Mattee 4

eesa ko aazmaaya jaata hai

¹phir rooh-ul-quds eesa ko registaan men lay gaya taaki usay iblees say aazmaaya jaaay. ²chaalees din aur chaalees raat roza rakhnay kay baad usay aakhirkaar bhook lagee. ³phir aazmaanay vaala us kay paas a kar kahenay laga, “agar too allaah ka farzand hai to in pattharon ko hukm day ki rotee ban jaaen.”

⁴lekin eesa nay inkaar karkay kaha, “hargiz naheen, kyoonki kalaam-ay-muqaddas men likha hai ki insaan kee zindagee sirf rotee par munhasir naheen hotee balki har us baat par jo rabb kay munh say nikaltee hai.”

⁵is par iblees nay usay muqaddas shaher yarooshalam lay ja kar bait-ul-muqaddas kee sab say oonchee jagah par khada kiya aur kaha, ⁶“agar too allaah ka farzand hai to yahaan say chhalaang laga day. kyoonki kalaam-ay-muqaddas men likha hai, ‘vah teree khaatir apnay farishton ko hukm dega, aur vah tujhay apnay haathon par utha lengay taaki teray paaon ko patthar say thes na lagay’.”

⁷lekin eesa nay javaab diya, “kalaam-ay-muqaddas yah bhee farmaata hai, ‘rabb apnay khuda ko na aazmaana’.”

⁸phir iblees nay usay ek nihaayat oonchay pahaad par lay ja kar usay duniya kay tamaam mamaalik aur un kee shaan-o-shaukat dikhaaee. ⁹vah bola, “yah sab kuchh main tujhay day doonga, shart yah hai ki too gir kar mujhay sijda karay.”

¹⁰lekin eesa nay teesree baar inkaar kiya aur kaha, “iblees, dafa ho ja! kyoonki kalaam-ay-muqaddas men yoon likha hai, ‘rabb apnay khuda ko sijda kar aur sirf usee kee ibaadat kar’.”

¹¹is par iblees usay chhod kar chala gaya aur farishtay a kar us kee khidmat karnay lagay.

galeel men eesa kee khidmat ka aaghaaz

¹²jab eesa ko khabar milee ki yaheya ko jel men daal diya gaya hai to vah vahaan say chala gaya aur galeel men aaya. ¹³naasrat ko chhod kar vah jheel kay kinaaray par vaaqay shaher kafarnahoom men rahenay laga, yaanee zabooloon aur naftaalee kay ilaaqay men. ¹⁴yoon yasaayaah nabee kee peshgoee pooree huee,

¹⁵“zabooloon ka ilaaqa, naftaalee ka ilaaqa,

jheel kay saath ka raasta, darya-ay-yardan kay paar,

ghairyahoodiyon ka galeel :

¹⁶andheray men baithee qaum nay ek tez raushnee dekhee,

maut kay saay men doobay huay mulk kay baashindon par raushnee chamkee.”

¹⁷us vaqt say eesa is paighaam kee munaadee karnay laga, “tauba karo, kyoonki aasmaan kee baadshaahee qareeb a gaee hai.”

eesa chaar machheron ko bulaata hai

¹⁸ek din jab eesa galeel kee jheel kay kinaaray kinaaray chal raha tha to us nay do bhaaiyon ko dekha - shamaaoon jo patras bhee kahelaata tha aur andriyaas ko. vah paanee men jaal daal rahay thay, kyoonki vah maaheegeer thay. ¹⁹us nay kaha, “aao, meray peechhay ho lo, main tum ko aadamgeer banaaoonga.” ²⁰yah suntay hee vah apnay jaalon ko chhod kar us kay peechhay ho liyay.

²¹aagay ja kar eesa nay do aur bhaaiyon ko dekha, yaaqoob bin zabdee aur us kay bhaaee yoohanna ko. vah kashtee men baithay apnay baap zabdee kay saath apnay jaalon kee marammat kar rahay thay. eesa nay unhen bulaayaa ²²to vah fauran kashtee aur apnay baap ko chhod kar us kay peechhay ho liyay.

eesa taaleem deta, munaadee karta aur shifa deta hai

²³aur eesa galeel kay pooray ilaaqay men phirta raha. jahaan bhee vah jaata vah yahoodee ibaadatkhaanon men taaleem deta, baadshaahee kee khushkhabaree sunaata aur har qism kee beemaaree aur alaalat say shifa deta tha. ²⁴us kee khabar mulk-ay-shaam kay konay konay tak pahunch gaee, aur log apnay tamaam mareezon ko us kay paas laanay lagay. qism qism kee beemaariyon talay dabay log, aisay jo shadeed dard ka shikaar thay, badroohon kee girift men mubtala, mirgee vaalay aur faalijzada, gharaz jo bhee aaya eesa nay usay shifa bakhshee. ²⁵galeel, dikpulis, yarooshalam, yahoodiya aur darya-ay-yardan kay paar kay ilaaqay say baday baday hujoom us kay peechhay chaltay rahay.