Ayyoob 23

ayyoob : kaash main allaah ko kaheen paataa

¹ayyoob nay javaab men kaha,

²“beshak aaj meree shikaayat sarkashee ka izhaar hai, haalaanki main apnee aahon par qaaboo paanay kee koshish kar raha hoon.

³kaash main usay paanay ka ilm rakhoon taaki us kee sukoonatgaah tak pahunch sakoon. ⁴phir main apna muaamala tarteebavaar us kay saamnay pesh karta, main apna munh dalaail say bhar leta. ⁵tab mujhay us kay javaabon ka pata chalta, main us kay bayaanaat par ghaur kar sakta. ⁶kya vah apnee azeem quvvat mujh say ladnay par sarf karta? hargiz naheen! vah yaqeenan mujh par tavajjuh deta. ⁷agar main vahaan us kay huzoor a sakta to diyaanatdaar aadmee kee tarah us kay saath muqaddma ladta. tab main hamesha kay liyay apnay munsif say bach nikalta!

⁸lekin afsos, agar main mashriq kee taraf jaaoon to vah vahaan naheen hota, maghrib kee jaanib badhoon to vahaan bhee naheen milta. ⁹shimaal main usay dhoondoon to vah dikhaaee naheen deta, junoob kee taraf rukh karoon to vahaan bhee posheeda raheta hai. ¹⁰kyoonki vah meree raah ko jaanta hai. agar vah meree jaanch-padtaal karta to main khaalis sona saabit hota. ¹¹meray qadam us kee raah men rahay hain, main raah say na baaeen, na daaeen taraf hata balki seedha us par chalta raha. ¹²main us kay honton kay farmaan say baaz naheen aaya balki apnay dil men hee us kay munh kee baaten mahfooz rakhee hain.

¹³agar vah faisla karay to kaun usay rok sakta hai? jo kuchh bhee vah karna chaahay usay amal men laata hai. ¹⁴jo bhee mansooba us nay meray liyay baandha usay vah zaroor poora karega. aur us kay zahen men mazeed bahut say aisay mansoobay hain. ¹⁵isee liyay main us kay huzoor dahshatzada hoon. jab bhee main in baaton par dhyaan doon to us say darta hoon. ¹⁶allaah nay khud mujhay shikastaadil kiya, qaadir-ay-mutlaq hee nay mujhay dahshat khilaaee hai. ¹⁷kyoonki na main taareekee say tabaah ho raha hoon, na is liyay ki ghanay andheray nay meray chiharay ko dhaamp diya hai.