Ayyoob 18
bildad : allaah bedeenon ko saza deta hai
1bildad sookhee nay javaab day kar kaha,
2“too kab tak aisee baaten karega? in say baaz a kar hosh men a! tab hee ham saheeh baat kar sakengay. 3too hamen dangar jaisay ahemaq kyoon samajhta hai? 4go too aag-bagoola ho kar apnay aap ko phaad raha hai, lekin kya teray baais zameen ko veeraan hona chaahiay aur chataanon ko apnee jagah say khisakna chaahiay? hargiz naheen!
5yaqeenan bedeen ka charaagh bujh jaaega, us kee aag ka shola aainda naheen chamkega. 6us kay khaimay men raushnee andhera ho jaaegee, us kay oopar kee shama bujh jaaegee. 7us kay lambay qadam ruk ruk kar aagay badhengay, aur us ka apna mansooba usay patakh dega.
8us kay apnay paaon usay jaal men phansa detay hain, vah daam par hee chalta phirta hai. 9phanda us kee edee pakad leta, kamand usay jakad letee hai. 10usay phansaanay ka rassa zameen men chhupa hua hai, raastay men phanda bichha hai.
11vah aisee cheezon say ghira raheta hai jo usay qadam-ba-qadam dahshat khilaatee aur us kee naak men dam kartee hain. 12aafat usay hadap kar lena chaahatee hai, tabaahee tayyaar khadee hai taaki usay girtay vaqt hee pakad lay. 13beemaaree us kee jild ko kha jaatee, maut ka pahelautha us kay aaza ko nigal leta hai. 14usay us kay khaimay kee hifaazat say chheen liya jaata aur ghaseet kar dahshaton kay baadshaah kay saamnay laaya jaata hai.
15us kay khaimay men aag bastee, us kay ghar par gandhak bikhar jaatee hai. 16neechay us kee jaden sookh jaatee, oopar us kee shaakhen murjha jaatee hain. 17zameen par say us kee yaad mit jaatee hai, kaheen bhee us ka naam-o-nishaan naheen raheta.
18usay raushnee say taareekee men dhakela jaata, duniya say bhaga kar khaarij kiya jaata hai. 19qaum men us kee na aulaad na nasal rahegee, jahaan pahelay raheta tha vahaan koee naheen bachega. 20us ka anjaam dekh kar maghrib kay baashindon kay rongtay khaday ho jaatay aur mashriq kay baashinday dahshatzada ho jaatay hain. 21yahee hai bedeen kay ghar ka anjaam, usee kay maqaam ka jo allaah ko naheen jaanta.”