Matthew 6

Mattee 6

khairaat

¹khabardaar! apnay nek kaam logon kay saamnay dikhaavay kay liyay na karo, varna tum ko apnay aasmaanee baap say koee ajr naheen milega.

²chunaanchay khairaat detay vaqt riyaakaaron kee tarah na kar jo ibaadatkhaanon aur galiyon men bigal baja kar is ka elaan kartay hain taaki log un kee izzat karen. main tum ko sachch bataata hoon, jitna ajr unhen milna tha unhen mil chuka hai. ³is kay bajaay jab too khairaat day to teray daaen haath ko pata na chalay ki baayaan haath kya kar raha hai. ⁴teree khairaat yoon posheedgee men dee jaaay to tera baap jo posheeda baaten dekhta hai tujhay is ka muaavaza dega.

duaa

⁵dua kartay vaqt riyaakaaron kee tarah na karna jo ibaadatkhaanon aur chaukon men ja kar dua karna pasand kartay hain, jahaan sab unhen dekh saken. main tum ko sachch bataata hoon, jitna ajr unhen milna tha unhen mil chuka hai. ⁶is kay bajaay jab too dua karta hai to andar kay kamray men ja kar darvaaza band kar aur phir apnay baap say dua kar jo posheedgee men hai. phir tera baap jo posheeda baaten dekhta hai tujhay is ka muaavaza dega.

⁷dua kartay vaqt ghairyahoodiyon kee tarah taveel aur bemaanee baaten na duharaatay raho. vah samajhtay hain ki hamaaree bahut see baaton kay sabab say hamaaree sunee jaaegee. ⁸un kee maanind na bano, kyoonki tumhaara baap pahelay say tumhaaree zarooriyaat say vaaqif hai, ⁹balki yoon dua kiya karo,

ai hamaaray aasmaanee baap,

tera naam muqaddas maana jaaay.

¹⁰teree baadshaahee aaay.

teree marzee jis tarah aasmaan men pooree hotee hai zameen par bhee pooree ho.

¹¹hamaaree roz kee rotee aaj hamen day.

¹²hamaaray gunaahon ko muaaf kar

jis tarah ham nay unhen muaaf kiyaa ^[a] lafzee tarjuma : hamaaray qarz hamen muaaf kar jis tarah ham nay apnay qarzdaaron ko muaaf kiya.

jinhon nay hamaara gunaah kiya hai.

¹³aur hamen aazmaaish men na padnay de

balki hamen iblees say bachaaay rakh.

[kyoonki baadshaahee, qudrat aur jalaal abad tak teray hee hain.]

¹⁴kyoonki jab tum logon kay gunaah muaaf karogay to tumhaara aasmaanee baap bhee tum ko muaaf karega. ¹⁵lekin agar tum unhen muaaf na karo to tumhaara baap bhee tumhaaray gunaah muaaf naheen karega.

rozaa

¹⁶roza rakhtay vaqt riyaakaaron kee tarah munh latkaaay na firo, kyoonki vah aisa roop bhartay hain taaki logon ko maaloom ho jaaay ki vah roza say hain. main tum ko sachch bataata hoon, jitna ajr unhen milna tha unhen mil chuka hai. ¹⁷aisa mat karna balki roza kay vaqt apnay baalon men tel daal aur apna munh dho. ¹⁸phir logon ko maaloom naheen hoga ki too roza say hai balki sirf teray baap ko jo posheedgee men hai. aur tera baap jo posheeda baaten dekhta hai tujhay is ka muaavaza dega.

aasmaan par khazaanaa

¹⁹is duniya men apnay liyay khazaanay jama na karo, jahaan keeda aur zang unhen kha jaatay aur chor naqab laga kar chura letay hain. ²⁰is kay bajaay apnay khazaanay aasmaan par jama karo jahaan keeda aur zang unhen tabaah naheen kar saktay, na chor naqab laga kar chura saktay hain. ²¹kyoonki jahaan tera khazaana hai vaheen tera dil bhee laga rahega.

jism kee raushnee

²²badan ka charaagh aankh hai. agar teree aankh theek ho to phir tera poora badan raushan hoga. ²³lekin agar teree aankh kharaab ho to tera poora badan andhera hee andhera hoga. aur agar teray andar kee raushnee taareekee ho to yah taareekee kitnee shadeed hogee!

befikr honaa

²⁴koee bhee do maalikon kee khidmat naheen kar sakta. ya to vah ek say nafrat karkay doosray say muhabbat rakhega ya ek say lipat kar doosray ko haqeer jaanega. tum ek hee vaqt men allaah aur daulat kee khidmat naheen kar saktay.

²⁵is liyay main tumhen bataata hoon, apnee zindagee kee zarooriyaat pooree karnay kay liyay pareshaan na raho ki haay, main kya khaaoon aur kya piyoon. aur jism kay liyay fikrmand na raho ki haay, main kya pahenoon. kya zindagee khaanay-peenay say ahem naheen hai? aur kya jism poshaak say ziyaada ahemiyat naheen rakhta? ²⁶parindon par ghaur karo. na vah beej botay, na faslen kaat kar unhen godaam men jama kartay hain. tumhaara aasmaanee baap khud unhen khaana khilaata hai. kya tumhaaree un kee nisbat ziyaada qadar-o-qeemat naheen hai? ²⁷kya tum men say koee fikr kartay kartay apnee zindagee men ek lamhay ka bhee izaafa kar sakta hai?

²⁸aur tum apnay kapdon kay liyay kyoon fikrmand hotay ho? ghaur karo ki sosan kay phool kis tarah ugtay hain. na vah mehanat kartay, na kaattay hain. ²⁹lekin main tumhen bataata hoon ki sulaimaan baadshaah apnee pooree shaan-o-shaukat kay baavujood aisay shaandaar kapdon say mulabbas naheen tha jaisay un men say ek. ³⁰agar allaah us ghaas ko jo aaj maidaan men hai aur kal aag men jhonkee jaaegee aisa shaandaar libaas pahenaata hai to ai kamaetiqaado, vah tum ko pahenaanay kay liyay kya kuchh naheen karega?

³¹chunaanchay pareshaanee kay aalam men fikr kartay kartay yah na kahetay raho, ‘ham kya khaaen? ham kya pien? ham kya pahenen?’ ³²kyoonki jo eemaan naheen rakhtay vahee in tamaam cheezon kay peechhay bhaagtay rahetay hain jabki tumhaaray aasmaanee baap ko pahelay say maaloom hai ki tum ko in tamaam cheezon kee zaroorat hai. ³³pahelay allaah kee baadshaahee aur us kee raastbaazee kee talaash men raho. phir yah tamaam cheezen bhee tum ko mil jaaengee. ³⁴is liyay kal kay baaray men fikr kartay kartay pareshaan na ho kyoonki kal ka din apnay liyay aap fikr kar lega. har din kee apnee museebaten kaafee hain.