Meekaah 6

allaah israaeel par ilzaam lagaata hai

¹ai israaeel, rabb ka farmaan sun, “adaalat men khaday ho kar apna muaamala bayaan kar! pahaad aur pahaadiyaan teray gavaah hon, unhen apnee baat suna day.”

²ai pahaado, ab rabb ka apnee qaum par ilzaam suno! ai duniya kee qadeem bunyaado, tavajjuh do! kyoonki rabb adaalat men apnee qaum par ilzaam laga raha hai, vah israaeel say muqaddma utha raha hai.

³vah savaal karta hai, “ai meree qaum, main nay teray saath kya ghalat sulook kiya? main nay kya kiya ki too itnee thak gaee hai? bata to sahee! ⁴haqeeqat to yah hai ki main tujhay mulk-ay-misr say nikaal laaya, main nay fidya day kar tujhay ghulaamee say riha kar diya. saath saath main nay moosa, haaroon aur mariyam ko bheja taaki teray aagay chal kar teree raahanumaaee karen. ⁵ai meree qaum, vah vaqt yaad kar jab moaab kay baadshaah balaq nay bal’aam bin baor ko bulaaya taaki tujh par laanat bhejay. laanat kee bajaay us nay tujhay barkat dee! vah safar bhee yaad kar jab too shitteem say ravaana ho kar jiljaal pahunchee. agar too in tamaam baaton par ghaur karay to jaan legee ki rabb nay kitnee vafaadaaree aur insaaf say teray saath sulook kiya hai.”

⁶jab ham rabb kay huzoor aatay hain taaki allaah t’aala ko sijda karen to hamen apnay saath kya laana chaahiay? kya hamen yaksaala bachhday us kay huzoor la kar bhasm karnay chaahien? ⁷kya rabb hazaaron mendhon ya tel kee beshumaar nadiyon say khush ho jaaega? kya mujhay apnay pahelauthay ko apnay jaraaim kay ivz chadhaana chaahiay, apnay jism kay phal ko apnay gunaahon ko mitaanay kay liyay pesh karna chaahiay? hargiz naheen!

⁸ai insaan, us nay tujhay saaf bataaya hai ki kya kuchh achchha hai. rabb tujh say chaahata hai ki too insaaf qaaim rakhay, meharbaanee karnay men laga rahay aur farotnee say apnay khuda kay huzoor chalta rahay.

yarooshalam ko bhee saamriya kee see saza milegee

⁹suno! rabb yarooshalam ko aavaaz day raha hai. tavajjuh do, kyoonki daanishmand us kay naam ka khauf maanta hai. ai qabeelay, dhyaan do ki kis nay yah muqarrar kiya hai,

¹⁰“ab tak naajaaiz nafa kee daulat bedeen aadmee kay ghar men jama ho rahee hai, ab tak log gandum bechatay vaqt poora tol naheen toltay, un kee ghalat paimaaish par laanat! ¹¹kya main us aadmee ko baree qaraar doon jo ghalat taraazoo istemaal karta hai aur jis kee thailee men halkay baat paday rahetay hain? hargiz naheen! ¹²yarooshalam kay ameer baday zaalim hain, lekin baaqee baashinday bhee jhoot boltay hain, un kee har baat dhoka hee dhoka hai!

¹³is liyay main tujhay maar maar kar zakhmee karoonga. main tujhay teray gunaahon kay badlay men tabaah karoonga. ¹⁴too khaana khaaega lekin ser naheen hoga balki pet khaalee rahega. too maal mahfooz rakhnay kee koshish karega, lekin kuchh naheen bachega. kyoonki jo kuchh too bachaanay kee koshish karega usay main talvaar kay havaalay karoonga. ¹⁵too beej boega lekin fasal naheen kaatega, zaitoon ka tel nikaalega lekin usay istemaal naheen karega, angoor ka ras nikaalega lekin usay naheen piega. ¹⁶too israaeel kay baadshaahon umree aur akhiyab kay namoonay par chal pada hai, aaj tak un hee kay mansoobon kee pairvee karta aaya hai. is liyay main tujhay tabaahee kay havaalay kar doonga, teray logon ko mazaaq ka nishaana banaaoonga. tujhay deegar aqvaam kee laan-taan bardaasht karnee padegee.”