Ayyoob 36

allaah kitna azeem hai

¹ileehoo nay apnee baat jaaree rakhee,

²“thodee der kay liyay sabr karkay mujhay is kee tashreeh karnay den, kyoonki mazeed bahut kuchh hai jo allaah kay haq men kahena hai. ³main door door tak phiroonga taaki vah ilm haasil karoon jis say meray khaaliq kee raastee saabit ho jaaay. ⁴yaqeenan jo kuchh main kahoonga vah farebdih naheen hoga. ek aisa aadmee aap kay saamnay khada hai jis nay khuloosdilee say apna ilm haasil kiya hai.

⁵go allaah azeem qudrat ka maalik hai taaham vah khuloosdilon ko radd naheen karta. ⁶vah bedeen ko ziyaada der tak jeenay naheen deta, lekin museebatazadon ka insaaf karta hai. ⁷vah apnee aankhon ko raastbaazon say naheen pherta balki unhen baadshaahon kay saath takhtnasheen karkay bulandiyon par sarfaraaz karta hai.

⁸phir agar unhen zanjeeron men jakda jaaay, unhen museebat kay rasson men giriftaar kiya jaae ⁹to vah un par zaahir karta hai ki un say kya kuchh sarzad hua hai, vah unhen un kay jaraaim pesh karkay unhen dikhaata hai ki un ka takabbur ka ravayya hai. ¹⁰vah un kay kaanon ko tarbiyat kay liyay khol kar unhen hukm deta hai ki apnee naainsaafee say baaz a kar vaapas aao. ¹¹agar vah maan kar us kee khidmat karnay lagen to phir vah jeetay jee apnay din khushhaalee men aur apnay saal sukoon say guzaarengay. ¹²lekin agar na maanen to unhen darya-ay-maut ko uboor karna padega, vah ilm say maheroom rah kar mar jaaengay.

¹³bedeen apnee harkaton say apnay aap par ilaahee ghazab laatay hain. allaah unhen baandh bhee lay, lekin vah madad kay liyay naheen pukaartay. ¹⁴javaanee men hee un kee jaan nikal jaatee, un kee zindagee muqaddas farishton kay haathon khatm ho jaatee hai. ¹⁵lekin allaah museebatzada ko us kee museebat kay zareeay najaat deta, us par honay vaalay zulm kee maarifat us ka kaan khol deta hai.

¹⁶vah aap ko bhee museebat kay munh say nikalnay kee targheeb dila kar ek aisee khulee jagah par laana chaahata hai jahaan rukaavat naheen hai, jahaan aap kee mez umda khaanon say bharee rahegee. ¹⁷lekin is vaqt aap adaalat ka vah piyaala pee kar ser ho gaay hain jo bedeenon kay naseeb men hai, is vaqt adaalat aur insaaf nay aap ko apnee sakht girift men lay liya hai. ¹⁸khabardaar ki yah baat aap ko kufr baknay par na uksaaay, aisa na ho ki taavaan kee badee raqam aap ko ghalat raah par lay jaaay. ¹⁹kya aap kee daulat aap ka difa karkay aap ko museebat say bachaaegee? ya kya aap kee sirtod koshishen yah sar’anjaam day saktee hain? hargiz naheen! ²⁰raat kee aarzoo na karen, us vaqt kee jab qaumen jahaan bhee hon nest-o-naabood ho jaatee hain. ²¹khabardaar rahen ki naainsaafee kee taraf rujoo na karen, kyoonki aap ko isee liyay museebat say aazmaaya ja raha hai.

²²allaah apnee qudrat men sarfaraaz hai. kaun us jaisa ustaad hai? ²³kis nay muqarrar kiya ki usay kis raah par chalna hai? kaun kah sakta hai, ‘too nay ghalat kaam kiya’? koee naheen! ²⁴us kay kaam kee tamjeed karna na bhoolen, us saaray kaam kee jis kee logon nay apnay geeton men hamd-o-sana kee hai. ²⁵har shakhs nay yah kaam dekh liya, insaan nay door door say us ka mulaahaza kiya hai.

²⁶allaah azeem hai aur ham usay naheen jaantay, us kay saalon kee taadaad maaloom naheen kar saktay. ²⁷kyoonki vah paanee kay qatray oopar khainch kar dhund say baarish nikaal leta hai, ²⁸vah baarish jo baadal zameen par barsa detay aur jis kee bauchhaaden insaan par padtee hain. ²⁹kaun samajh sakta hai ki baadal kis tarah chha jaatay, ki allaah kay maskan say bijliyaan kis tarah kadaktee hain? ³⁰vah apnay ird-gird raushnee phaila kar samundar kee jadon tak sab kuchh raushan karta hai. ³¹yoon vah baadlon say qaumon kee parvarish karta, unhen kasrat kee khuraak muhayya karta hai. ³²vah apnee mutthiyon ko baadal kee bijliyon say bhar kar hukm deta hai ki kya cheez apna nishaana banaaen. ³³us kay baadlon kee garajtee aavaaz us kay ghazab ka elaan kartee, naainsaafee par us kay shadeed qaher ko zaahir kartee hai.