Ayyoob 27

main bequsoor hoon

¹phir ayyoob nay apnee baat jaaree rakhee,

²“allaah kee hayaat kee qasam jis nay mera insaaf karnay say inkaar kiya, qaadir-ay-mutlaq kee qasam jis nay meree zindagee talkh kar dee hai, ³meray jeetay jee, haan jab tak allaah ka dam meree naak men hai ⁴meray hont jhoot naheen bolengay, meree zabaan dhoka bayaan naheen karegee. ⁵main kabhee tasleem naheen karoonga ki tumhaaree baat durust hai. main beilzaam hoon aur martay dam tak is kay ulat naheen kahoonga. ⁶main israar karta hoon ki raastbaaz hoon aur is say kabhee baaz naheen aaoonga. mera dil meray kisee bhee din kay baaray men mujhay malaamat naheen karta.

⁷allaah karay ki meray dushman kay saath vahee sulook kiya jaaay jo bedeenon kay saath kiya jaaega, ki meray mukhaalif ka vah anjaam ho jo badkaaron ko pesh aaega. ⁸kyoonki us vaqt shareer kee kya ummeed rahegee jab usay is zindagee say munqatay kiya jaaega, jab allaah us kee jaan us say talab karega? ⁹kya allaah us kee cheekhen sunega jab vah museebat men phans kar madad kay liyay pukaarega? ¹⁰ya kya vah qaadir-ay-mutlaq say lutf’andoz hoga aur har vaqt allaah ko pukaarega?

¹¹ab main tumhen allaah kee qudrat kay baaray men taaleem doonga, qaadir-ay-mutlaq ka iraada tum say naheen chhupaaoonga. ¹²dekho, tum sab nay is ka mushaahada kiya hai. to phir is qism kee baatil baaten kyoon kartay ho?

bedeen zinda naheen rahegaa

¹³bedeen allaah say kya ajr paaega, zaalim ko qaadir-ay-mutlaq say meeraas men kya milega? ¹⁴go us kay bachchay mut’addid hon, lekin aakhirkaar vah talvaar kee zad men aaengay. us kee aulaad bhookee rahegee. ¹⁵jo bach jaaen unhen muhalak beemaaree say qabr men pahunchaaya jaaega, aur un kee bevaaen maatam naheen kar paaengee. ¹⁶beshak vah khaak kee tarah chaandee ka dher lagaaay aur mittee kee tarah nafees kapdon ka toda ikattha karay, ¹⁷lekin jo kapday vah jama karay unhen raastbaaz pahen lega, aur jo chaandee vah ikatthee karay usay bequsoor taqseem karega. ¹⁸jo ghar bedeen bana lay vah ghonslay kee maanind hai, us aarizee jhompdee kee maanind jo chaukeedaar apnay liyay bana leta hai. ¹⁹vah ameer haalat men so jaata hai, lekin aakhiree dafa. jab apnee aankhen khol leta to tamaam daulat jaatee rahee hai. ²⁰us par haulnaak vaaqiaat ka sailaab toot padta, usay raat kay vaqt aandhee chheen letee hai. ²¹mashriqee loo usay uda lay jaatee, usay utha kar us kay maqaam say door phaink detee hai. ²²berahemee say vah us par yoon jhapatta maartee rahetee hai ki usay baar baar bhaagna padta hai. ²³vah taaliyaan baja kar apnee hiqaarat ka izhaar kartee, apnee jagah say aavaazay kastee hai.