Yoonus 1

yoonus allaah say faraar ho jaata hai

¹rabb yoonus bin amittee say hamkalaam hua, ²“baday shaher neenva ja kar us par meree adaalat ka elaan kar, kyoonki un kee buraaee meray huzoor tak pahunch gaee hai.”

³yoonus ravaana hua, lekin mashriqee shaher neenva kay liyay naheen balki maghribee shaher tarsees kay liyay. rabb kay huzoor say faraar honay kay liyay vah yaafa shaher pahunch gaya jahaan ek baheree jahaaz tarsees ko jaanay vaala tha. safar ka kiraaya ada karkay yoonus jahaaz men baith gaya taaki rabb kay huzoor say bhaag niklay.

⁴lekin rabb nay samundar par zabardast aandhee bhejee. toofaan itna shadeed tha ki jahaaz kay tukday tukday honay ka khatra tha. ⁵mallaah sahem gaay, aur har ek cheekhta chillaata apnay devta say iltija karnay laga. jahaaz ko halka karnay kay liyay unhon nay saamaan ko samundar men phaink diya.

lekin yoonus jahaaz kay nichlay hissay men let gaya tha. ab vah gaheree neend so raha tha. ⁶phir kaptaan us kay paas aaya aur kahenay laga, “aap kis tarah so saktay hain? uthen, apnay devta say iltija karen! shaayad vah ham par dhyaan day aur ham halaak na hon.”

⁷mallaah aapas men kahenay lagay, “aao, ham qur’a daal kar maaloom karen ki kaun hamaaree museebat ka baais hai.” unhon nay qur’a daala to yoonus ka naam nikla. ⁸tab unhon nay us say poochha, “hamen bataaen ki yah aafat kis kay qusoor kay baais ham par naazil huee hai? aap kya kartay hain, kahaan say aaay hain, kis mulk aur kis qaum say hain?”

⁹yoonus nay javaab diya, “main ibraanee hoon, aur rabb ka parastaar hoon jo aasmaan ka khuda hai. samundar aur khushkee donon usee nay banaaay hain.” ¹⁰yoonus nay unhen yah bhee bataaya ki main rabb kay huzoor say faraar ho raha hoon. yah sab kuchh sun kar deegar musaafiron par shadeed dahshat taaree huee. unhon nay kaha, “yah aap nay kya kiya hai?” ¹¹itnay men samundar mazeed mutlaatim hota ja raha tha. chunaanchay unhon nay poochha, “ab ham aap kay saath kya karen taaki samundar tham jaaay aur hamaara peechha chhod day?” ¹²yoonus nay javaab diya, “mujhay utha kar samundar men phaink den to vah tham jaaega. kyoonki main jaanta hoon ki yah bada toofaan meree hee vajah say aap par toot pada hai.”

¹³pahelay mallaahon nay us ka mashvra na maana balki chappoo maar maar kar saahil par pahunchnay kee sirtod koshish kartay rahay. lekin befaaida, samundar pahelay kee nisbat kaheen ziyaada mutlaatim ho gaya. ¹⁴tab vah buland aavaaz say rabb say iltija karnay lagay, “ai rabb, aisa na ho ki ham is aadmee kee zindagee kay sabab say halaak ho jaaen. aur jab ham usay samundar men phainkengay to hamen begunaah aadmee kee jaan lenay kay zimmaadaar na thahera. kyoonki jo kuchh ho raha hai vah teree hee marzee say ho raha hai.” ¹⁵yah kah kar unhon nay yoonus ko utha kar samundar men phaink diya. paanee men girtay hee samundar thaathen maarnay say baaz a kar tham gaya. ¹⁶yah dekh kar musaafiron par sakht dahshat chha gaee, aur unhon nay rabb ko zabah kee qurbaanee pesh kee aur mannaten maaneen.

¹⁷lekin rabb nay ek badee machhlee ko yoonus kay paas bheja jis nay usay nigal liya. yoonus teen din aur teen raat machhlee kay pet men raha.