Ayyoob 6
ayyoob ka javaab : saabit karo ki mujh say kya ghaltee huee hai
1tab ayyoob nay javaab day kar kaha,
2“kaash meree ranjeedgee ka vazan kiya ja sakay aur meree museebat taraazoo men tolee ja sakay! 3kyoonki vah samundar kee ret say ziyaada bhaaree ho gaee hai. isee liyay meree baaten betukee see lag rahee hain. 4kyoonki qaadir-ay-mutlaq kay teer mujh men gad gaay hain, meree rooh un ka zaher pee rahee hai. haan, allaah kay haulnaak hamlay meray khilaaf saf’aara hain. 5kya janglee gadha dheenchoon dheenchoon karta hai jab usay ghaas dastayaab ho? ya kya bail dakraata hai jab usay chaara haasil ho? 6kya pheeka khaana namak kay baghair khaaya jaata, ya anday kee saphedee [a] ya khatmee ka ras. men zaaiqa hai? 7aisee cheez ko main chhoota bhee naheen, aisee khuraak say mujhay ghin hee aatee hai.
8kaash meree guzaarish pooree ho jaaay, allaah meree aarzoo pooree karay! 9kaash vah mujhay kuchal denay kay liyay tayyaar ho jaaay, vah apna haath badha kar mujhay halaak karay. 10phir mujhay kam az kam tasallee hotee balki main mustaqil dard kay maaray pech-o-taab khaanay kay baavujood khushee manaata ki main nay quddoos khuda kay farmaanon ka inkaar naheen kiya.
11meree itnee taaqat naheen ki mazeed intizaar karoon, mera kya achchha anjaam hai ki sabr karoon? 12kya main pattharon jaisa taaqatvar hoon? kya mera jism peetal jaisa mazboot hai? 13naheen, mujh say har sahaara chheen liya gaya hai, meray saath aisa sulook hua hai ki kaamyaabee ka imkaan hee naheen raha.
14jo apnay dost par meharbaanee karnay say inkaar karay vah allaah ka khauf tark karta hai. 15meray bhaaiyon nay vaadee kee un nadiyon jaisee bevafaaee kee hai jo barsaat kay mausam men apnay kinaaron say baahar a jaatee hain. 16us vaqt vah barf say bhar kar gadlee ho jaatee hain, 17lekin urooj tak pahunchtay hee vah sookh jaatee, taptee garmee men ojhal ho jaatee hain. 18tab qaafilay apnee raahon say hat jaatay hain taaki paanee mil jaaay, lekin befaaida. vah registaan pa kar tabaah ho jaatay hain. 19taima kay qaafilay is paanee kee talaash men rahetay, saba kay safar karnay vaalay taajir us par ummeed rakhtay hain, 20lekin besood. jis par unhon nay etimaad kiya vah unhen maayoos kar deta hai. jab vahaan pahunchtay hain to sharminda ho jaatay hain.
21tum bhee itnay hee bekaar saabit huay ho. tum haulnaak baat dekh kar dahshatzada ho gaay ho. 22kya main nay kaha, ‘mujhay tuhfa day do, apnee daulat men say meree khaatir rishvat do, 23mujhay dushman kay haath say chhudaao, fidya day kar zaalim kay qabzay say bachaao’?
24mujhay saaf hidaayat do to main maan kar khaamosh ho jaaoonga. mujhay bataao ki kis baat men mujh say ghaltee huee hai. 25seedhee raah kee baaten kitnee takleefdih ho saktee hain! lekin tumhaaree malaamat say mujhay kis qism kee tarbiyat haasil hogee? 26kya tum samajhtay ho ki khaalee alfaaz muaamalay ko hal karengay, go tum maayoosee men mubtala aadmee kee baat nazar’andaaz kartay ho? 27kya tum yateem kay liyay bhee qur’a daaltay, apnay dost kay liyay bhee saudaabaazee kartay ho?
28lekin ab khud faisla karo, mujh par nazar daal kar soch lo. allaah kee qasam, main tumhaaray roo-ba-roo jhoot naheen bolta. 29apnee ghaltee tasleem karo taaki naainsaafee na ho. apnee ghaltee maan lo, kyoonki ab tak main haq par hoon. 30kya meree zabaan jhoot boltee hai? kya main farebdih baaten pahechaan naheen saktaa