Ayyoob 34

allaah har ek ko munaasib ajr deta hai

¹phir ileehoo nay baat jaaree rakh kar kaha,

²“ai daanishmando, meray alfaaz sunen! ai aalimo, mujh par kaan dharen! ³kyoonki kaan yoon alfaaz kee jaanch-padtaal karta hai jis tarah zabaan khuraak ko chakh letee hai. ⁴aaen, ham apnay liyay vah kuchh chun len jo durust hai, aapas men jaan len ki kya kuchh achchha hai. ⁵ayyoob nay kaha hai, ‘go main begunaah hoon to bhee allaah nay mujhay meray huqooq say maheroom kar rakha hai. ⁶jo faisla meray baaray men kiya gaya hai usay main jhoot qaraar deta hoon. go main bequsoor hoon to bhee teer nay mujhay yoon zakhmee kar diya ki us ka ilaaj mumkin hee naheen.’ ⁷ab mujhay bataaen, kya koee ayyoob jaisa bura hai? vah to kufr kee baaten paanee kee tarah peetay, ⁸badkaaron kee sohbat men chaltay aur bedeenon kay saath apna vaqt guzaartay hain. ⁹kyoonki vah daava kartay hain ki allaah say lutf’andoz hona insaan kay liyay befaaida hai.

¹⁰chunaanchay ai samajhdaar mardo, meree baat sunen! yah kaisay ho sakta hai ki allaah shareer kaam karay? yah to mumkin hee naheen ki qaadir-ay-mutlaq naainsaafee karay. ¹¹yaqeenan vah insaan ko us kay aamaal ka munaasib ajr day kar us par vah kuchh laata hai jis ka taqaaza us ka chaal-chalan karta hai. ¹²yaqeenan allaah bedeen harkaten naheen karta, qaadir-ay-mutlaq insaaf ka khoon naheen karta. ¹³kis nay zameen ko allaah kay havaalay kiya? kis nay usay pooree duniya par ikhtiyaar diya? koee naheen! ¹⁴agar vah kabhee iraada karay ki apnee rooh aur apna dam insaan say vaapas le ¹⁵to tamaam log dam chhod kar dubaara khaak ho jaaengay.

¹⁶ai ayyoob, agar aap ko samajh hai to sunen, meree baaton par dhyaan den. ¹⁷jo insaaf say nafrat karay kya vah hukoomat kar sakta hai? kya aap usay mujrim thaheraana chaahatay hain jo raastbaaz aur qaadir-ay-mutlaq hai, ¹⁸jo baadshaah say kah sakta hai, ‘ai badam’aash!’ aur shurfa say, ‘ai bedeeno!’? ¹⁹vah to na raeeson kee jaanibdaaree karta, na uhdedaaron ko pastahaalon par tarjeeh deta hai, kyoonki sab hee ko us kay haathon nay banaaya hai. ²⁰vah pal bhar men, aadhee raat hee mar jaatay hain. shurfa ko hilaaya jaata hai to vah kooch kar jaatay hain, taaqatavaron ko baghair kisee tag-o-dau kay hataaya jaata hai.

²¹kyoonki allaah kee aankhen insaan kee raahon par lagee rahetee hain, aadamzaad ka har qadam usay nazar aata hai. ²²kaheen itnee taareekee ya ghana andhera naheen hota ki badkaar us men chhup sakay. ²³aur allaah kisee bhee insaan ko us vaqt say aagaah naheen karta jab usay ilaahee takht-ay-adaalat kay saamnay aana hai. ²⁴usay tahqeeqaat kee zaroorat hee naheen balki vah zoraavaron ko paash paash karkay doosron ko un kee jagah khada kar deta hai. ²⁵vah to un kee harkaton say vaaqif hai aur unhen raat kay vaqt yoon tah-o-baala kar sakta hai ki choor choor ho jaaen. ²⁶un kee bedeenee kay javaab men vah unhen sab kee nazron kay saamnay patakh deta hai. ²⁷us kee pairvee say hatnay aur us kee raahon ka lihaaz na karnay ka yahee nateeja hai. ²⁸kyoonki un kee harkaton kay baais pastahaalon kee cheekhen allaah kay saamnay aur museebatazadon kee iltijaaen us kay kaan tak pahuncheen. ²⁹lekin agar vah khaamosh bhee rahay to kaun usay mujrim qaraar day sakta hai? agar vah apnay chiharay ko chhupaaay rakhay to kaun usay dekh sakta hai? vah to qaum par balki har fard par hukoomat karta hai ³⁰taaki shareer hukoomat na karen aur qaum phans na jaaay.

³¹behatar hai ki aap allaah say kahen, ‘mujhay ghalat raah par laaya gaya hai, aainda main dubaara bura kaam naheen karoonga. ³²jo kuchh mujhay nazar naheen aata vah mujhay sikha, agar mujh say naainsaafee huee hai to aainda aisa naheen karoonga.’ ³³kya allaah ko aap ko vah ajr dena chaahiay jo aap kee nazar men munaasib hai, go aap nay usay radd kar diya hai? laazim hai ki aap khud hee faisla karen, na ki main. lekin zara vah kuchh pesh karen jo kuchh aap saheeh samajhtay hain. ³⁴samajhdaar log balki har daanishmand jo meree baat sunay faramaaega, ³⁵‘ayyoob ilm kay saath baat naheen kar raha, us kay alfaaz fahem say khaalee hain. ³⁶kaash ayyoob kee pooree jaanch-padtaal kee jaaay, kyoonki vah shareeron kay say javaab pesh karta, ³⁷vah apnay gunaah men izaafa karkay hamaaray roo-ba-roo apnay jurm par shak daalta aur allaah par mut’addid ilzaamaat lagaata hai’.”