Ayyoob 40
ayyoob rabb ko javaab naheen day saktaa
1rabb nay ayyoob say poochha,
2“kya malaamat karnay vaala adaalat men qaadir-ay-mutlaq say jhagadna chaahata hai? allaah kee sarzanish karnay vaala usay javaab day!”
3tab ayyoob nay javaab day kar rabb say kaha,
4“main to naalaaiq hoon, main kis tarah tujhay javaab doon? main apnay munh par haath rakh kar khaamosh rahoonga. 5ek baar main nay baat kee aur is kay baad mazeed ek dafa, lekin ab say main javaab men kuchh naheen kahoonga.”
allaah ka javaab : kya tujhay meree jaisee qudrat haasil hai?
6tab allaah toofaan men say ayyoob say hamkalaam hua,
7“mard kee tarah kamarbasta ho ja! main tujh say savaal karoon aur too mujhay taaleem day. 8kya too vaaqaee mera insaaf mansookh karkay mujhay mujrim thaheraana chaahata hai taaki khud raastbaaz thaheray? 9kya tera baazoo allaah kay baazoo jaisa zoraavar hai? kya teree aavaaz us kee aavaaz kee tarah kadaktee hai. 10a, apnay aap ko shaan-o-shaukat say aaraasta kar, izzat-o-jalaal say mulabbas ho ja! 11ba-yak-vaqt apna shadeed qaher mukhtalif jagahon par naazil kar, har maghroor ko apna nishaana bana kar usay khaak men mila day. 12har mutakabbir par ghaur karkay usay past kar. jahaan bhee bedeen ho vaheen usay kuchal day. 13un sab ko mittee men chhupa day, unhen rasson men jakad kar kisee khufiya jagah giriftaar kar. 14tab hee main teree taareef karkay maan jaaoonga ki tera dahena haath tujhay najaat day sakta hai.
allaah kee qudrat aur hikmat kee do misaalen
15bahemot [a] saaeensadaan muttafiq naheen ki yah kaun sa jaanvar tha. par ghaur kar jisay main nay tujhay khalaq kartay vaqt banaaya aur jo bail kee tarah ghaas khaata hai. 16us kee kamar men kitnee taaqat, us kay pet kay patthon men kitnee quvvat hai. 17vah apnee dum ko deodaar kay darakht kee tarah lataknay deta hai, us kee raanon kee nasen mazbootee say ek doosree say judee huee hain. 18us kee haddiyaan peetal kay say paaip, lohay kay say sareeay hain. 19vah allaah kay kaamon men say avval hai, us kay khaaliq hee nay usay us kee talvaar dee. 20pahaadiyaan usay apnee paidaavaar pesh kartee, khulay maidaan kay tamaam jaanvar vahaan kheltay koodtay hain. 21vah kaantedaar jhaadiyon kay neechay aaraam karta, sarkandon aur daldal men chhupa raheta hai. 22khaardaar jhaadiyaan us par saaya daaltee aur nadee kay safeda kay darakht usay gheray rakhtay hain. 23jab darya sailaab kee soorat ikhtiyaar karay to vah naheen bhaagta. go darya-ay-yardan us kay munh par phoot paday to bhee vah apnay aap ko mahfooz samajhta hai. 24kya koee us kee aankhon men ungaliyaan daal kar usay pakad sakta hai? agar usay phanday men pakda bhee jaaay to kya koee us kee naak ko chhed sakta hai? hargiz naheen