Nahemiyaah 13

moaabiyon aur ammoniyon say alaahidagee

¹us din qaum kay saamnay moosa kee shareeat kee tilaavat kee gaee. padhtay padhtay maaloom hua ki ammoniyon aur moaabiyon ko kabhee bhee allaah kee qaum men shareek honay kee ijaazat naheen. ²vajah yah hai ki in qaumon nay misr say nikaltay vaqt israaeeliyon ko khaana khilaanay aur paanee pilaanay say inkaar kiya tha. na sirf yah balki unhon nay bal’aam ko paisay diay thay taaki vah israaeelee qaum par laanat bhejay, agarchi hamaaray khuda nay laanat ko barkat men tabdeel kiya. ³jab haazireen nay yah hukm suna to unhon nay tamaam ghairyahoodiyon ko jamaaat say khaarij kar diya.

rabb kay ghar kay intizaam kee islaah

⁴is vaakiay say pahelay rabb kay ghar kay godaamon par muqarrar imaam iliyaasib nay apnay rishtedaar toobiyaah ⁵kay liyay ek bada kamra khaalee kar diya tha jis men pahelay ghalla kee nazren, bakhoor aur kuchh aalaat rakhay jaatay thay. neez, ghalla, naee mai aur zaitoon kay tel ka jo dasvaan hissa laaviyon, gulookaaron aur darbaanon kay liyay muqarrar tha vah bhee us kamray men rakha jaata tha aur saath saath imaamon kay liyay muqarrar hissa bhee. ⁶us vaqt main yarooshalam men naheen tha, kyoonki baabal kay baadshaah artakhshasta kee hukoomat kay 32ven saal men main us kay darbaar men vaapas a gaya tha. kuchh der baad main shahenshaah say ijaazat lay kar dubaara yarooshalam kay liyay ravaana hua. ⁷vahaan pahunch kar mujhay pata chala ki iliyaasib nay kitnee buree harkat kee hai, ki us nay apnay rishtedaar toobiyaah kay liyay rabb kay ghar kay sahen men kamra khaalee kar diya hai. ⁸yah baat mujhay nihaayat hee buree lagee, aur main nay toobiyaah ka saara saamaan kamray say nikaal kar phaink diya. ⁹phir main nay hukm diya ki kamray naay siray say paak-saaf kar diay jaaen. jab aisa hua to main nay rabb kay ghar ka saamaan, ghalla kee nazren aur bakhoor dubaara vahaan rakh diya.

¹⁰mujhay yah bhee maaloom hua ki laavee aur gulookaar rabb kay ghar men apnee khidmat ko chhod kar apnay kheton men kaam kar rahay hain. vajah yah thee ki unhen vah hissa naheen mil raha tha jo un ka haq tha. ¹¹tab main nay zimmaadaar afsaron ko jhidak kar kaha, “aap allaah kay ghar ka intizaam itnee beparvaaee say kyoon chala rahay hain?” main nay laaviyon aur gulookaaron ko vaapas bula kar dubaara un kee zimmaadaariyon par lagaaya. ¹²yah dekh kar tamaam yahoodaah ghalla, naee mai aur zaitoon kay tel ka dasvaan hissa godaamon men laanay laga. ¹³godaamon kee nigraanee main nay salamiyaah imaam, sadoq munshee aur fidaayaah laavee kay sapurd karkay hanaan bin zakkoor bin mattaniyaah ko un ka madadgaar muqarrar kiya, kyoonki chaaron ko qaabil-ay-etimaad samjha jaata tha. un hee ko imaamon aur laaviyon men un kay muqarrara hissay taqseem karnay kee zimmaadaaree dee gaee.

¹⁴ai meray khuda, is kaam kay baais mujhay yaad kar! vah sab kuchh na bhool jo main nay vafaadaaree say apnay khuda kay ghar aur us kay intizaam kay liyay kiya hai.

