Ayyoob 32
chauthay saathee ileehoo kee taqreer
1tab mazkoora teenon aadmee ayyoob ko javaab denay say baaz aaay, kyoonki vah ab tak samajhta tha ki main raastbaaz hoon. 2yah dekh kar ileehoo bin barkel ghussay ho gaya. booz shaher kay rahenay vaalay is aadmee ka khaandaan raam tha. ek taraf to vah ayyoob say khafa tha, kyoonki yah apnay aap ko allaah kay saamnay raastbaaz thaheraata tha. 3doosree taraf vah teenon doston say bhee naaraaz tha, kyoonki na vah ayyoob ko saheeh javaab day sakay, na saabit kar sakay ki mujrim hai. 4ileehoo nay ab tak ayyoob say baat naheen kee thee. jab tak doosron nay baat pooree naheen kee thee vah khaamosh raha, kyoonki vah buzurg thay. 5lekin ab jab us nay dekha ki teenon aadmee mazeed koee javaab naheen day saktay to vah bhadak uthaa 6aur javaab men kaha,
“main kamaumr hoon jabki aap sab umrraseeda hain, is liyay main kuchh sharmeela tha, main aap ko apnee raay bataanay say darta tha. 7main nay socha, chalo vah bolen jin kay ziyaada din guzray hain, vah taaleem den jinhen mut’addid saalon ka tajriba haasil hai.
8lekin jo rooh insaan men hai yaanee jo dam qaadir-ay-mutlaq nay us men phoonk diya vahee insaan ko samajh ata karta hai. 9na sirf boodhay log daanishmand hain, na sirf vah insaaf samajhtay hain jin kay baal safed hain. 10chunaanchay main guzaarish karta hoon ki zara meree baat sunen, mujhay bhee apnee raay pesh karnay deejiay.
11main aap kay alfaaz kay intizaar men raha. jab aap mauzoon javaab talaash kar rahay thay to main aap kee daanishmand baaton par ghaur karta raha. 12main nay aap par pooree tavajjuh dee, lekin aap men say koee ayyoob ko ghalat saabit na kar saka, koee us kay dalaail ka munaasib javaab na day paaya. 13ab aisa na ho ki aap kahen, ‘ham nay ayyoob men hikmat paaee hai, insaan usay shikast day kar bhaga naheen sakta balki sirf allaah hee.’ 14kyoonki ayyoob nay apnay dalaail kee tarteeb say mera muqaabla naheen kiya, aur jab main javaab doonga to aap kee baaten naheen duharaaoonga.
15aap ghabra kar javaab denay say baaz aaay hain, ab aap kuchh naheen kah saktay. 16kya main mazeed intizaar karoon, go aap khaamosh ho gaay hain, aap ruk kar mazeed javaab naheen day saktay? 17main bhee javaab denay men hissa lena chaahata hoon, main bhee apnee raay pesh karoonga. 18kyoonki meray andar say alfaaz chhalak rahay hain, meree rooh meray andar mujhay majboor kar rahee hai.
19haqeeqat men main andar say us naee mai kee maanind hoon jo band rakhee gaee ho, main naee mai say bharee huee naee mashkon kee tarah phatnay ko hoon. 20mujhay bolna hai taaki aaraam paaoon, laazim hee hai ki main apnay honton ko khol kar javaab doon. 21yaqeenan na main kisee kee jaanibdaaree, na kisee kee chaaploosee karoonga. 22kyoonki main khushaamad kar hee naheen sakta, varna mera khaaliq mujhay jald hee uda lay jaaega.