Ayyoob 4

ileefaz ka etiraaz : insaan allaah kay huzoor raast naheen thaher saktaa

¹yah kuchh sun kar ileefaz temaanee nay javaab diya,

²“kya tujh say baat karnay ka koee faaida hai? too to yah bardaasht naheen kar sakta. lekin doosree taraf kaun apnay alfaaz rok sakta hai? ³zara soch lay, too nay khud bahuton ko tarbiyat dee, kaee logon kay thakemaanday haathon ko taqviyat dee hai. ⁴teray alfaaz nay thokar khaanay vaalay ko dubaara khada kiya, dagmagaatay huay ghutnay too nay mazboot kiay. ⁵lekin ab jab museebat tujh par a gaee to too usay bardaasht naheen kar sakta, ab jab khud us kee zad men a gaya to teray rongtay khaday ho gaay hain. ⁶kya tera etimaad is par munhasir naheen hai ki too allaah ka khauf maanay, teree ummeed is par naheen ki too beilzaam raahon par chalay?

⁷soch lay, kya kabhee koee begunaah halaak hua hai? hargiz naheen! jo seedhee raah par chaltay hain vah kabhee roo-ay-zameen par say mit naheen gaay. ⁸jahaan tak main nay dekha, jo naainsaafee ka hal chalaaay aur nuqsaan ka beej boay vah is kee fasal kaatta hai. ⁹aisay log allaah kee ek phoonk say tabaah, us kay qaher kay ek jhonkay say halaak ho jaatay hain. ¹⁰sherbabar kee dahaaden khaamosh ho gaeen, javaan sher kay daant jhad gaay hain. ¹¹shikaar na milnay kee vajah say sher halaak ho jaata aur shernee kay bachchay paraaganda ho jaatay hain.

¹²ek baar ek baat choree-chhupay meray paas pahunchee, us kay chand alfaaz meray kaan tak pahunch gaay. ¹³raat ko aisee royaaen pesh aaeen jo us vaqt dekhee jaatee hain jab insaan gaheree neend soya hota hai. in say main pareshaanakun khayaalaat men mubtala hua. ¹⁴mujh par dahshat aur tharatharaahat ghaalib aaee, meree tamaam haddiyaan laraz utheen. ¹⁵phir meray chiharay kay saamnay say hava ka jhonka guzar gaya aur meray tamaam rongtay khaday ho gaay. ¹⁶ek hastee meray saamnay khadee huee jisay main pahechaan na saka, ek shakl meree aankhon kay saamnay dikhaaee dee. vah khaamoshee thee, phir ek aavaaz nay farmaaya, ¹⁷‘kya insaan allaah kay huzoor raastbaaz thaher sakta hai, kya insaan apnay khaaliq kay saamnay paak-saaf thaher sakta hai?’ ¹⁸dekh, allaah apnay khaadimon par bharosa naheen karta, apnay farishton ko vah ahemaq thaheraata hai. ¹⁹to phir vah insaan par kyoon bharosa rakhay jo mittee kay ghar men raheta, aisay makaan men jis kee bunyaad khaak par hee rakhee gaee hai. usay patangay kee tarah kuchla jaata hai. ²⁰subah ko vah zinda hai lekin shaam tak paash paash ho jaata, abad tak halaak ho jaata hai, aur koee bhee dhyaan naheen deta. ²¹us kay khaimay kay rassay dheelay karo to vah hikmat haasil kiay baghair intiqaal kar jaata hai.