Ahabaar 3

salaamatee kee qurbaanee

¹agar koee rabb ko salaamatee kee qurbaanee pesh karnay kay liyay gaay ya bail chadhaana chaahay to vah jaanvar beaib ho. ²vah apna haath jaanvar kay sar par rakh kar usay mulaaqaat kay khaimay kay darvaazay par zabah karay. haaroon kay betay jo imaam hain us ka khoon qurbaangaah kay chaar pahelooon par chhidken. ^3-4 pesh karnay vaala antadiyon par kee saaree charbee, gurday us charbee samet jo un par aur kamar kay qareeb hotee hai aur jodkalejee jalnay vaalee qurbaanee kay taur par rabb ko pesh karay. in cheezon ko gurdon kay saath hee alag karna hai. ⁵phir haaroon kay betay yah sab kuchh bhasm honay vaalee qurbaanee kay saath qurbaangaah kee lakdiyon par jala den. yah jalnay vaalee qurbaanee hai, aur is kee khushboo rabb ko pasand hai. ⁶agar salaamatee kee qurbaanee kay liyay bhed-bakriyon men say jaanvar chuna jaaay to vah beaib nar ya maada ho.

⁷agar vah bhed ka bachcha chadhaana chaahay to vah usay rabb kay saamnay lay aaay. ⁸vah apna haath us kay sar par rakh kar usay mulaaqaat kay khaimay kay saamnay zabah karay. haaroon kay betay us ka khoon qurbaangaah kay chaar pahelooon par chhidken. ^9-10 pesh karnay vaala charbee, pooree dum, antadiyon par kee saaree charbee, gurday us charbee samet jo un par aur kamar kay qareeb hotee hai aur jodkalejee jalnay vaalee qurbaanee kay taur par rabb ko pesh karay. in cheezon ko gurdon kay saath hee alag karna hai. ¹¹imaam yah sab kuchh rabb ko pesh karkay qurbaangaah par jala day. yah khuraak jalnay vaalee qurbaanee hai.

¹²agar salaamatee kee qurbaanee bakree kee ho ¹³to pesh karnay vaala us par haath rakh kar usay mulaaqaat kay khaimay kay saamnay zabah karay. haaroon kay betay jaanvar ka khoon qurbaangaah kay chaar pahelooon par chhidken. ^14-15 pesh karnay vaala antadiyon par kee saaree charbee, gurday us charbee samet jo un par aur kamar kay qareeb hotee hai aur jodkalejee jalnay vaalee qurbaanee kay taur par rabb ko pesh karay. in cheezon ko gurdon kay saath hee alag karna hai. ¹⁶imaam yah sab kuchh rabb ko pesh karkay qurbaangaah par jala day. yah khuraak jalnay vaalee qurbaanee hai, aur is kee khushboo rabb ko pasand hai.

saaree charbee rabb kee hai. ¹⁷tumhaaray liyay khoon ya charbee khaana mana hai. yah na sirf tumhaaray liyay mana hai balki tumhaaree aulaad kay liyay bhee, na sirf yahaan balki har jagah jahaan tum rahetay ho.”