Yoonus 4

yoonus allaah kee meharbaanee dekh kar naaraaz ho jaata hai

¹yah baat yoonus ko nihaayat buree lagee, aur vah ghussay hua. ²us nay rabb say dua kee, “ai rabb, kya yah vahee baat naheen jo main nay us vaqt kee jab abhee apnay vatan men tha? isee liyay main itnee tezee say bhaag kar tarsees kay liyay ravaana hua tha. main jaanta tha ki too meharbaan aur raheem khuda hai. too tahemmul aur shafqat say bharpoor hai aur jald hee saza denay say pachhtaata hai. ³ai rabb, ab mujhay jaan say maar day! jeenay say behatar yahee hai ki main kooch kar jaaoon.”

⁴lekin rabb nay javaab diya, “kya too ghussay honay men haq-ba-jaanib hai?”

⁵yoonus shaher say nikal kar us kay mashriq men ruk gaya. vahaan vah apnay liyay jhompdee bana kar us kay saay men baith gaya. kyoonki vah dekhna chaahata tha ki shaher kay saath kya kuchh ho jaaega.

⁶tab rabb khuda nay ek bel ko phootnay diya jo badhtay badhtay yoonus kay oopar phail gaee taaki saaya day kar us kee naaraazee door karay. yah dekh kar yoonus bahut khush hua. ⁷lekin aglay din jab pau phatnay lagee to allaah nay ek keeda bheja jis nay bel par hamla kiya. bel jald hee murjha gaee.

⁸jab sooraj tuloo hua to allaah nay mashriq say jhulastee loo bhejee. dhoop itnee shadeed thee ki yoonus ghash khaanay laga. aakhirkaar vah marna hee chaahata tha. vah bola, “jeenay say behatar yahee hai ki main kooch kar jaaoon.”

⁹tab allaah nay us say poochha, “kya too bel kay sabab say ghussay honay men haq-ba-jaanib hai?” yoonus nay javaab diya, “jee haan, main marnay tak ghussay hoon, aur is men main haq-ba-jaanib bhee hoon.”

¹⁰rabb nay javaab diya, “too is bel par gham khaata hai, haalaanki too nay us kay phalnay phoolnay kay liyay ek unglee bhee naheen hilaaee. yah bel ek raat men paida huee aur aglee raat khatm huee ¹¹jabki neenva bahut bada shaher hai, us men 1,20,000 afraad aur mut’addid jaanvar bastay hain. aur yah log itnay jaahil hain ki apnay daaen aur baaen haath men imtiyaaz naheen kar paatay. kya mujhay is baday shaher par gham naheen khaana chaahiay.?”