Ayyoob 28
hikmat kahaan paaee jaatee hai?
1yaqeenan chaandee kee kaanen hotee hain aur aisee jagahen jahaan sona khaalis kiya jaata hai. 2loha zameen say nikaala jaata aur log patthar pighla kar taamba bana letay hain. 3insaan andheray ko khatm karkay zameen kee gaheree gaheree jagahon tak kachchee dhaat ka khoj lagaata hai, khwaah vah kitnay andheray men kyoon na ho. 4ek ajnabee qaum surang lagaatee hai. jab rasson say latkay huay kaam kartay aur insaanon say door kaan men jhoomtay hain to zameen par guzarnay vaalon ko un kee yaad hee naheen rahetee. 5zameen kee satah par khuraak paida hotee hai jabki us kee gaheraaiyaan yoon tabdeel ho jaatee hain jaisay us men aag lagee ho. 6pattharon say sang-ay-laajvard nikaala jaata hai jis men sonay kay zarray bhee paaay jaatay hain.
7yah aisay raastay hain jo koee bhee shikaaree parinda naheen jaanta, jo kisee bhee baaz nay naheen dekha. 8jangal kay robdaar jaanvaron men say koee bhee in raahon par naheen chala, kisee bhee sherbabar nay in par qadam naheen rakha. 9insaan sang-ay-chaqmaaq par haath laga kar pahaadon ko jad say ulta deta hai. 10vah patthar men surang laga kar har qism kee qeemtee cheez dekh letaa 11aur zameenadoz nadiyon ko band karkay posheeda cheezen raushnee men laata hai.
12lekin hikmat kahaan paaee jaatee hai, samajh kahaan say miltee hai? 13insaan us tak jaanay vaalee raah naheen jaanta, kyoonki usay mulk-ay-hayaat men paaya naheen jaata. 14samundar kaheta hai, ‘hikmat meray paas naheen hai,’ aur us kee gaheraaiyaan bayaan kartee hain, ‘yahaan bhee naheen hai.’
15hikmat ko na khaalis sonay, na chaandee say khareeda ja sakta hai. 16usay paanay kay liyay na ofeer ka sona, na beshaqeemat aqeeq-ay-ahmar [a] charanelian ya sang-ay-laajvard [b] lapis lazuli kaafee hain. 17sona aur sheesha us ka muqaabla naheen kar saktay, na vah sonay kay zevraat kay ivz mil saktee hai. 18us kee nisbat moonga aur billaur kee kya qadar hai? hikmat say bharee thailee motiyon say kaheen ziyaada qeemtee hai. 19ethopiya ka zabarjad [c] peridot us ka muqaabla naheen kar sakta, usay khaalis sonay kay liyay khareeda naheen ja sakta.
20hikmat kahaan say aatee, samajh kahaan say mil saktee hai? 21vah tamaam jaandaaron say posheeda rahetee balki parindon say bhee chhupee rahetee hai. 22paataal aur maut us kay baaray men kahetay hain, ‘ham nay us kay baaray men sirf afwaahen sunee hain.’
23lekin allaah us tak jaanay vaalee raah ko jaanta hai, usay maaloom hai ki kahaan mil saktee hai. 24kyoonki usee nay zameen kee hudood tak dekha, aasmaan talay sab kuchh par nazar daalee 25taaki hava ka vazan muqarrar karay aur paanee kee paimaaish karkay us kee hudood mut’ayyin karay. 26usee nay baarish kay liyay farmaan jaaree kiya aur baadal kee kadaktee bijlee kay liyay raasta tayyaar kiya. 27usee vaqt us nay hikmat ko dekh kar us kee jaanch-padtaal kee. us nay usay qaaim bhee kiya aur us kee tah tak tahqeeq bhee kee. 28insaan say us nay kaha, ‘suno, allaah ka khauf maanna hee hikmat aur buraaee say door rahena hee samajh hai’.”