Ayyoob 7
allaah mujhay kyoon naheen chhodta?
1insaan duniya men sakht khidmat karnay par majboor hota hai, jeetay jee vah mazdoor kee see zindagee guzaarta hai. 2ghulaam kee tarah vah shaam kay saay ka aarzoomand hota, mazdoor kee tarah mazdooree kay intizaar men raheta hai. 3mujhay bhee bemaanee maheenay aur museebat kee raaten naseeb huee hain. 4jab bistar par let jaata to sochta hoon ki kab uth sakta hoon? lekin lagta hai ki raat kabhee khatm naheen hogee, aur main fajr tak bechainee say karvaten badalta raheta hoon. 5meray jism kee har jagah keeday aur khurand phail gaay hain, meree sukdee huee jild men peep pad gaee hai. 6meray din joolaahay kee naal [a] yaanee shatal. say kaheen ziyaada tezee say guzar gaay hain. vah apnay anjaam tak pahunch gaay hain, dhaaga khatm ho gaya hai.
7ai allaah, khayaal rakh ki meree zindagee dam bhar kee hee hai! meree aankhen aainda kabhee khushhaalee naheen dekhengee. 8jo mujhay is vaqt dekhay vah aainda mujhay naheen dekhega. too meree taraf dekhega, lekin main hoonga naheen. 9jis tarah baadal ojhal ho kar khatm ho jaata hai usee tarah paataal men utarnay vaala vaapas naheen aata. 10vah dubaara apnay ghar vaapas naheen aaega, aur us ka maqaam usay naheen jaanta.
11chunaanchay main vah kuchh rok naheen sakta jo meray munh say nikalna chaahata hai. main ranjeeda haalat men baat karoonga, apnay dil kee talkhee ka izhaar karkay aah-o-zaaree karoonga. 12ai allaah, kya main samundar ya samundaree ajhdaha hoon ki too nay mujhay nazarband kar rakha hai? 13jab main kaheta hoon, ‘mera bistar mujhay tasallee day, sonay say mera gham halka ho jaaay’ 14to too mujhay haulnaak khwaabon say himmat haarnay deta, royaaon say mujhay dahshat khilaata hai. 15meree itnee buree haalat ho gaee hai ki sochta hoon, kaash koee mera gala ghoont kar mujhay maar daalay, kaash main zinda na rahoon balki dam chhodoon. 16main nay zindagee ko radd kar diya hai, ab main ziyaada der tak zinda naheen rahoonga. mujhay chhod, kyoonki meray din dam bhar kay hee hain.
17insaan kya hai ki too us kee itnee qadar karay, us par itna dhyaan day? 18vah itna ahem to naheen hai ki too har subah us ka muaaina karay, har lamha us kee jaanch-padtaal karay. 19kya too mujhay taknay say kabhee naheen baaz aaega? kya too mujhay itna sukoon bhee naheen dega ki pal bhar kay liyay thook nigloon? 20ai insaan kay paheredaar, agar mujh say ghaltee huee bhee to is say main nay tera kya nuqsaan kiya? too nay mujhay apnay ghazab ka nishaana kyoon banaaya? main teray liyay bojh kyoon ban gaya hoon? 21too mera jurm muaaf kyoon naheen karta, mera qusoor darguzar kyoon naheen karta? kyoonki jald hee main khaak ho jaaoonga. agar too mujhay talaash bhee karay to naheen miloonga, kyoonki main hoonga naheen.”