Nahemiyaah 2

nahemiyaah ko yarooshalam jaanay kee ijaazat miltee hai

¹chaar maheenay guzar gaay. neesaan kay maheenay kay ek din jab main shahenshaah artakhshasta ko mai pila raha tha to meree maayoosee usay nazar aaee. pahelay us nay mujhay kabhee udaas naheen dekha tha, ²is liyay us nay poochha, “aap itnay ghamgeen kyoon dikhaaee day rahay hain? aap beemaar to naheen lagtay balki koee baat aap kay dil ko tang kar rahee hai.”

main sakht ghabra gayaa ³aur kaha, “shahenshaah abad tak jeeta rahay! main kis tarah khush ho sakta hoon? jis shaher men meray baapdaada ko dafnaaya gaya hai vah malbay ka dher hai, aur us kay darvaazay raakh ho gaay hain.”

⁴shahenshaah nay poochha, “to phir main kis tarah aap kee madad karoon?” khaamoshee say aasmaan kay khuda say dua karke ⁵main nay shahenshaah say kaha, “agar baat aap ko manzoor ho aur aap apnay khaadim say khush hon to phir baraah-ay-karam mujhay yahoodaah kay us shaher bhej deejiay jis men meray baapdaada dafan huay hain taaki main usay dubaara taameer karoon.”

⁶us vaqt malika bhee saath baithee thee. shahenshaah nay savaal kiya, “safar kay liyay kitna vaqt darkaar hai? aap kab tak vaapas a saktay hain?” main nay usay bataaya ki main kab tak vaapas aaoonga to vah muttafiq hua. ⁷phir main nay guzaarish kee, “agar baat aap ko manzoor ho to mujhay darya-ay-furaat kay maghribee ilaaqay kay gavarnaron kay liyay khat deejiay taaki vah mujhay apnay ilaaqon men say guzarnay den aur main salaamatee say yahoodaah tak pahunch sakoon. ⁸is kay ilaava shaahee jangalaat kay nigraan aasaf kay liyay khat likhvaaen taaki vah mujhay lakdee day. jab main rabb kay ghar kay saath vaalay qilaay kay darvaazay, faseel aur apna ghar banaaoonga to mujhay shaheteeron kee zaroorat hogee.” allaah ka shafeeq haath mujh par tha, is liyay shahenshaah nay mujhay yah khat day diay.

⁹shahenshaah nay faujee afsar aur ghudsavaar bhee meray saath bhejay. yoon ravaana ho kar main darya-ay-furaat kay maghribee ilaaqay kay gavarnaron kay paas pahuncha aur unhen shahenshaah kay khat diay. ¹⁰jab gavarnar sanballat hauroonee aur ammonee afsar toobiyaah ko maaloom hua ki koee israaeeliyon kee baheboodee kay liyay a gaya hai to vah nihaayat naakhush huay.

nahemiyaah faseel ka muaaina karta hai

¹¹safar kartay kartay main yarooshalam pahunch gaya. teen din kay baad ¹²main raat kay vaqt shaher say nikla. meray saath chand ek aadmee thay, aur hamaaray paas sirf vahee jaanvar tha jis par main savaar tha. ab tak main nay kisee ko bhee us bojh kay baaray men naheen bataaya tha jo meray khuda nay meray dil par yarooshalam kay liyay daal diya tha. ¹³chunaanchay main andheray men vaadee kay darvaazay say shaher say nikla aur junoob kee taraf ajhdahay kay chashmay say ho kar kachray kay darvaazay tak pahuncha. har jagah main nay giree huee faseel aur bhasm huay darvaazon ka muaaina kiya. ¹⁴phir main shimaal yaanee chashmay kay darvaazay aur shaahee taalaab kee taraf badha, lekin malbay kee kasrat kee vajah say meray jaanvar ko guzarnay ka raasta na mila, ¹⁵is liyay main vaadee-ay-qidron men say guzra. ab tak andhera hee andhera tha. vahaan bhee main faseel ka muaaina karta gaya. phir main muda aur vaadee kay darvaazay men say dubaara shaher men daakhil hua.

faseel ko taameer karnay ka faislaa

¹⁶yarooshalam kay afsaron ko maaloom naheen tha ki main kahaan gaya aur kya kar raha tha. ab tak main nay na unhen aur na imaamon ya deegar un logon ko apnay mansoobay say aagaah kiya tha jinhen taameer ka yah kaam karna tha. ¹⁷lekin ab main un say mukhaatib hua, “aap ko khud hamaaree museebat nazar aatee hai. yarooshalam malbay ka dher ban gaya hai, aur us kay darvaazay raakh ho gaay hain. aaen, ham faseel ko naay siray say taameer karen taaki ham doosron kay mazaaq ka nishaana na banay rahen.” ¹⁸main nay unhen bataaya ki allaah ka shafeeq haath kis tarah mujh par raha tha aur ki shahenshaah nay mujh say kis qism ka vaada kiya tha. yah sun kar unhon nay javaab diya, “theek hai, aaen ham taameer ka kaam shuroo karen!” chunaanchay vah is achchhay kaam men lag gaay.

¹⁹jab sanballat hauroonee, ammonee afsar toobiyaah aur jasham arbee ko is kee khabar milee to unhon nay hamaara mazaaq uda kar hiqaarat’aamez lahejay men kaha, “yah tum log kya kar rahay ho? kya tum shahenshaah say ghaddaaree karna chaahatay ho?” ²⁰main nay javaab diya, “aasmaan ka khuda hamen kaamyaabee ata karega. ham jo us kay khaadim hain taameer ka kaam shuroo karengay. jahaan tak yarooshalam ka taalluq hai, na aaj aur na maazee men aap ka kabhee koee hissa ya haq tha.”