Mattee 2

mashriq say majoosee aalim

¹eesa herodes baadshaah kay zamaanay men sooba yahoodiya kay shaher bait-lahem men paida hua. un dinon men kuchh majoosee aalim mashriq say a kar yarooshalam pahunch gaay. ²unhon nay poochha, “yahoodiyon ka vah baadshaah kahaan hai jo haal hee men paida hua hai? kyoonki ham nay mashriq men us ka sitaara dekha hai aur ham usay sijda karnay aaay hain.”

³yah sun kar herodes baadshaah pooray yarooshalam samet ghabra gaya. ⁴tamaam raahanuma imaamon aur shareeat kay ulma ko jama karkay us nay un say darayaaft kiya ki maseeh kahaan paida hoga.

⁵unhon nay javaab diya, “yahoodiya kay shaher bait-lahem men, kyoonki nabee kee maarifat yoon likha hai, ⁶‘ai mulk-ay-yahoodiya men vaaqay bait-lahem, too yahoodiya kay hukmaraanon men hargiz sab say chhota naheen. kyoonki tujh men say ek hukmaraan niklega jo meree qaum israaeel kee gallaabaanee karega’.”

⁷is par herodes nay khufiya taur par majoosee aalimon ko bula kar tafseel say poochha ki vah sitaara kis vaqt dikhaaee diya tha. ⁸phir us nay unhen bataaya, “bait-lahem jaaen aur tafseel say bachchay ka pata lagaaen. jab aap usay pa len to mujhay ittila den taaki main bhee ja kar usay sijda karoon.”

⁹baadshaah kay in alfaaz kay baad vah chalay gaay. aur dekho jo sitaara unhon nay mashriq men dekha tha vah un kay aagay aagay chalta gaya aur chaltay chaltay us maqaam kay oopar thaher gaya jahaan bachcha tha. ¹⁰sitaaray ko dekh kar vah bahut khush huay. ¹¹vah ghar men daakhil huay aur bachchay ko maan kay saath dekh kar unhon nay aundhay munh gir kar usay sijda kiya. phir apnay dibbay khol kar usay sonay, lubaan aur mur kay tuhfay pesh kiay.

¹²jab ravaangee ka vaqt aaya to vah yarooshalam say ho kar na gaay balki ek aur raastay say apnay mulk chalay gaay, kyoonki unhen khwaab men aagaah kiya gaya tha ki herodes kay paas vaapas na jaao.

misr kee jaanib hijrat

¹³un kay chalay jaanay kay baad rabb ka farishta khwaab men yoosuf par zaahir hua aur kaha, “uth, bachchay ko us kee maan samet lay kar misr ko hijrat kar ja. jab tak main tujhay ittila na doon vaheen thahera rah, kyoonki herodes bachchay ko talaash karega taaki usay qatl karay.”

¹⁴yoosuf utha aur usee raat bachchay ko us kee maan samet lay kar misr kay liyay ravaana hua. ¹⁵vahaan vah herodes kay intiqaal tak raha. yoon vah baat pooree huee jo rabb nay nabee kee maarifat farmaaee thee, “main nay apnay farzand ko misr say bulaaya.”

bachchon ka qatl

¹⁶jab herodes ko maaloom hua ki majoosee aalimon nay mujhay fareb diya hai to usay bada taish aaya. us nay apnay faujiyon ko bait-lahem bhej kar unhen hukm diya ki bait-lahem aur ird-gird kay ilaaqay kay un tamaam ladkon ko qatl karen jin kee umr do saal tak ho. kyoonki us nay majoosiyon say bachchay kee umr kay baaray men yah maaloom kar liya tha.

¹⁷yoon yarmiyaah nabee kee peshgoee pooree huee, ¹⁸“raama men shor mach gaya hai, ronay peetnay aur shadeed maatam kee aavaazen. raakhil apnay bachchon kay liyay ro rahee hai aur tasallee qabool naheen kar rahee, kyoonki vah halaak ho gaay hain.”

misr say vaapsee

¹⁹jab herodes intiqaal kar gaya to rabb ka farishta khwaab men yoosuf par zaahir hua jo abhee misr hee men tha. ²⁰farishtay nay usay bataaya, “uth, bachchay ko us kee maan samet lay kar mulk-ay-israaeel vaapas chala ja, kyoonki jo bachchay ko jaan say maarnay kay darpai thay vah mar gaay hain.” ²¹chunaanchay yoosuf utha aur bachchay aur us kee maan ko lay kar mulk-ay-israaeel men laut aaya.

²²lekin jab us nay suna ki arkhilaaus apnay baap herodes kee jagah yahoodiya men takhtnasheen ho gaya hai to vah vahaan jaanay say dar gaya. phir khwaab men hidaayat pa kar vah galeel kay ilaaqay kay liyay ravaana hua. ²³vahaan vah ek shaher men ja basa jis ka naam naasrat tha. yoon nabiyon kee baat pooree huee ki ‘vah naasree kahelaaega.’