Ayyoob 30
mujhay radd kiya gaya hai
1lekin ab vah mera mazaaq udaatay hain, haalaanki un kee umr mujh say kam hai aur main un kay baapon ko apnee bhed-bakriyon kee dekh-bhaal karnay vaalay kutton kay saath kaam par lagaanay kay bhee laaiq naheen samajhta tha. 2meray liyay un kay haathon kee madad ka kya faaida tha? un kee pooree taaqat to jaatee rahee thee. 3khuraak kee kamee aur shadeed bhook kay maaray vah khushk zameen kee thodee bahut paidaavaar katar katar kar khaatay hain. har vaqt vah tabaahee aur veeraanee kay daaman men rahetay hain. 4vah jhaadiyon say khatmee ka phal tod kar khaatay, jhaadiyon [a] yaanee jhaadee banaam baroom, seenk qism kee jhaadee jis kay phool zard hotay hain. kee jaden aag taapnay kay liyay ikatthee kartay hain. 5unhen aabaadiyon say khaarij kiya gaya hai, aur log ‘chor chor’ chilla kar unhen bhaga detay hain. 6unhen ghaatiyon kee dhalaanon par basna padta, vah zameen kay ghaaron men aur pattharon kay darmiyaan hee rahetay hain. 7jhaadiyon kay darmiyaan vah aavaazen detay aur mil kar oontakataaron talay dabak jaatay hain. 8in kameenay aur benaam logon ko maar maar kar mulk say bhaga diya gaya hai.
9aur ab main in hee ka nishaana ban gaya hoon. apnay geeton men vah mera mazaaq udaatay hain, meree buree haalat un kay liyay mazhakaakhez misaal ban gaee hai. 10vah ghin kha kar mujh say door rahetay aur meray munh par thooknay say naheen ruktay. 11choonki allaah nay meree kamaan kee taant khol kar meree rusvaaee kee hai, is liyay vah meree maujoodgee men belagaam ho gaay hain. 12meray dahenay haath hujoom khaday ho kar mujhay thokar khilaatay aur meree faseel kay saath mittee kay dher lagaatay hain taaki us men rakhna daal kar mujhay tabaah karen. 13vah meree qil’aabandiyaan dha kar mujhay khaak men milaanay men kaamyaab ho jaatay hain. kisee aur kee madad darkaar hee naheen. 14vah rakhnay men daakhil hotay aur jauq-dar-jauq tabaahashuda faseel men say guzar kar aagay badhtay hain. 15haulnaak vaaqiaat meray khilaaf khaday ho gaay hain, aur vah tez hava kee tarah meray vaqaar ko uda lay ja rahay hain. meree salaamatee baadal kee tarah ojhal ho gaee hai.
16aur ab meree jaan nikal rahee hai, main museebat kay dinon kay qaaboo men a gaya hoon. 17raat ko meree haddiyon ko chheda jaata hai, katarnay vaala dard mujhay kabhee naheen chhodta. 18allaah baday zor say mera kapda pakad kar gireebaan kee tarah mujhay apnee sakht girift men rakhta hai. 19us nay mujhay keechad men phaink diya hai, aur dekhnay men main khaak aur mittee hee ban gaya hoon. 20main tujhay pukaarta, lekin too javaab naheen deta. main khada ho jaata, lekin too mujhay ghoorta hee raheta hai. 21too meray saath apna sulook badal kar mujh par zulm karnay laga, apnay haath kay pooray zor say mujhay sataanay laga hai. 22too mujhay uda kar hava par savaar honay deta, garajtay toofaan men ghulnay deta hai. 23haan, ab main jaanta hoon ki too mujhay maut kay havaalay karega, us ghar men pahunchaaega jahaan ek din tamaam jaandaar jama ho jaatay hain.
24yaqeenan main nay kabhee bhee apna haath kisee zarooratmand kay khilaaf naheen uthaaya jab us nay apnee museebat men aavaaz dee. 25balki jab kisee ka bura haal tha to main hamdardee say ronay laga, ghareebon kee haalat dekh kar mera dil gham khaanay laga. 26taaham mujh par museebat aaee, agarchi main bhalaaee kee ummeed rakh sakta tha. mujh par ghana andhera chha gaya, haalaanki main raushnee kee tavaqqo kar sakta tha. 27meray andar sab kuchh muztarib hai aur kabhee aaraam naheen kar sakta, mera vaasta takleefdih dinon say padta hai. 28main maatmee libaas men phirta hoon aur koee mujhay tasallee naheen deta, haalaanki main jamaaat men khaday ho kar madad kay liyay aavaaz deta hoon. 29main geeddon ka bhaaee aur uqaabee ullooon ka saathee ban gaya hoon. 30meree jild kaalee ho gaee, meree haddiyaan taptee garmee kay sabab say jhulas gaee hain. 31ab mera sarod sirf maatam karnay aur meree baansree sirf ronay vaalon kay liyay istemaal hotee hai.