Ayyoob 24

zameen par kitnee naainsaafee paaee jaatee hai

¹qaadir-ay-mutlaq adaalat kay auqaat kyoon naheen muqarrar karta? jo usay jaantay hain vah aisay din kyoon naheen dekhtay? ²bedeen apnee zameenon kee hudood ko aagay peechhay kartay aur doosron kay revad loot kar apnee charaagaahon men lay jaatay hain. ³vah yateemon ka gadha haank kar lay jaatay aur is shart par beva ko qarz detay hain ki vah unhen zamaanat kay taur par apna bail day. ⁴vah zarooratmandon ko raastay say hataatay hain, chunaanchay mulk kay ghareebon ko saraasar chhup jaana padta hai.

⁵zarooratmand biyaabaan men janglee gadhon kee tarah kaam karnay kay liyay nikaltay hain. khuraak ka khoj laga laga kar vah idhar udhar ghoomtay phirtay hain balki registaan hee unhen un kay bachchon kay liyay khaana muhayya karta hai. ⁶jo khet un kay apnay naheen hain un men vah fasal kaattay hain, aur bedeenon kay angoor kay baaghon men ja kar vah do chaar angoor chun letay hain jo fasal chunnay kay baad baaqee rah gaay thay. ⁷kapdon say maheroom rah kar vah raat ko barahena haalat men guzaartay hain. sardee men un kay paas kambal tak naheen hota. ⁸pahaadon kee baarish say vah bheeg jaatay aur panaahgaah na honay kay baais pattharon kay saath lipat jaatay hain.

⁹bedeen baap say maheroom bachchay ko maan kee god say chheen letay hain balki is shart par museebatzada ko qarz detay hain ki vah unhen zamaanat kay taur par apna sheerakhwaar bachcha day. ¹⁰ghareeb barahena haalat men aur kapday pahenay baghair phirtay hain, vah bhookay hotay huay poolay uthaaay chaltay hain. ¹¹zaitoon kay jo darakht bedeenon nay saf-dar-saf lagaaay thay un kay darmiyaan ghareeb zaitoon ka tel nikaaltay hain. piyaasee haalat men vah shareeron kay hauzon men angoor ko paaon talay kuchal kar us ka ras nikaaltay hain. ¹²shaher say marnay vaalon kee aahen nikaltee hain aur zakhmee log madad kay liyay cheekhtay chillaatay hain. is kay baavujood allaah kisee ko bhee mujrim naheen thaheraata.

¹³yah bedeen un men say hain jo noor say sarkash ho gaay hain. na vah us kee raahon say vaaqif hain, na un men rahetay hain. ¹⁴subah-saveray qaatil uthta hai taaki museebatzada aur zarooratmand ko qatl karay. raat ko chor chakkar kaatta hai. ¹⁵zinaakaar kee aankhen shaam kay dhundalkay kay intizaar men rahetee hain, yah soch kar ki us vaqt main kisee ko nazar naheen aaoonga. nikaltay vaqt vah apnay munh ko dhaamp leta hai. ¹⁶daakoo andheray men gharon men naqab lagaatay jabki din kay vaqt vah chhup kar apnay peechhay kundee laga letay hain. noor ko vah jaantay hee naheen. ¹⁷gaheree taareekee hee un kee subah hotee hai, kyoonki un kee ghanay andheray kee dahshaton say dostee ho gaee hai.

¹⁸lekin bedeen paanee kee satah par jhaag hain, mulk men un ka hissa malaoon hai aur un kay angoor kay baaghon kee taraf koee rujoo naheen karta. ¹⁹jis tarah kaal aur jhulastee garmee barf ka paanee chheen letee hain usee tarah paataal gunaahgaaron ko chheen leta hai. ²⁰maan ka rahem unhen bhool jaata, keeda unhen choos leta aur un kee yaad jaatee rahetee hai. yaqeenan bedeenee lakdee kee tarah toot jaatee hai. ²¹bedeen baanjh aurat par zulm aur bevaaon say badasulookee kartay hain, ²²lekin allaah zabaradaston ko apnee qudrat say ghaseet kar lay jaata hai. vah mazbootee say khaday bhee hon to bhee koee yaqeen naheen ki zinda rahengay. ²³allaah unhen hifaazat say aaraam karnay deta hai, lekin us kee aankhen un kee raahon kee paheraadaaree kartee rahetee hain. ²⁴lamha bhar kay liyay vah sarfaraaz hotay, lekin phir nest-o-naabood ho jaatay hain. unhen khaak men mila kar sab kee tarah jama kiya jaata hai, vah gandum kee katee huee baalon kee tarah murjha jaatay hain.

²⁵kya aisa naheen hai? agar koee muttafiq naheen to vah saabit karay ki main ghaltee par hoon, vah dikhaaay ki meray dalaail baatil hain.”