Ayyoob 42

ayyoob kee aakhiree baat

¹tab ayyoob nay javaab men rabb say kaha,

²“main nay jaan liya hai ki too sab kuchh kar paata hai, ki tera koee bhee mansooba roka naheen ja sakta. ³too nay farmaaya, ‘yah kaun hai jo samajh say khaalee baaten karnay say meray mansoobay kay saheeh matlab par parda daalta hai?’ yaqeenan main nay aisee baaten bayaan keen jo meree samajh say baahar hain, aisee baaten jo itnee anokhee hain ki main un ka ilm rakh hee naheen sakta. ⁴too nay farmaaya, ‘sun meree baat to main boloonga. main tujh say savaal karta hoon, aur too mujhay taaleem day.’ ⁵pahelay main nay teray baaray men sirf suna tha, lekin ab meree apnee aankhon nay tujhay dekha hai. ⁶is liyay main apnee baaten mustarad karta, apnay aap par khaak aur raakh daal kar tauba karta hoon.”

ayyoob apnay doston kee shafaaat karta hai

⁷ayyoob say yah tamaam baaten kahenay kay baad rabb ileefaz temaanee say hamkalaam hua, “main tujh say aur teray do doston say ghussay hoon, kyoonki go meray banday ayyoob nay meray baaray men durust baaten keen magar tum nay aisa naheen kiya. ⁸chunaanchay ab saat javaan bail aur saat mendhay lay kar meray banday ayyoob kay paas jaao aur apnee khaatir bhasm honay vaalee qurbaanee pesh karo. laazim hai ki ayyoob tumhaaree shafaaat karay, varna main tumhen tumhaaree hamaaqat ka poora ajr doonga. lekin us kee shafaaat par main tumhen muaaf karoonga, kyoonki meray banday ayyoob nay meray baaray men vah kuchh bayaan kiya jo saheeh hai jabki tum nay aisa naheen kiya.”

⁹ileefaz temaanee, bildad sookhee aur zoofar naamaatee nay vah kuchh kiya jo rabb nay unhen karnay ko kaha tha to rabb nay ayyoob kee sunee.

¹⁰aur jab ayyoob nay doston kee shafaaat kee to rabb nay usay itnee barkat dee ki aakhirkaar usay pahelay kee nisbat dugnee daulat haasil huee. ¹¹tab us kay tamaam bhaaee-bahenen aur puraanay jaannay vaalay us kay paas aaay aur ghar men us kay saath khaana kha kar us aafat par afsos kiya jo rabb ayyoob par laaya tha. har ek nay usay tasallee day kar usay ek sikka aur sonay ka ek chhalla day diya.

¹²ab say rabb nay ayyoob ko pahelay kee nisbat kaheen ziyaada barkat dee. usay 14,000 bakriyaan, 6,000 oont, bailon kee 1,000 jodiyaan aur 1,000 gadhiyaan haasil hueen. ¹³neez, us kay mazeed saat betay aur teen betiyaan paida hueen. ¹⁴us nay betiyon kay yah naam rakhay : pahelee ka naam yameema, doosree ka qaseeah aur teesree ka qaran-happook. ¹⁵tamaam mulk men ayyoob kee betiyon jaisee khoobsoorat khavaateen paaee naheen jaatee theen. ayyoob nay unhen bhee meeraas men milkiyat dee, aisee milkiyat jo un kay bhaaiyon kay darmiyaan hee thee.

¹⁶ayyoob mazeed 140 saal zinda raha, is liyay vah apnee aulaad ko chauthee pusht tak dekh saka. ¹⁷phir vah daraaz zindagee say aasooda ho kar intiqaal kar gaya.