Ayyoob 31
meree aakhiree baat : main begunaah hoon
1main nay apnee aankhon say ahd baandha hai. to phir main kis tarah kisee kunvaaree par nazar daal sakta hoon? 2kyoonki insaan ko aasmaan par rahenay vaalay khuda kee taraf say kya naseeb hai, usay bulandiyon par basnay vaalay qaadir-ay-mutlaq say kya viraasat paana hai? 3kya aisa naheen hai ki naaraast shakhs kay liyay aafat aur badkaar kay liyay tabaahee muqarrar hai? 4meree raahen to allaah ko nazar aatee hain, vah mera har qadam gin leta hai.
5na main kabhee dhokay say chala, na meray paaon nay kabhee fareb denay kay liyay phurtee kee. agar is men zara bhee shak ho 6to allaah mujhay insaaf kay taraazoo men tol lay, allaah meree beilzaam haalat maaloom karay. 7agar meray qadam saheeh raah say hat gaay, meree aankhen meray dil ko ghalat raah par lay gaeen ya meray haath daaghdaar hue 8to phir jo beej main nay boya us kee paidaavaar koee aur khaaay, jo faslen main nay lagaaeen unhen ukhaada jaaay.
9agar mera dil kisee aurat say naajaaiz taalluqaat rakhnay par uksaaya gaya aur main is maqsad say apnay padosee kay darvaazay par taak lagaaay baithaa 10to phir allaah karay ki meree beevee kisee aur aadmee kee gandum peesay, ki koee aur us par jhuk jaaay. 11kyoonki aisee harkat sharmanaak hotee, aisa jurm saza kay laaiq hota hai. 12aisay gunaah kee aag paataal tak sab kuchh bhasm kar detee hai. agar vah mujh say sarzad hota to meree tamaam fasal jadon tak raakh kar deta.
13agar mera naukar-naukraaniyon kay saath jhagda tha aur main nay un ka haq maaraa 14to main kya karoon jab allaah adaalat men khada ho jaaay? jab vah meree poochhgichh karay to main usay kya javaab doon? 15kyoonki jis nay mujhay meree maan kay pet men banaaya us nay unhen bhee banaaya. ek hee nay unhen bhee aur mujhay bhee rahem men tashkeel diya.
16kya main nay pastahaalon kee zarooriyaat pooree karnay say inkaar kiya ya beva kee aankhon ko bujhnay diya? hargiz naheen! 17kya main nay apnee rotee akelay hee khaaee aur yateem ko us men shareek na kiya? 18hargiz naheen, balki apnee javaanee say lay kar main nay us ka baap ban kar us kee parvarish kee, apnee paidaaish say hee beva kee raahanumaaee kee. 19jab kabhee main nay dekha ki koee kapdon kee kamee kay baais halaak ho raha hai, ki kisee ghareeb kay paas kambal tak naheen 20to main nay usay apnee bhedon kee kuchh oon dee taaki vah garm ho sakay. aisay log mujhay dua detay thay. 21main nay kabhee bhee yateemon kay khilaaf haath naheen uthaaya, us vaqt bhee naheen jab shaher kay darvaazay men baithay buzurg meray haq men thay. 22agar aisa na tha to allaah karay ki mera shaana kandhay say nikal kar gir jaaay, ki mera baazoo jod say phaada jaaay! 23aisee harkaten meray liyay naamumkin theen, kyoonki agar main aisa karta to main allaah say dahshat khaata raheta, main us say dar kay maaray qaaim na rah sakta.
24kya main nay sonay par apna poora bharosa rakha ya khaalis sonay say kaha, ‘tujh par hee mera etimaad hai’? hargiz naheen! 25kya main is liyay khush tha ki meree daulat ziyaada hai aur meray haath nay bahut kuchh haasil kiya hai? hargiz naheen! 26kya sooraj kee chamak-damak aur chaand kee purvaqaar ravish dekh kar 27meray dil ko kabhee chupkay say ghalat raah par laaya gaya? kya main nay kabhee un ka ehatiraam kiya? [a] lafzee tarjuma : haath say unhen bosa diya. 28hargiz naheen, kyoonki yah bhee saza kay laaiq jurm hai. agar main aisa karta to bulandiyon par rahenay vaalay khuda ka inkaar karta.
29kya main kabhee khush hua jab mujh say nafrat karnay vaala tabaah hua? kya main baagh baagh hua jab us par museebat aaee? hargiz naheen! 30main nay apnay munh ko ijaazat na dee ki gunaah karkay us kee jaan par laanat bhejay. 31balki meray khaimay kay aadmiyon ko tasleem karna pada, ‘koee naheen hai jo ayyoob kay gosht say ser na hua.’ 32ajnabee ko baahar galee men raat guzaarnee naheen padtee thee balki mera darvaaza musaafiron kay liyay khula raheta tha. 33kya main nay kabhee aadam kee tarah apna gunaah chhupa kar apna qusoor dil men posheeda rakha, 34is liyay ki hujoom say darta aur apnay rishtedaaron say dahshat khaata tha? hargiz naheen! main nay kabhee bhee aisa kaam na kiya jis kay baais mujhay dar kay maaray chup rahena padta aur ghar say nikal naheen sakta tha.
35kaash koee meree sunay! dekho, yahaan meree baat par meray dastakhat hain, ab qaadir-ay-mutlaq mujhay javaab day. kaash meray mukhaalif likh kar mujhay vah ilzaamaat bataaen jo unhon nay mujh par lagaaay hain! 36agar ilzaamaat ka kaaghaz milta to main usay utha kar apnay kandhay par rakhta, usay pagdee kee tarah apnay sar par baandh leta. 37main allaah ko apnay qadmon ka poora hisaab-kitaab day kar raees kee tarah us kay qareeb pahunchta.
38kya meree zameen nay madad kay liyay pukaar kar mujh par ilzaam lagaaya hai? kya us kee reghaarayaan meray sabab say mil kar ro padee hain? 39kya main nay us kee paidaavaar ajr diay baghair khaaee, us par mehanat-mashaqqat karnay vaalon kay liyay aahen bharnay ka baais ban gaya? hargiz naheen! 40agar main is men qusoorvaar thaheroon to gandum kay bajaay khaardaar jhaadiyaan aur jau kay bajaay dhatooraa [b] ek badaboodaar pauda. ugay.” yoon ayyoob kee baaten ikhtitaam ko pahunch gaeen.