbaaz apnee raah par qaaim rahetay, aur jin kay haath paak hain vah taqviyat paatay hain. ¹⁰lekin jahaan tak tum sab ka taalluq hai, aao dubaara mujh par hamla karo! mujhay tum men ek bhee daana aadmee naheen milega.

¹¹meray din guzar gaay hain. meray vah mansoobay aur dil kee aarzooen khaak men mil gaee hain ¹²jin say raat din men badal gaee aur raushnee andheray ko door karkay qareeb aaee thee. ¹³agar main sirf itnee hee ummeed rakhoon ki paataal mera ghar hoga to yah kaisee ummeed hogee? agar main apna bistar taareekee men bichha kar ¹⁴qabr say kahoon, ‘too mera baap hai’ aur keeday say, ‘ai meree ammee, ai meree bahen’ ¹⁵to phir yah kaisee ummeed hogee? kaun kahega, ‘mujhay teray liyay ummeed nazar aatee hai’? ¹⁶tab meree ummeed meray saath paataal men utregee, aur ham mil kar khaak men dhans jaaengay.”