Meekaah 5

najaatadihanda kee ummeed

¹ai shaher jis par hamla ho raha hai, ab apnay aap ko chhuree say zakhmee kar, kyoonki hamaara muhaasara ho raha hai. dushman laathee say israaeel kay hukmaraan kay gaal par maarega.

²lekin too, ai bait-lahem ifraata, jo yahoodaah kay deegar khaandaanon kee nisbat chhota hai, tujh men say vah niklega jo israaeel ka hukmaraan hoga aur jo qadeem zamaanay balki azal say saadir hua hai. ³lekin jab tak haamila aurat usay janm na day, us vaqt tak rabb apnee qaum ko dushman kay havaalay chhodega. lekin phir us kay bhaaiyon ka bacha hua hissa israaeeliyon kay paas vaapas aaega.

⁴yah hukmaraan khaday ho kar rabb kee quvvat kay saath apnay revad kee gallaabaanee karega. usay rabb apnay khuda kay naam ka azeem ikhtiyaar haasil hoga. tab qaum salaamatee say basegee, kyoonki us kee azmat duniya kee intiha tak phailegee. ⁵vahee salaamatee ka mamba hoga. jab asoor kee fauj hamaaray mulk men daakhil ho kar hamaaray mahelon men ghus aaay to ham us kay khilaaf saat charvaahay aur aath raees khaday karenge ⁶jo talvaar say mulk-ay-asoor kee gallaabaanee karengay, haan talvaar ko miyaan say khainch kar namrood kay mulk par hukoomat karengay. yoon hukmaraan hamen asoor say bachaaega jab yah hamaaray mulk aur hamaaree sarhadd men ghus aaega.

⁷tab yaaqoob kay jitnay log bach kar mut’addid aqvaam kay beech men rahengay vah rabb kee bhejee huee os ya hariyaalee par padnay vaalee baarish kee maanind hongay yaanee aisee cheezon kee maanind jo na kisee insaan kay intizaar men rahetee, na kisee insaan kay hukm par padtee hain. ⁸yaaqoob kay jitnay log bach kar mut’addid aqvaam kay beech men rahengay vah janglee jaanvaron kay darmiyaan sherbabar aur bhed-bakriyon kay beech men javaan sher kee maanind hongay yaanee aisay jaanvar kee maanind jo jahaan say bhee guzray jaanvaron ko raund kar phaad leta hai. us kay haath say koee bacha naheen sakta. ⁹tera haath teray tamaam mukhaalifon par fatah paaega, teray tamaam dushman nest-o-naabood ho jaaengay.

rabb israaeel kay buton ko khatm karegaa

¹⁰rabb farmaata hai, “us din main teray ghodon ko nest aur teray rathon ko naabood karoonga. ¹¹main teray mulk kay shaheron ko khaak men mila kar teray tamaam qilaon ko gira doonga. ¹²teree jaadoogree ko main mita daaloonga, qismat ka haal bataanay vaalay teray beech men naheen rahengay. ¹³teray but aur teray makhsoos satoonon ko main yoon tabaah karoonga ki too aainda apnay haath kee banaaee huee cheezon kee pooja naheen karega. ¹⁴teray aseerat devee kay khambay main ukhaad kar teray shaheron ko mismaar karoonga. ¹⁵us vaqt main baday ghussay say un qaumon say intiqaam loonga jinhon nay meree naheen sunee.”