Yoel 1

¹zail men rabb ka vah kalaam hai jo yoel bin fatooel par naazil hua.

²ai buzurgo, suno! ai mulk kay tamaam baashindo, tavajjuh do! jo kuchh in dinon men tumhen pesh aaya hai kya vah pahelay kabhee tumhen ya tumhaaray baapdaada ko pesh aaya? ³apnay bachchon ko is kay baaray men bataao, jo kuchh pesh aaya hai us kee yaad nasal-dar-nasal taaza rahay.

⁴jo kuchh tiddee kay laarvay nay chhod diya usay baaligh tiddee kha gaee, jo baaligh tiddee chhod gaee usay tiddee ka bachcha kha gaya, aur jo tiddee ka bachcha chhod gaya usay javaan tiddee kha gaee. ⁵ai nashay men dhut logo, jaag utho aur ro pado! ai mai peenay vaalo, vaavaila karo! kyoonki naee mai tumhaaray munh say chheen lee gaee hai. ⁶tiddiyon kee zabardast aur anaginat qaum meray mulk par toot padee hai. un kay sher kay say daant aur shernee ka sa jabda hai. ⁷nateejay men meray angoor kee belen tabaah, meray anjeer kay darakht zaaay ho gaay hain. tiddiyon nay chhaal ko bhee utaar liya, ab shaakhen safed safed nazar aatee hain.

⁸aah-o-zaaree karo, taat say mulabbas us kunvaaree kee tarah girya karo jis ka mangetar intiqaal kar gaya ho. ⁹rabb kay ghar men ghalla aur mai kee nazren band ho gaee hain. imaam jo rabb kay khaadim hain maatam kar rahay hain. ¹⁰khet tabaah huay, zameen jhulas gaee hai. anaaj khatm, angoor khatm, zaitoon khatm.

¹¹ai kaashtkaaro, sharmasaar ho jaao! ai angoor kay baaghbaano, aah-o-buka karo! kyoonki khet kee fasal barbaad ho gaee hai, gandum aur jau kee fasal khatm hee hai. ¹²angoor kee bel sookh gaee, anjeer ka darakht murjha gaya hai. anaar, khajoor, seb balki phal laanay vaalay tamaam darakht pajhmurda ho gaay hain. insaan kee tamaam khushee khaak men milaaee gaee hai.

¹³ai imaamo, taat ka libaas odh kar maatam karo! ai qurbaangaah kay khaadimo, vaavaila karo! ai meray khuda kay khaadimo, aao, raat ko bhee taat odh kar guzaaro! kyoonki tumhaaray khuda ka ghar ghalla aur mai kee nazron say maheroom ho gaya hai. ¹⁴muqaddas rozay ka elaan karo. logon ko khaas ijtima kay liyay bulaao. buzurgon aur mulk kay tamaam baashindon ko rabb apnay khuda kay ghar men jama karkay buland aavaaz say rabb say iltija karo.

¹⁵us din par afsos! kyoonki rabb ka vah din qareeb hee hai jab qaadir-ay-mutlaq ham par tabaahee naazil karega. ¹⁶kya aisa naheen hua ki hamaaray dekhtay dekhtay ham say khuraak chheen lee gaee, ki allaah kay ghar men khushee-o-shaadmaanee band ho gaee hai? ¹⁷dhelon men chhupay beej jhulas gaay hain, is liyay khaalee godaam khastaahaal aur anaaj ko mahfooz rakhnay kay makaan toot phoot gaay hain. un kee zaroorat naheen rahee, kyoonki ghalla sookh gaya hai. ¹⁸haay, maveshee kaisee dardanaak aavaaz nikaal rahay hain! gaay-bail pareshaanee say idhar udhar phir rahay hain, kyoonki kaheen bhee charaagaah naheen miltee. bhed-bakriyon ko bhee takleef hai.

¹⁹ai rabb, main tujhay pukaarta hoon, kyoonki khulay maidaan kee charaagaahen nazar-ay-aatish ho gaee hain, tamaam darakht bhasm ho gaay hain. ²⁰janglee jaanvar bhee haamptay haamptay teray intizaar men hain, kyoonki nadiyaan sookh gaee hain, aur khulay maidaan kee charaagaahen nazar-ay-aatish ho gaee hain.