Ayyoob 21

ayyoob : bahut dafa bedeenon ko saza naheen miltee

¹phir ayyoob nay javaab men kaha,

²“dhyaan say meray alfaaz suno! yahee karnay say mujhay tasallee do! ³jab tak main apnee baat pesh na karoon mujhay bardaasht karo, is kay baad agar chaaho to mera mazaaq udaao. ⁴kya main kisee insaan say ehatijaaj kar raha hoon? hargiz naheen! to phir kya ajab ki meree rooh itnee tang a gaee hai. ⁵mujh par nazar daalo to tumhaaray rongtay khaday ho jaaengay aur tum hairaanee say apna haath munh par rakhogay.

⁶jab kabhee mujhay vah khayaal yaad aata hai jo main pesh karna chaahata hoon to main dahshatzada ho jaata hoon, meray jism par tharatharaahat taaree ho jaatee hai. ⁷khayaal yah hai ki bedeen kyoon jeetay rahetay hain? na sirf vah umrraseeda ho jaatay balki un kee taaqat badhtee rahetee hai.

⁸un kay bachchay un kay saamnay qaaim ho jaatay, un kee aulaad un kee aankhon kay saamnay mazboot ho jaatee hai. ⁹un kay ghar mahfooz hain. na koee cheez unhen daraatee, na allaah kee saza un par naazil hotee hai. ¹⁰un ka saand nasal badhaanay men kabhee naakaam naheen hota, un kee gaay vaqt par janm detee, aur us kay bachchay kabhee zaaay naheen hotay.

¹¹vah apnay bachchon ko baahar khelnay kay liyay bhejtay hain to vah bhed-bakriyon kay revad kee tarah ghar say nikaltay hain. un kay ladkay koodtay phaandtay nazar aatay hain. ¹²vah daf aur sarod baja kar geet gaatay aur baansree kee sureelee aavaaz nikaal kar apna dil bahelaatay hain. ¹³un kee zindagee khushhaal rahetee hai, vah har din say poora lutf uthaatay aur aakhirkaar baday sukoon say paataal men utar jaatay hain.

¹⁴aur yah vah log hain jo allaah say kahetay hain, ‘ham say door ho ja, ham teree raahon ko jaanna naheen chaahatay. ¹⁵qaadir-ay-mutlaq kaun hai ki ham us kee khidmat karen? us say dua karnay say hamen kya faaida hoga?’ ¹⁶kya un kee khushhaalee un kay apnay haath men naheen hotee? kya bedeenon kay mansoobay allaah say door naheen rahetay?

¹⁷aisa lagta hai ki bedeenon ka charaagh kabhee naheen bujhta. kya un par kabhee museebat aatee hai? kya allaah kabhee qaher men a kar un par vah tabaahee naazil karta hai jo un ka munaasib hissa hai? ¹⁸kya hava kay jhonkay kabhee unhen bhoosay kee tarah aur aandhee kabhee unhen toodee kee tarah uda lay jaatee hai? afsos, aisa naheen hota. ¹⁹shaayad tum kaho, ‘allaah unhen saza denay kay bajaay un kay bachchon ko saza dega.’ lekin main kaheta hoon ki usay baap ko hee saza denee chaahiay taaki vah apnay gunaahon ka nateeja khoob jaan lay. ²⁰us kee apnee hee aankhen us kee tabaahee dekhen, vah khud qaadir-ay-mutlaq kay ghazab ka piyaala pee lay. ²¹kyoonki jab us kee zindagee kay muqarrara din ikhtitaam tak pahunchen to usay kya parva hogee ki meray baad ghar vaalon kay saath kya hoga.

²²lekin kaun allaah ko ilm sikha sakta hai? vah to bulandiyon par rahenay vaalon kee bhee adaalat karta hai. ²³ek shakhs vafaat paatay vaqt khoob tandurust hota hai. jeetay jee vah baday sukoon aur itmeenaan say zindagee guzaar saka. ²⁴us kay bartan doodh say bharay rahay, us kee haddiyon ka gooda tar-o-taaza raha. ²⁵doosra shakhs shikasta haalat men mar jaata hai aur usay kabhee khushhaalee ka lutf naseeb naheen hua. ²⁶ab donon mil kar khaak men paday rahetay hain, donon keeday-makodon say dhaampay rahetay hain.

²⁷suno, main tumhaaray khayaalaat aur un saazishon say vaaqif hoon jin say tum mujh par zulm karna chaahatay ho. ²⁸kyoonki tum kahetay ho, ‘raees ka ghar kahaan hai? vah khaima kidhar gaya jis men bedeen bastay thay? vah apnay gunaahon kay sabab say hee tabaah ho gaay hain.’ ²⁹lekin un say poochh lo jo idhar udhar safar kartay rahetay hain. tumhen un kee gavaahee tasleem karnee chaahie ³⁰ki aafat kay din shareer ko saheeh-salaamat chhoda jaata hai, ki ghazab kay din usay rihaaee miltee hai.

³¹kaun us kay roo-ba-roo us kay chaal-chalan kee malaamat karta, kaun usay us kay ghalat kaam ka munaasib ajr deta hai? ³²log us kay janaazay men shareek ho kar usay qabr tak lay jaatay hain. us kee qabr par chaukeedaar lagaaya jaata hai. ³³vaadee kee mittee kay dhelay usay meethay lagtay hain. janaazay kay peechhay peechhay tamaam duniya, us kay aagay aagay anaginat hujoom chalta hai. ³⁴chunaanchay tum mujhay abas baaton say kyoon tasallee day rahay ho? tumhaaray javaabon men tumhaaree bevafaaee hee nazar aatee hai.”