Looqa 16

chaalaak mulaazim

¹eesa nay shaagirdon say kaha, “kisee ameer aadmee nay ek mulaazim rakha tha jo us kee jaaydaad kee dekh-bhaal karta tha. aisa hua ki ek din us par ilzaam lagaaya gaya ki vah apnay maalik kee daulat zaaay kar raha hai. ²maalik nay usay bula kar kaha, ‘yah kya hai jo main teray baaray men sunta hoon? apnee tamaam zimmaadaariyon ka hisaab day, kyoonki main tujhay barkhaast kar doonga.’ ³mulaazim nay dil men kaha, ‘ab main kya karoon jabki mera maalik yah zimmaadaaree mujh say chheen lega? khudaaee jaisa sakht kaam mujh say naheen hota aur bheek maangnay say sharm aatee hai. ⁴haan, main jaanta hoon ki kya karoon taaki log mujhay barkhaast kiay jaanay kay baad apnay gharon men khush’aamadeed kahen.’

⁵yah kah kar us nay apnay maalik kay tamaam qarzdaaron ko bulaaya. pahelay say us nay poochha, ‘tumhaara qarza kitna hai?’ ⁶us nay javaab diya, ‘mujhay maalik ko zaitoon kay tel kay sau kanastar vaapas karnay hain.’ mulaazim nay kaha, ‘apna bil lay lo aur baith kar jaldee say sau kanastar pachaas men badal lo.’ ⁷doosray say us nay poochha, ‘tumhaara kitna qarza hai?’ us nay javaab diya, ‘mujhay gandum kee hazaar boriyaan vaapas karnee hain.’ mulaazim nay kaha, ‘apna bil lay lo aur hazaar kay badlay aath sau likh lo.’

⁸yah dekh kar maalik nay beeemaan mulaazim kee taareef kee ki us nay aqal say kaam liya hai. kyoonki is duniya kay farzand apnee nasal kay logon say nipatnay men noor kay farzandon say ziyaada hoshyaar hotay hain.

⁹main tum ko bataata hoon ki duniya kee naaraast daulat say apnay liyay dost bana lo taaki jab yah khatm ho jaaay to log tum ko abdee rihaaishagaahon men khush’aamadeed kahen. ¹⁰jo thoday men vafaadaar hai vah ziyaada men bhee vafaadaar hoga. aur jo thoday men beeemaan hai vah ziyaada men bhee beeemaanee karega. ¹¹agar tum duniya kee naaraast daulat ko sambhaalnay men vafaadaar na rahay to phir kaun haqeeqee daulat tumhaaray sapurd karega? ¹²aur agar tum nay doosron kee daulat sambhaalnay men beeemaanee dikhaaee hai to phir kaun tum ko tumhaaray zaatee istemaal kay liyay kuchh dega?

¹³koee bhee ghulaam do maalikon kee khidmat naheen kar sakta. ya to vah ek say nafrat karkay doosray say muhabbat rakhega, ya ek say lipat kar doosray ko haqeer jaanega. tum ek hee vaqt men allaah aur daulat kee khidmat naheen kar saktay.”

eesa kee chand kahaavaten

¹⁴fareesiyon nay yah sab kuchh suna to vah us ka mazaaq udaanay lagay, kyoonki vah laalchee thay. ¹⁵us nay un say kaha, “tum hee vah ho jo apnay aap ko logon kay saamnay raastbaaz qaraar detay ho, lekin allaah tumhaaray dilon say vaaqif hai. kyoonki log jis cheez kee bahut qadar kartay hain vah allaah kay nazdeek makrooh hai.

¹⁶yaheya kay aanay tak tumhaaray raahanuma moosa kee shareeat aur nabiyon kay paighaamaat thay. lekin ab allaah kee baadshaahee kee khushkhabaree ka elaan kiya ja raha hai aur tamaam log zabardastee is men daakhil ho rahay hain. ¹⁷lekin is ka yah matlab naheen ki shareeat mansookh ho gaee hai balki aasmaan-o-zameen jaatay rahengay, lekin shareeat kee zer zabar tak koee bhee baat naheen badlegee.

¹⁸chunaanchay jo aadmee apnee beevee ko talaaq day kar kisee aur say shaadee karay vah zina karta hai. isee tarah jo kisee talaakshuda aurat say shaadee karay vah bhee zina karta hai.

ameer aadmee aur laazar

¹⁹ek ameer aadmee ka zikr hai jo arghvaanee rang kay kapday aur nafees kataan pahenta aur har roz aish-o-ishrat men guzaarta tha. ²⁰ameer kay get par ek ghareeb aadmee pada tha jis kay pooray jism par naasoor thay. us ka naam laazar thaa ²¹aur us kee bas ek hee khwaahish thee ki vah ameer kee mez say giray huay tukday kha kar ser ho jaaay. kuttay us kay paas a kar us kay naasoor chaattay thay.

²²phir aisa hua ki ghareeb aadmee mar gaya. farishton nay usay utha kar ibraaheem kee god men bitha diya. ameer aadmee bhee faut hua aur dafnaaya gaya. ²³vah jahennum men pahuncha. azaab kee haalat men us nay apnee nazar uthaaee to door say ibraaheem aur us kee god men laazar ko dekha. ²⁴vah pukaar utha, ‘ai meray baap ibraaheem, mujh par rahem karen. meharbaanee karkay laazar ko meray paas bhej den taaki vah apnee unglee ko paanee men dubo kar meree zabaan ko thanda karay, kyoonki main is aag men tadapta hoon.’

²⁵lekin ibraaheem nay javaab diya, ‘beta, yaad rakh ki tujhay apnee zindagee men behtareen cheezen mil chukee hain jabki laazar ko badtareen cheezen. lekin ab usay aaraam aur tasallee mil gaee hai jabki tujhay aziyat. ²⁶neez, hamaaray aur tumhaaray darmiyaan ek vasee khaleej qaaim hai. agar koee chaahay bhee to usay paar karkay yahaan say tumhaaray paas naheen ja sakta, na vahaan say koee yahaan a sakta hai.’ ²⁷ameer aadmee nay kaha, ‘meray baap, phir meree ek aur guzaarish hai, meharbaanee karkay laazar ko meray vaalid kay ghar bhej den. ²⁸meray paanch bhaaee hain. vah vahaan ja kar unhen aagaah karay, aisa na ho ki un ka anjaam bhee yah aziyatanaak maqaam ho.’

²⁹lekin ibraaheem nay javaab diya, ‘un kay paas moosa kee tauret aur nabiyon kay saheefay to hain. vah un kee sunen.’ ³⁰ameer nay arz kee, ‘naheen, meray baap ibraaheem, agar koee murdon men say un kay paas jaaay to phir vah zaroor tauba karengay.’ ³¹ibraaheem nay kaha, ‘agar vah moosa aur nabiyon kee naheen suntay to vah us vaqt bhee qaail naheen hongay jab koee murdon men say jee uth kar un kay paas jaaega’.”