Ayyoob 26
ayyoob : too nay mujhay kitnay achchhay mashvray diay hain!
1ayyoob nay javaab day kar kaha,
2“vaah jee vaah! too nay kya khoob usay sahaara diya jo bebas hai, kya khoob us baazoo ko mazboot kar diya jo betaaqat hai! 3too nay usay kitnay achchhay mashvray diay jo hikmat say maheroom hai, apnee samajh kee kitnee gaheree baaten us par zaahir kee hain. 4too nay kis kee madad say yah kuchh pesh kiya hai? kis nay teree rooh men vah baaten daaleen jo teray munh say nikal aaee hain?
kaun allaah kee azmat ka andaaza laga sakta hai?
5allaah kay saamnay vah tamaam murda arvaah jo paanee aur us men rahenay vaalon kay neechay bastee hain dar kay maaray tadap uthtee hain. 6haan, us kay saamnay paataal barahena aur us kee gaheraaiyaan beniqaab hain.
7allaah hee nay shimaal ko veeraan-o-sunsaan jagah kay oopar taan liya, usee nay zameen ko yoon laga diya ki vah kisee bhee cheez say naheen lataktee. 8us nay apnay baadlon men paanee lapet liya, lekin vah bojh talay na phatay. 9us nay apna takht nazron say chhupa kar apna baadal us par chha jaanay diya. 10us nay paanee kee satah par daaira banaaya jo raushnee aur andheray kay darmiyaan hadd ban gaya.
11aasmaan kay satoon laraz uthay. us kee dhamkee par vah dahshatzada huay. 12apnee qudrat say allaah nay samundar ko thama diya, apnee hikmat say raheb ajhdahay ko tukday tukday kar diya. 13us kay rooh nay aasmaan ko saaf kiya, us kay haath nay faraar honay vaalay saamp ko chhed daala. 14lekin aisay kaam us kee raahon kay kinaaray par hee kiay jaatay hain. jo kuchh ham us kay baaray men suntay hain vah dheemee dheemee aavaaz say hamaaray kaan tak pahunchta hai. to phir kaun us kee qudrat kee kadaktee aavaaz samajh sakta hai?”