Ayyoob 19
ayyoob : main jaanta hoon ki mera najaatadihanda zinda hai
1tab ayyoob nay javaab men kaha,
2“tum kab tak mujh par tashaddud karna chaahatay ho, kab tak mujhay alfaaz say tukday tukday karna chaahatay ho? 3ab tum nay das baar mujhay malaamat kee hai, tum nay sharm kiay baghair meray saath badasulookee kee hai. 4agar yah baat saheeh bhee ho ki main ghalat raah par a gaya hoon to mujhay hee is ka nateeja bhugatna hai. 5lekin choonki tum mujh par apnee sabqat dikhaana chaahatay aur meree rusvaaee mujhay daantnay kay liyay istemaal kar rahay ho 6to phir jaan lo, allaah nay khud mujhay ghalat raah par la kar apnay daam say gher liya hai.
7go main cheekh kar kahoon, ‘mujh par zulm ho raha hai,’ lekin javaab koee naheen milta. go main madad kay liyay pukaaroon, lekin insaaf naheen paata. 8us nay meray raastay men aisee deevaar khadee kar dee ki main guzar naheen sakta, us nay meree raahon par andhera hee chha jaanay diya hai. 9us nay meree izzat mujh say chheen kar meray sar say taaj utaar diya hai. 10chaaron taraf say us nay mujhay dha diya to main tabaah hua. us nay meree ummeed ko darakht kee tarah jad say ukhaad diya hai. 11us ka qaher meray khilaaf bhadak utha hai, aur vah mujhay apnay dushmanon men shumaar karta hai. 12us kay dastay mil kar mujh par hamla karnay aaay hain. unhon nay meree faseel kay saath mittee ka dher lagaaya hai taaki us men rakhna daalen. unhon nay chaaron taraf say meray khaimay ka muhaasara kiya hai.
13meray bhaaiyon ko us nay mujh say door kar diya, aur meray jaannay vaalon nay mera huqqa-paanee band kar diya hai. 14meray rishtedaaron nay mujhay tark kar diya, meray qareebee dost mujhay bhool gaay hain. 15meray daamangeer aur naukraaniyaan mujhay ajnabee samajhtay hain. un kee nazar men main ajnabee hoon. 16main apnay naukar ko bulaata hoon to vah javaab naheen deta. go main apnay munh say us say iltija karoon to bhee vah naheen aata.
17meree beevee meree jaan say ghin khaatee hai, meray sagay bhaaee mujhay makrooh samajhtay hain. 18yahaan tak ki chhotay bachchay bhee mujhay haqeer jaantay hain. agar main uthnay kee koshish karoon to vah apna munh doosree taraf pher letay hain. 19meray dilee dost mujhay karaahiyat kee nigaah say dekhtay hain, jo mujhay piyaaray thay vah meray mukhaalif ho gaay hain. 20meree jild sukad kar meree haddiyon kay saath ja lagee hai. main maut say baal baal bach gaya hoon. [a] lafzee tarjuma : meray daanton kee jild hee bach gaee hai. matlab mubham sa hai.
21meray dosto, mujh par taras khaao, mujh par taras khaao. kyoonki allaah hee kay haath nay mujhay maara hai. 22tum kyoon allaah kee tarah meray peechhay pad gaay ho, kyoon mera gosht kha kha kar ser naheen hotay?
23kaash meree baaten qalamband ho jaaen! kaash vah yaadgaar par kanda kee jaaen, 24lohay kee chhainee aur seesay say hamesha kay liyay patthar men naqsh kee jaaen! 25lekin main jaanta hoon ki mera chhudaanay vaala zinda hai aur aakhirkaar meray haq men zameen par khada ho jaaega, 26go meree jild yoon utaaree bhee gaee ho. lekin meree aarzoo hai ki jism men hotay huay allaah ko dekhoon, 27ki main khud hee usay dekhoon, na ki ajnabee balki apnee hee aankhon say us par nigaah karoon. is aarzoo kee shiddat say mera dil tabaah ho raha hai.
28tum kahetay ho, ‘ham kitnee sakhtee say ayyoob ka taaqqub karengay’ aur maslay kee jad to usee men pinhaan hai. 29lekin tumhen khud talvaar say darna chaahiay, kyoonki tumhaara ghussa talvaar kee saza kay laaiq hai, tumhen jaanna chaahiay ki adaalat aanay vaalee hai.”