Ayyoob 5

allaah kee taadeeb tasleem kar

¹beshak aavaaz day, lekin kaun javaab dega? koee naheen! muqaddaseen men say too kis kee taraf rujoo kar sakta hai? ²kyoonki ahemaq kee ranjeedgee usay maar daaltee, saadaalauh kee sargarmee usay maut kay ghaat utaar detee hai. ³main nay khud ek ahemaq ko jad pakadtay dekha, lekin main nay fauran hee us kay ghar par laanat bhejee. ⁴us kay farzand najaat say door rahetay. unhen shaher kay darvaazay men raunda jaata hai, aur bachaanay vaala koee naheen. ⁵bhookay us kee fasal kha jaatay, kaantedaar baadon men mahfooz maal bhee chheen letay hain. piyaasay afraad haamptay huay us kee daulat kay peechhay pad jaatay hain. ⁶kyoonki buraaee khaak say naheen nikaltee aur dukh-dard mittee say naheen phoottaa ⁷balki insaan khud is ka baais hai, dukh-dard us kee viraasat men hee paaya jaata hai. yah itna yaqeenee hai jitna yah ki aag kee chingaariyaan oopar kee taraf udtee hain.

⁸lekin agar main teree jagah hota to allaah say darayaaft karta, usay hee apna muaamala pesh karta. ⁹vahee itnay azeem kaam karta hai ki koee un kee tah tak naheen pahunch sakta, itnay mojizay ki koee unhen gin naheen sakta. ¹⁰vahee roo-ay-zameen ko baarish ata karta, khulay maidaan par paanee barsa deta hai. ¹¹pastahaalon ko vah sarfaraaz karta aur maatam karnay vaalon ko utha kar mahfooz maqaam par rakh deta hai. ¹²vah chaalaakon kay mansoobay tod deta hai taaki un kay haath naakaam rahen. ¹³vah daanishmandon ko un kee apnee chaalaakee kay phanday men phansa deta hai to hoshyaaron kee saazishen achaanak hee khatm ho jaatee hain. ¹⁴din kay vaqt un par andhera chha jaata, aur dopaher kay vaqt bhee vah tatol tatol kar phirtay hain. ¹⁵allaah zarooratmandon ko un kay munh kee talvaar aur zabardast kay qabzay say bacha leta hai. ¹⁶yoon pastahaalon ko ummeed dee jaatee aur naainsaafee ka munh band kiya jaata hai.

¹⁷mubaarak hai vah insaan jis kee malaamat allaah karta hai! chunaanchay qaadir-ay-mutlaq kee taadeeb ko haqeer na jaan. ¹⁸kyoonki vah zakhmee karta lekin marham-pattee bhee laga deta hai, vah zarb lagaata lekin apnay haathon say shifa bhee bakhshta hai. ¹⁹vah tujhay chhah museebaton say chhudaaega, aur agar is kay baad bhee koee aaay to tujhay nuqsaan naheen pahunchega. ²⁰agar kaal paday to vah fidya day kar tujhay maut say bachaaega, jang men tujhay talvaar kee zad men aanay naheen dega. ²¹too zabaan kay kodon say mahfooz rahega, aur jab tabaahee aaay to darnay kee zaroorat naheen hogee. ²²too tabaahee aur kaal kee hansee udaaega, zameen kay vaheshee jaanvaron say khauf naheen khaaega. ²³kyoonki tera khulay maidaan kay pattharon kay saath ahd hoga, is liyay us kay janglee jaanvar teray saath salaamatee say zindagee guzaarengay. ²⁴too jaan lega ki tera khaima mahfooz hai. jab too apnay ghar ka muaaina karay to maaloom hoga ki kuchh gum naheen hua. ²⁵too dekhega ki teree aulaad badhtee jaaegee, teray farzand zameen par ghaas kee tarah phailtay jaaengay. ²⁶too vaqt par jamaashuda poolon kee tarah umrraseeda ho kar qabr men utrega.

²⁷ham nay tahqeeq karkay maaloom kiya hai ki aisa hee hai. chunaanchay hamaaree baat sun kar usay apna lay!”