Ayyoob 29
kaash meree zindagee pahelay kee tarah ho
1ayyoob nay apnee baat jaaree rakh kar kaha,
2“kaash main dubaara maazee kay vah din guzaar sakoon jab allaah meree dekh-bhaal karta tha, 3jab us kee shama meray sar kay oopar chamaktee rahee aur main us kee raushnee kee madad say andheray men chalta tha. 4us vaqt meree javaanee urooj par thee aur mera khaima allaah kay saay men raheta tha. 5qaadir-ay-mutlaq meray saath tha, aur main apnay beton say ghira raheta tha. 6kasrat kay baais meray qadam dahee say dhoay rahetay aur chataan say tel kee nadiyaan phoot kar nikaltee theen.
7jab kabhee main shaher kay darvaazay say nikal kar chauk men apnee kursee par baith jaataa 8to javaan aadmee mujhay dekh kar peechhay hat kar chhup jaatay, buzurg uth kar khaday rahetay, 9raees bolnay say baaz a kar munh par haath rakhtay, 10shurfa kee aavaaz dab jaatee aur un kee zabaan taaloo say chipak jaatee thee.
11jis kaan nay meree baaten suneen us nay mujhay mubaarak kaha, jis aankh nay mujhay dekha us nay meray haq men gavaahee dee. 12kyoonki jo museebat men a kar aavaaz deta usay main bachaata, besahaara yateem ko chhutkaara deta tha. 13tabaah honay vaalay mujhay barkat detay thay. meray baais bevaaon kay dilon say khushee kay naaray ubhar aatay thay. 14main raastbaazee say mulabbas aur raastbaazee mujh say mulabbas rahetee thee, insaaf mera chogha aur pagdee tha.
15andhon kay liyay main aankhen, langadon kay liyay paaon bana raheta tha. 16main ghareebon ka baap tha, aur jab kabhee ajnabee ko muqaddma ladna pada to main ghaur say us kay muaamalay ka muaaina karta tha taaki us ka haq maara na jaaay. 17main nay bedeen ka jabda tod kar us kay daanton men say shikaar chhudaaya.
18us vaqt mera khayaal tha, ‘main apnay hee ghar men vafaat paaoonga, seemurgh kee tarah apnee zindagee kay dinon men izaafa karoonga. 19meree jaden paanee tak phailee aur meree shaakhen os say tar rahengee. 20meree izzat har vaqt taaza rahegee, aur meray haath kee kamaan ko naee taqviyat miltee rahegee.’
21log meree sun kar khaamoshee say meray mashvaron kay intizaar men rahetay thay. 22meray baat karnay par vah javaab men kuchh na kahetay balki meray alfaaz halkee see boonda-baandee kee tarah un par tapaktay rahetay. 23jis tarah insaan shiddat say baarish kay intizaar men raheta hai usee tarah vah meray intizaar men rahetay thay. vah munh pasaar kar bahaar kee baarish kee tarah meray alfaaz ko jazab kar letay thay. 24jab main un say baat kartay vaqt muskuraata to unhen yaqeen naheen aata tha, meree un par meharbaanee un kay nazdeek nihaayat qeemtee thee. 25main un kee raah un kay liyay chun kar un kee qiyaadat karta, un kay darmiyaan yoon basta tha jis tarah baadshaah apnay daston kay darmiyaan. main us kee maanind tha jo maatam karnay vaalon ko tasallee deta hai.