Mattee 25

das kunvaariyon kee tamseel

¹us vaqt aasmaan kee baadshaahee das kunvaariyon say mutaabiqat rakhegee jo apnay charaagh lay kar doolhay ko milnay kay liyay niklen. ²un men say paanch naasamajh theen aur paanch samajhdaar. ³naasamajh kunvaariyon nay apnay paas charaaghon kay liyay faaltoo tel na rakha. ⁴lekin samajhdaar kunvaariyon nay kuppee men tel daal kar apnay saath lay liya. ⁵doolhay ko aanay men badee der lagee, is liyay vah sab oongh oongh kar so gaeen.

⁶aadhee raat ko shor mach gaya, ‘dekho, doolha pahunch raha hai, usay milnay kay liyay niklo!’ ⁷is par tamaam kunvaariyaan jaag utheen aur apnay charaaghon ko durust karnay lageen. ⁸naasamajh kunvaariyon nay samajhdaar kunvaariyon say kaha, ‘apnay tel men say hamen bhee kuchh day do. hamaaray charaagh bujhnay vaalay hain.’ ⁹doosree kunvaariyon nay javaab diya, ‘naheen, aisa na ho ki na sirf tumhaaray liyay balki hamaaray liyay bhee tel kaafee na ho. dukaan par ja kar apnay liyay khareed lo.’ ¹⁰chunaanchay naasamajh kunvaariyaan chalee gaeen. lekin is dauraan doolha pahunch gaya. jo kunvaariyaan tayyaar theen vah us kay saath shaadee haal men daakhil hueen. phir darvaazay ko band kar diya gaya.

¹¹kuchh der kay baad baaqee kunvaariyaan aaeen aur chillaanay lageen, ‘janaab! hamaaray liyay darvaaza khol den.’ ¹²lekin us nay javaab diya, ‘yaqeen jaano, main tum ko naheen jaanta.’

¹³is liyay chaukas raho, kyoonki tum ibn-ay-aadam kay aanay ka din ya vaqt naheen jaantay.

teen naukron kee tamseel

¹⁴us vaqt aasmaan kee baadshaahee yoon hogee : ek aadmee ko bairoon-ay-mulk jaana tha. us nay apnay naukron ko bula kar apnee milkiyat un kay sapurd kar dee. ¹⁵pahelay ko us nay sonay kay 5,000 sikkay diay, doosray ko 2,000 aur teesray ko 1,000. har ek ko us nay us kee qaabiliyat kay mutaabiq paisay diay. phir vah ravaana hua. ¹⁶jis naukar ko 5,000 sikkay milay thay us nay seedha ja kar unhen kisee kaarobaar men lagaaya. is say usay mazeed 5,000 sikkay haasil huay. ¹⁷isee tarah doosray ko bhee jisay 2,000 sikkay milay thay mazeed 2,000 sikkay haasil huay. ¹⁸lekin jis aadmee ko 1,000 sikkay milay thay vah chala gaya aur kaheen zameen men gadha khod kar apnay maalik kay paisay us men chhupa diay.

¹⁹badee der kay baad un ka maalik laut aaya. jab us nay un kay saath hisaab-kitaab kiyaa ²⁰to pahela naukar jisay 5,000 sikkay milay thay mazeed 5,000 sikkay lay kar aaya. us nay kaha, ‘janaab, aap nay 5,000 sikkay meray sapurd kiay thay. yah dekhen, main nay mazeed 5,000 sikkay haasil kiay hain.’ ²¹us kay maalik nay javaab diya, ‘shaabaash, meray achchhay aur vafaadaar naukar. tum thoday men vafaadaar rahay, is liyay main tumhen bahut kuchh par muqarrar karoonga. andar aao aur apnay maalik kee khushee men shareek ho jaao.’

²²phir doosra naukar aaya jisay 2,000 sikkay milay thay. us nay kaha, ‘janaab, aap nay 2,000 sikkay meray sapurd kiay thay. yah dekhen, main nay mazeed 2,000 sikkay haasil kiay hain.’ ²³us kay maalik nay javaab diya, ‘shaabaash, meray achchhay aur vafaadaar naukar. tum thoday men vafaadaar rahay, is liyay main tumhen bahut kuchh par muqarrar karoonga. andar aao aur apnay maalik kee khushee men shareek ho jaao.’

