Kuzaat 2

rabb ka farishta israaeel ko malaamat karta hai

¹rabb ka farishta jiljaal say chadh kar bokeem pahuncha. vahaan us nay israaeeliyon say kaha, “main tumhen misr say nikaal kar us mulk men laaya jis ka vaada main nay qasam kha kar tumhaaray baapdaada say kiya tha. us vaqt main nay kaha ki main tumhaaray saath apna ahd kabhee naheen todoonga. ²aur main nay hukm diya, ‘is mulk kee qaumon kay saath ahd mat baandhna balki un kee qurbaanagaahon ko gira dena.’ lekin tum nay meree na sunee. yah tum nay kya kiya? ³is liyay ab main tumhen bataata hoon ki main unhen tumhaaray aagay say naheen nikaaloonga. vah tumhaaray pahelooon men kaantay banengay, aur un kay devta tumhaaray liyay phanda banay rahengay.”

⁴rabb kay farishtay kee yah baat sun kar israaeelee khoob roay. ⁵yahee vajah hai ki us jagah ka naam bokeem yaanee ronay vaalay pad gaya. phir unhon nay vahaan rabb kay huzoor qurbaaniyaan pesh keen.

israaeel bevafa ho jaata hai

⁶yashooa kay qaum ko rukhsat karnay kay baad har ek qabeela apnay ilaaqay par qabza karnay kay liyay ravaana hua tha. ⁷jab tak yashooa aur vah buzurg zinda rahay jinhon nay vah azeem kaam dekhay huay thay jo rabb nay israaeeliyon kay liyay kiay thay us vaqt tak israaeelee rabb kee vafaadaaree say khidmat kartay rahay. ⁸phir rabb ka khaadim yashooa bin noon intiqaal kar gaya. us kee umr 110 saal thee. ⁹usay timnat-haris men us kee apnee mauroosee zameen men dafnaaya gaya. (yah shaher ifraaeem kay pahaadee ilaaqay men jaas pahaad kay shimaal men hai.)

¹⁰jab ham’asar israaeelee sab mar kar apnay baapdaada say ja milay to naee nasal ubhar aaee jo na to rabb ko jaantee, na un kaamon say vaaqif thee jo rabb nay israaeel kay liyay kiay thay. ¹¹us vaqt vah aisee harkaten karnay lagay jo rabb ko buree lageen. unhon nay baal devta kay buton kee pooja karke ¹²rabb apnay baapdaada kay khuda ko tark kar diya jo unhen misr say nikaal laaya tha. vah gird-o-navaah kee qaumon kay deegar maaboodon kay peechhay lag gaay aur un kee pooja bhee karnay lagay. is say rabb ka ghazab un par bhadka, ¹³kyoonki unhon nay us kee khidmat chhod kar baal devta aur astaaraat devee kee pooja kee. ¹⁴rabb yah dekh kar israaeeliyon say naaraaz hua aur unhen daakuon kay havaalay kar diya jinhon nay un ka maal loota. us nay unhen ird-gird kay dushmanon kay haath bech daala, aur vah un ka muqaabla karnay kay qaabil na rahay. ¹⁵jab bhee israaeelee ladnay kay liyay niklay to rabb ka haath un kay khilaaf tha. nateejatan vah haartay gaay jis tarah us nay qasam kha kar farmaaya tha.

jab vah is tarah badee museebat men the ¹⁶to rabb un kay darmiyaan qaazee barpa karta jo unhen lootnay vaalon kay haath say bachaatay. ¹⁷lekin vah un kee na suntay balki zina karkay deegar maaboodon kay peechhay lagay aur un kee pooja kartay rahetay. go un kay baapdaada rabb kay ahkaam kay taabay rahay thay, lekin vah khud badee jaldee say us raah say hat jaatay jis par un kay baapdaada chalay thay. ¹⁸lekin jab bhee vah dushman kay zulm aur dabaao talay karaahanay lagtay to rabb ko un par taras a jaata, aur vah kisee qaazee ko barpa karta aur us kee madad karkay unhen bachaata.

jitnay arsay tak qaazee zinda raheta utnee der tak israaeelee dushmanon kay haath say mahfooz rahetay. ¹⁹lekin us kay marnay par vah dubaara apnee puraanee raahon par chalnay lagtay, balki jab vah mud kar deegar maaboodon kee pairvee aur pooja karnay lagtay to un kee ravish baapdaada kee ravish say bhee buree hotee. vah apnee shareer harkaton aur hatdharm raahon say baaz aanay kay liyay tayyaar hee na hotay. ²⁰is liyay allaah ko israaeel par bada ghussa aaya. us nay kaha, “is qaum nay vah ahd tod diya hai jo main nay is kay baapdaada say baandha tha. yah meree naheen suntee, ²¹is liyay main un qaumon ko naheen nikaaloonga jo yashooa kee maut say lay kar aaj tak mulk men rah gaee hain. yah qaumen is men aabaad rahengee, ²²aur main un say israaeeliyon ko aazma kar dekhoonga ki aaya vah apnay baapdaada kee tarah rabb kee raah par chalengay ya naheen.”

²³chunaanchay rabb nay in qaumon ko na yashooa kay havaalay kiya, na fauran nikaala balki unhen mulk men hee rahenay diya.