Nahemiyaah 1
nahemiyaah yarooshalam kay liyay dua karta hai
1zail men nahemiyaah bin hakaliyaah kee riport darj hai.
main artakhshasta baadshaah kee hukoomat kay 20ven saal kislev kay maheenay men sosan kay qilaay men thaa 2ki ek din mera bhaaee hanaanee mujh say milnay aaya. us kay saath yahoodaah kay chand ek aadmee thay. main nay un say poochha, “jo yahoodee bach kar jilaavatanee say yahoodaah vaapas gaay hain un ka kya haal hai? aur yarooshalam shaher ka kya haal hai?” 3unhon nay javaab diya, “jo yahoodee bach kar jilaavatanee say yahoodaah vaapas gaay hain un ka bahut bura aur zillat’aamez haal hai. yarooshalam kee faseel ab tak zameenabos hai, aur us kay tamaam darvaazay raakh ho gaay hain.”
4yah sun kar main baith kar ronay laga. kaee din main roza rakh kar maatam karta aur aasmaan kay khuda say dua karta raha,
5“ai rabb, aasmaan kay khuda, too kitna azeem aur maheeb khuda hai! jo tujhay piyaar aur teray ahkaam kee pairvee kartay hain un kay saath too apna ahd qaaim rakhta aur un par meharbaanee karta hai. 6meree baat sun kar dhyaan day ki tera khaadim kis tarah tujh say iltimaas kar raha hai. din raat main israaeeliyon kay liyay jo teray khaadim hain dua karta hoon. main iqraar karta hoon ki ham nay tera gunaah kiya hai. is men main aur meray baap ka gharaana bhee shaamil hai. 7ham nay teray khilaaf nihaayat shareer qadam uthaaay hain, kyoonki jo ahkaam aur hidaayaat too nay apnay khaadim moosa ko dee theen ham un kay taabay na rahay. 8lekin ab vah kuchh yaad kar jo too nay apnay khaadim ko farmaaya, ‘agar tum bevafa ho jaao to main tumhen mukhtalif qaumon men muntashir kar doonga, 9lekin agar tum meray paas vaapas a kar dubaara meray ahkaam kay taabay ho jaao to main tumhen tumhaaray vatan men vaapas laaoonga, khwaah tum zameen kee intiha tak kyoon na pahunch gaay ho. main tumhen us jagah vaapas laaoonga jisay main nay chun liya hai taaki mera naam vahaan sukoonat karay.’ 10ai rabb, yah log to teray apnay khaadim hain, teree apnee qaum jisay too nay apnee azeem qudrat aur qavee haath say fidya day kar chhudaaya hai. 11ai rabb, apnay khaadim aur un tamaam khaadimon kee iltimaas sun jo pooray dil say teray naam ka khauf maantay hain. jab tera khaadim aaj shahenshaah kay paas hoga to usay kaamyaabee ata kar. bakhsh day ki vah mujh par rahem karay.”
main nay yah is liyay kaha ki main shahenshaah ka saaqee tha.