Ayyoob 39

¹kya tujhay maaloom hai ki pahaadee bakriyon kay bachchay kab paida hotay hain? jab hirnee apna bachcha janm detee hai to kya too is ko mulaahaza karta hai? ²kya too vah maheenay ginta raheta hai jab bachchay hirniyon kay pet men hon? kya too jaanta hai ki kis vaqt bachchay janm detee hain? ³us din vah dabak jaatee, bachchay nikal aatay aur dard-ay-zah khatm ho jaata hai. ⁴un kay bachchay taaqatvar ho kar khulay maidaan men phaltay phooltay, phir ek din chalay jaatay hain aur apnee maan kay paas vaapas naheen aatay.

⁵kis nay janglee gadhay ko khula chhod diya? kis nay us kay rassay khol diay? ⁶main hee nay biyaabaan us ka ghar bana diya, main hee nay muqarrar kiya ki banjar zameen us kee rihaaishgaah ho. ⁷vah shaher ka shor-sharaaba dekh kar hans uthta, aur usay haanknay vaalay kee aavaaz sunnee naheen padtee. ⁸vah charnay kay liyay pahaadee ilaaqay men idhar udhar ghoomta aur hariyaalee ka khoj lagaata raheta hai.

⁹kya janglee bail teree khidmat karnay kay liyay tayyaar hoga? kya vah kabhee raat ko teree charnee kay paas guzaarega? ¹⁰kya too usay baandh kar hal chala sakta hai? kya vah vaadee men teray peechhay chal kar suhaaga pherega? ¹¹kya too us kee badee taaqat dekh kar us par etimaad karega? kya too apna sakht kaam us kay sapurd karega? ¹²kya too bharosa kar sakta hai ki vah tera anaaj jama karkay gaahanay kee jagah par lay aaay? hargiz naheen!

¹³shuturamurgh khushee say apnay paron ko phadphadaata hai. lekin kya us ka shaahapar laqlaq ya baaz kay shaahapar kee maanind hai? ¹⁴vah to apnay anday zameen par akelay chhodta hai, aur vah mittee hee par paktay hain. ¹⁵shuturamurgh ko khayaal tak naheen aata ki koee unhen paaon talay kuchal sakta ya koee janglee jaanvar unhen raund sakta hai. ¹⁶lagta naheen ki us kay apnay bachchay hain, kyoonki us ka un kay saath sulook itna sakht hai. agar us kee mehanat naakaam niklay to usay parva hee naheen, ¹⁷kyoonki allaah nay usay hikmat say maheroom rakh kar usay samajh say na navaaza. ¹⁸to bhee vah itnee tezee say uchhal kar bhaag jaata hai ki ghoday aur ghudsavaar kee daud dekh kar hansnay lagta hai.

¹⁹kya too ghoday ko us kee taaqat day kar us kee gardan ko ayaal say aaraasta karta hai? ²⁰kya too hee usay tiddee kee tarah phalaangnay deta hai? jab vah zor say apnay nathnon ko phula kar aavaaz nikaalta hai to kitna robdaar lagta hai! ²¹vah vaadee men sum maar maar kar apnee taaqat kee khushee manaata, phir bhaag kar maidaan-ay-jang men a jaata hai. ²²vah khauf ka mazaaq udaata aur kisee say bhee naheen darta, talvaar kay roo-ba-roo bhee peechhay naheen hatta. ²³us kay oopar tarkash khadkhadaata, neza aur shamsheer chamaktee hai. ²⁴vah bada shor macha kar itnee tezee aur josh-o-khurosh say dushman par hamla karta hai ki bigal bajtay vaqt bhee roka naheen jaata. ²⁵jab bhee bigal bajay vah zor say hinahinaata aur door hee say maidaan-ay-jang, kamaandaron ka shor aur jang kay naaray soongh leta hai.

²⁶kya baaz teree hee hikmat kay zareeay hava men ud kar apnay paron ko junoob kee jaanib phaila deta hai? ²⁷kya uqaab teray hee hukm par bulandiyon par mandalaata aur oonchee oonchee jagahon par apna ghonsla bana leta hai? ²⁸vah chataan par raheta, us kay tootay-phootay kinaaron aur qil’aaband jagahon par basera karta hai. ²⁹vahaan say vah apnay shikaar ka khoj lagaata hai, us kee aankhen door door tak dekhtee hain. ³⁰us kay bachchay khoon kay laalach men rahetay, aur jahaan bhee laash ho vahaan vah haazir hota hai.”