sabat kee bahaalee

¹⁵us vaqt main nay yahoodaah men kuchh logon ko dekha jo sabat kay din angoor ka ras nichod kar mai bana rahay thay. doosray apnay kheton say ghalla la kar mai, angoor, anjeer aur deegar mukhtalif qism kee paidaavaar kay saath gadhon par laad rahay aur yarooshalam pahuncha rahay thay. yah sab kuchh sabat kay din ho raha tha. main nay unhen tambeeh kee ki sabat kay din khuraak farokht na karna. ¹⁶soor kay kuchh aadmee bhee jo yarooshalam men rahetay thay sabat kay din machhlee aur deegar kaee cheezen yarooshalam men la kar yahoodaah kay logon ko bechatay thay. ¹⁷yah dekh kar main nay yahoodaah kay shurfa ko daant kar kaha, “yah kitnee buree baat hai! aap to sabat kay din kee behuramtee kar rahay hain. ¹⁸jab aap kay baapdaada nay aisa kiya to allaah yah saaree aafat ham par aur is shaher par laaya. ab aap sabat kay din kee behuramtee karnay say allaah ka israaeel par ghazab mazeed badha rahay hain.”

¹⁹main nay hukm diya ki jumaay ko yarooshalam kay darvaazay shaam kay us vaqt band kiay jaaen jab darvaazay saaiyon men doob jaaen, aur ki vah sabat kay pooray din band rahen. sabat kay ikhtitaam tak unhen kholnay kee ijaazat naheen thee. main nay apnay kuchh logon ko darvaazon par khada bhee kiya taaki koee bhee apna saamaan sabat kay din shaher men na laaay. ²⁰yah dekh kar taajiron aur bechanay vaalon nay kaee martaba sabat kee raat shaher say baahar guzaaree aur vahaan apna maal bechanay kee koshish kee. ²¹tab main nay unhen tambeeh kee, “aap sabat kee raat kyoon faseel kay paas guzaartay hain? agar aap dubaara aisa karen to aap ko havaala-ay-pulis kiya jaaega.” us vaqt say vah sabat kay din aanay say baaz aaay. ²²laaviyon ko main nay hukm diya ki apnay aap ko paak-saaf karkay shaher kay darvaazon kee paheraadaaree karen taaki ab say sabat ka din makhsoos-o-muqaddas rahay.

ai meray khuda, mujhay is nekee kay baais yaad karkay apnee azeem shafqat kay mutaabiq mujh par meharbaanee kar.

ghairyahoodiyon say rishta baandhna mana hai

²³us vaqt mujhay yah bhee maaloom hua ki bahut say yahoodee mardon kee shaadee ashdood, ammon aur moaab kee aurton say huee hai. ²⁴un kay aadhay bachchay sirf ashdood kee zabaan ya koee aur ghairmulkee zabaan bol letay thay. hamaaree zabaan say vah naavaaqif hee thay. ²⁵tab main nay unhen jhidka aur un par laanat bhejee. baaz ek kay baal noch noch kar main nay un kee pitaaee kee. main nay unhen allaah kee qasam khilaanay par majboor kiya ki ham apnay betay-betiyon kee shaadee ghairmulkiyon say naheen karaaengay . ²⁶main nay kaha, “israaeel kay baadshaah sulemaan ko yaad karen. aisee hee shaadiyon nay usay gunaah karnay par uksaaya. us vaqt us kay baraabar koee baadshaah naheen tha. allaah usay piyaar karta tha aur usay pooray israaeel ka baadshaah banaaya. lekin usay bhee ghairmulkee beeviyon kee taraf say gunaah karnay par uksaaya gaya. ²⁷ab aap kay baaray men bhee yahee kuchh sunna padta hai! aap say bhee yahee bada gunaah sarzad ho raha hai. ghairmulkee aurton say shaadee karnay say aap hamaaray khuda say bevafa ho gaay hain!”

²⁸imaam-ay-aazam iliyaasib kay betay yoyda kay ek betay kee shaadee sanballat hauroonee kee betee say huee thee, is liyay main nay betay ko yarooshalam say bhaga diya.

²⁹ai meray khuda, unhen yaad kar, kyoonki unhon nay imaam kay uhday aur imaamon aur laaviyon kay ahd kee behuramtee kee hai.

³⁰chunaanchay main nay imaamon aur laaviyon ko har ghairmulkee cheez say paak-saaf karkay unhen un kee khidmat aur mukhtalif zimmaadaariyon kay liyay hidaayaat deen.

³¹neez, main nay dhyaan diya ki fasal kee pahelee paidaavaar aur qurbaaniyon ko jalaanay kee lakdee vaqt par rabb kay ghar men pahunchaaee jaaay.

ai meray khuda, mujhay yaad karkay mujh par meharbaanee kar!.