Ayyoob 38
allaah ka javaab
1phir allaah khud ayyoob say hamkalaam hua. toofaan men say us nay usay javaab diya,
2“yah kaun hai jo samajh say khaalee baaten karnay say meray mansoobay kay saheeh matlab par parda daalta hai? 3mard kee tarah kamarbasta ho ja! main tujh say savaal karta hoon, aur too mujhay taaleem day.
4too kahaan tha jab main nay zameen kee bunyaad rakhee? agar tujhay is ka ilm ho to mujhay bata! 5kis nay us kee lambaaee aur chaudaaee muqarrar kee? kya tujhay maaloom hai? kis nay naap kar us kee paimaaish kee? 6us kay satoon kis cheez par lagaaay gaay? kis nay us kay konay ka bunyaadee patthar rakha, 7us vaqt jab subah kay sitaaray mil kar shaadiyaana baja rahay, tamaam farishtay khushee kay naaray laga rahay thay?
8jab samundar rahem say phoot nikla to kis nay darvaazay band karkay us par qaaboo paaya? 9us vaqt main nay baadlon ko us ka libaas banaaya aur usay ghanay andheray men yoon lapeta jis tarah nauzaad ko potdon men lapeta jaata hai. 10us kee hudood muqarrar karkay main nay usay roknay kay darvaazay aur kunday lagaaay. 11main bola, ‘tujhay yahaan tak aana hai, is say aagay na badhna, teree robdaar laheron ko yaheen rukna hai.’
12kya too nay kabhee subah ko hukm diya ya usay tuloo honay kee jagah dikhaaee 13taaki vah zameen kay kinaaron ko pakad kar bedeenon ko us say jhaad day? 14us kee raushnee men zameen yoon tashkeel paatee hai jis tarah mittee jis par muhar lagaaee jaaay. sab kuchh rangdaar libaas pahenay nazar aata hai. 15tab bedeenon kee raushnee rokee jaatee, un ka uthaaya hua baazoo toda jaata hai.
16kya too samundar kay sarchashmon tak pahunch kar us kee gaheraaiyon men say guzra hai? 17kya maut kay darvaazay tujh par zaahir huay, tujhay ghanay andheray kay darvaazay nazar aaay hain? 18kya tujhay zameen kay vasee maidaanon kee pooree samajh aaee hai? mujhay bata agar yah sab kuchh jaanta hai!
19raushnee kay mamba tak lay jaanay vaala raasta kahaan hai? andheray kee rihaaishgaah kahaan hai? 20kya too unhen un kay maqaamon tak pahuncha sakta hai? kya too un kay gharon tak lay jaanay vaalee raahon say vaaqif hai? 21beshak too is ka ilm rakhta hai, kyoonki too us vaqt janm lay chuka tha jab yah paida huay. too to qadeem zamaanay say hee zinda hai!
22kya too vahaan tak pahunch gaya hai jahaan barf kay zakheeray jama hotay hain? kya too nay olon kay godaamon ko dekh liya hai? 23main unhen museebat kay vaqt kay liyay mahfooz rakhta hoon, aisay dinon kay liyay jab ladaaee aur jang chhid jaaay. 24mujhay bata, us jagah tak kis tarah pahunchna hai jahaan raushnee taqseem hotee hai, ya us jagah jahaan say mashriqee hava nikal kar zameen par bikhar jaatee hai?
25kis nay mooslaadhaar baarish kay liyay raasta aur garajtay toofaan kay liyay raah banaaee 26taaki insaan say khaalee zameen aur ghair’aabaad registaan kee aabpaashee ho jaaay, 27taaki veeraan-o-sunsaan biyaabaan kee piyaas bujh jaaay aur us say hariyaalee phoot niklay? 28kya baarish ka baap hai? kaun shabnam kay qatron ka vaalid hai?
29barf kis maan kay pet say paida huee? jo paala aasmaan say a kar zameen par padta hai kis nay usay janm diya? 30jab paanee patthar kee tarah sakht ho jaaay balki gaheray samundar kee satah bhee jam jaaay to kaun yah sar’anjaam deta hai? 31kya too khosha-ay-parveen ko baandh sakta ya jauzay kee zanjeeron ko khol sakta hai? 32kya too karva sakta hai ki sitaaron kay mukhtalif jhurmat un kay muqarrara auqaat kay mutaabiq nikal aaen? kya too dubb-ay-akbar kee us kay bachchon samet qiyaadat karnay kay qaabil hai? 33kya too aasmaan kay qavaaneen jaanta ya us kee zameen par hukoomat mut’ayyin karta hai?
34kya jab too buland aavaaz say baadlon ko hukm day to vah tujh par mooslaadhaar baarish barsaatay hain? 35kya too baadal kee bijlee zameen par bhej sakta hai? kya vah teray paas a kar kahetee hai, ‘main khidmat kay liyay haazir hoon’? 36kis nay misr kay laqlaq ko hikmat dee, murgh ko samajh ata kee? 37kis ko itnee daanaaee haasil hai ki vah baadlon ko gin sakay? kaun aasmaan kay in ghadon ko us vaqt undel sakta hai 38jab mittee dhaalay huay lohay kee tarah sakht ho jaaay aur dhelay ek doosray kay saath chipak jaaen? koee naheen!
39kya too hee shernee kay liyay shikaar karta ya sheron ko ser karta hai 40jab vah apnee chhupnay kee jagahon men dabak jaaen ya gunjaan jangal men kaheen taak lagaaay baithay hon? 41kaun kavvay ko khuraak muhayya karta hai jab us kay bachchay bhook kay baais allaah ko aavaaz den aur maaray maaray phiren