²⁴phir teesra naukar aaya jisay 1,000 sikkay milay thay. us nay kaha, ‘janaab, main jaanta tha ki aap sakht aadmee hain. jo beej aap nay naheen boya us kee fasal aap kaattay hain aur jo kuchh aap nay naheen lagaaya us kee paidaavaar jama kartay hain. ²⁵is liyay main dar gaya aur ja kar aap kay paisay zameen men chhupa diay. ab aap apnay paisay vaapas lay saktay hain.’

²⁶us kay maalik nay javaab diya, ‘shareer aur sust naukar! kya too jaanta tha ki jo beej main nay naheen boya us kee fasal kaatta hoon aur jo kuchh main nay naheen lagaaya us kee paidaavaar jama karta hoon? ²⁷to phir too nay meray paisay baink men kyoon na jama kara diay? agar aisa karta to vaapsee par mujhay kam az kam vah paisay sood samet mil jaatay.’ ²⁸yah kah kar maalik doosron say mukhaatib hua, ‘yah paisay is say lay kar us naukar ko day do jis kay paas 10,000 sikkay hain. ²⁹kyoonki jis kay paas kuchh hai usay aur diya jaaega aur us kay paas kasrat kee cheezen hongee. lekin jis kay paas kuchh naheen hai us say vah bhee chheen liya jaaega jo us kay paas hai. ³⁰ab is bekaar naukar ko nikaal kar baahar kee taareekee men phaink do, vahaan jahaan log rotay aur daant peestay rahengay.’

aakhiree adaalat

³¹jab ibn-ay-aadam apnay jalaal kay saath aaega aur tamaam farishtay us kay saath hongay to vah apnay jalaalee takht par baith jaaega. ³²tab tamaam qaumen us kay saamnay jama kee jaaengee. aur jis tarah charvaaha bhedon ko bakriyon say alag karta hai usee tarah vah logon ko ek doosray say alag karega. ³³vah bhedon ko apnay dahenay haath khada karega aur bakriyon ko apnay baaen haath. ³⁴phir baadshaah dahenay haath vaalon say kahega, ‘aao, meray baap kay mubaarak logo! jo baadshaahee duniya kee takhleeq say tumhaaray liyay tayyaar hai usay meeraas men lay lo. ³⁵kyoonki main bhooka tha aur tum nay mujhay khaana khilaaya, main piyaasa tha aur tum nay mujhay paanee pilaaya, main ajnabee tha aur tum nay meree mehamaan-navaazee kee, ³⁶main nanga tha aur tum nay mujhay kapday pahenaaay, main beemaar tha aur tum nay meree dekh-bhaal kee, main jel men tha aur tum mujh say milnay aaay.’

³⁷phir yah raastbaaz log javaab men kahengay, ‘khudaavand, ham nay aap ko kab bhooka dekh kar khaana khilaaya, aap ko kab piyaasa dekh kar paanee pilaaya? ³⁸ham nay aap ko kab ajnabee kee haisiyat say dekh kar aap kee mehamaan-navaazee kee, aap ko kab nanga dekh kar kapday pahenaaay? ³⁹ham aap ko kab beemaar haalat men ya jel men pada dekh kar aap say milnay gaay?’ ⁴⁰baadshaah javaab dega, ‘main tumhen sachch bataata hoon ki jo kuchh tum nay meray in sab say chhotay bhaaiyon men say ek kay liyay kiya vah tum nay meray hee liyay kiya.’

⁴¹phir vah baaen haath vaalon say kahega, ‘laantee logo, mujh say door ho jaao aur us abdee aag men chalay jaao jo iblees aur us kay farishton kay liyay tayyaar hai. ⁴²kyoonki main bhooka tha aur tum nay mujhay kuchh na khilaaya, main piyaasa tha aur tum nay mujhay paanee na pilaaya, ⁴³main ajnabee tha aur tum nay meree mehamaan-navaazee na kee, main nanga tha aur tum nay mujhay kapday na pahenaaay, main beemaar aur jel men tha aur tum mujh say milnay na aaay.’

⁴⁴phir vah javaab men poochhengay, ‘khudaavand, ham nay aap ko kab bhooka, piyaasa, ajnabee, nanga, beemaar ya jel men pada dekha aur aap kee khidmat na kee?’ ⁴⁵vah javaab dega, ‘main tum ko sachch bataata hoon ki jab kabhee tum nay in sab say chhoton men say ek kee madad karnay say inkaar kiya to tum nay meree khidmat karnay say inkaar kiya.’ ⁴⁶phir yah abdee saza bhugatnay kay liyay jaaengay jabki raastbaaz abdee zindagee men daakhil hongay.”