Ayyoob 8
bildad ka javaab : apnay gunaah say tauba kar!
1tab bildad sookhee nay javaab day kar kaha,
2“too kab tak is qism kee baaten karega? kab tak teray munh say aandhee kay jhonkay nikalengay? 3kya allaah insaaf ka khoon kar sakta, kya qaadir-ay-mutlaq raastee ko aagay peechhay kar sakta hai? 4teray beton nay us ka gunaah kiya hai, is liyay us nay unhen un kay jurm kay qabzay men chhod diya. 5ab teray liyay laazim hai ki too allaah ka taalib ho aur qaadir-ay-mutlaq say iltija karay, 6ki too paak ho aur seedhee raah par chalay. phir vah ab bhee teree khaatir josh men a kar teree raastbaazee kee sukoonatgaah ko bahaal karega. 7tab tera mustaqbil nihaayat azeem hoga, khwaah teree ibatidaaee haalat kitnee past kyoon na ho.
8guzashta nasal say zara poochh lay, us par dhyaan day jo un kay baapdaada nay tahqeeqaat kay baad maaloom kiya. 9kyoonki ham khud kal hee paida huay aur kuchh naheen jaantay, zameen par hamaaray din saay jaisay aarizee hain. 10lekin yah tujhay taaleem day kar baat bata saktay hain, yah tujhay apnay dil men jamaashuda ilm pesh kar saktay hain. 11kya aabee narsal vahaan ugta hai jahaan daldal naheen? kya sarkanda vahaan phalta phoolta hai jahaan paanee naheen? 12us kee komplen abhee nikal rahee hain aur usay toda naheen gaya ki agar paanee na milay to baaqee hariyaalee say pahelay hee sookh jaata hai. 13yah hai un ka anjaam jo allaah ko bhool jaatay hain, isee tarah bedeen kee ummeed jaatee rahetee hai. 14jis par vah etimaad karta hai vah nihaayat hee naazuk hai, jis par us ka bharosa hai vah makdee kay jaalay jaisa kamzor hai. 15jab vah jaalay par tek lagaaay to khada naheen raheta, jab usay pakad lay to qaaim naheen raheta.
16bedeen dhoop men shaadaab bel kee maanind hai. us kee komplen chaaron taraf phail jaatee, 17us kee jaden patthar kay dher par chha kar un men tik jaatee hain. 18lekin agar usay ukhaada jaaay to jis jagah pahelay ug rahee thee vah us ka inkaar karkay kahegee, ‘main nay tujhay kabhee dekha bhee naheen.’ 19yah hai us kee raah kee naam-nihaad khushee! jahaan pahelay tha vahaan deegar pauday zameen say phoot nikalengay.
20yaqeenan allaah beilzaam aadmee ko mustarad naheen karta, yaqeenan vah shareer aadmee kay haath mazboot naheen karta. 21vah ek baar phir tujhay aisee khushee bakhshega ki too hans uthega aur shaadmaanee kay naaray lagaaega. 22jo tujh say nafrat kartay hain vah sharm say mulabbas ho jaaengay, aur bedeenon kay khaimay nest-o-naabood hongay.”