Nahemiyaah 3
faseel kee taameer-ay-nau
1imaam-ay-aazam iliyaasib baaqee imaamon kay saath mil kar taameeree kaam men lag gaya. unhon nay bhed kay darvaazay ko naay siray say bana diya aur usay makhsoos karkay us kay kivaad laga diay. unhon nay faseel kay saath vaalay hissay ko bhee miya burj aur hanan-el kay burj tak bana kar makhsoos kiya.
2yareehoo kay aadmiyon nay faseel kay aglay hissay ko khada kiya jabki zakkoor bin imree nay un kay hissay say mulhiq hissay ko taameer kiya.
3machhlee ka darvaaza sanaaaah kay khaandaan kee zimmaadaaree thee. usay shaheteeron say bana kar unhon nay kivaad, chatakhniyaan aur kunday laga diay.
4aglay hissay kee marammat mareemot bin ooriyaah bin haqqooz nay kee. agla hissa masullaam bin barakiyaah bin mashezab-el kee zimmaadaaree thee.
sadoq bin baana nay aglay hissay ko taameer kiya.
5agla hissa taqooa kay baashindon nay banaaya. lekin shaher kay baday log apnay buzurgon kay tahet kaam karnay kay liyay tayyaar na thay.
6yasaana ka darvaaza yoyda bin faasih aur masullaam bin basoodiyaah kee zimmaadaaree thee. usay shaheteeron say bana kar unhon nay kivaad, chatakhniyaan aur kunday laga diay.
7agla hissa malatiyaah jibaoonee aur yadoon maroonotee nay khada kiya. yah log jibaoon aur misfaah kay thay, vahee misfaah jahaan darya-ay-furaat kay maghribee ilaaqay kay gavarnar ka daar-ul-hakoomat tha.
8aglay hissay kee marammat ek sunaar banaam uzzeeel bin harhiyaah kay haath men thee.
aglay hissay par ek itrasaaz banaam hananiyaah muqarrar tha. in logon nay faseel kee marammat ‘motee deevaar’ tak kee.
9aglay hissay ko rifaayaah bin hoor nay khada kiya. yah aadmee zila yarooshalam kay aadhay hissay ka afsar tha.
10yadaayaah bin haroomaf nay aglay hissay kee marammat kee jo us kay ghar kay muqaabil tha.
aglay hissay ko hattoosh bin hasabniyaah nay taameer kiya.
11aglay hissay ko tanooron kay burj tak malkiyaah bin haarim aur hassoob bin pakhat-moaab nay khada kiya.
12agla hissa salloom bin halloohesh kee zimmaadaaree thee. yah aadmee zila yarooshalam kay doosray aadhay hissay ka afsar tha. us kee betiyon nay us kee madad kee.
13hanoon nay zanooh kay baashindon samet vaadee kay darvaazay ko taameer kiya. shaheteeron say usay bana kar unhon nay kivaad, chatakhniyaan aur kunday lagaaay. is kay ilaava unhon nay faseel ko vahaan say kachray kay darvaazay tak khada kiya. is hissay ka faasila taqreeban 1,500 fut yaanee aadha kilomeetar tha.
14kachray ka darvaaza malkiyaah bin raikaab kee zimmaadaaree thee. yah aadmee zila bait-karam ka afsar tha. us nay usay bana kar kivaad, chatakhniyaan aur kunday lagaaay.
15chashmay kay darvaazay kee taameer salloon bin kulhoza kay haath men thee jo zila misfaah ka afsar tha. us nay darvaazay par chhat bana kar us kay kivaad, chatakhniyaan aur kunday laga diay. saath saath us nay faseel kay us hissay kee marammat kee jo shaahee baagh kay paas vaalay taalaab say guzarta hai. yah vahee taalaab hai jis men paanee naalay kay zareeay pahunchta hai. salloon nay faseel ko us seedhee tak taameer kiya jo yarooshalam kay us hissay say utartee hai jo ‘daaood ka shaher’ kahelaata hai.
16agla hissa nahemiyaah bin azbuk kee zimmaadaaree thee jo zila bait-soor kay aadhay hissay ka afsar tha. faseel ka yah hissa daaood baadshaah kay qabristaan kay muqaabil tha aur masnooee taalaab aur soormaaon kay kamron par khatm hua.
17zail kay laaviyon nay aglay hisson ko khada kiya : pahelay rahoom bin baanee ka hissa tha.
zila qaeela kay aadhay hissay kay afsar hasabiyaah nay aglay hissay kee marammat kee. 18aglay hissay ko laaviyon nay binnooee bin handaad kay zer-ay-nigraanee khada kiya jo zila qaeela kay doosray aadhay hissay par muqarrar tha.
19agla hissa misfaah kay sardaar azar bin yashooa kee zimmaadaaree thee. yah hissa faseel kay us mod par tha jahaan raasta asalihaakhaanay kee taraf chadhta hai.
20aglay hissay ko baarook bin zabbee nay badee mehanat say taameer kiya. yah hissa faseel kay mod say shuroo ho kar imaam-ay-aazam iliyaasib kay ghar kay darvaazay par khatm hua.
21agla hissa mareemot bin ooriyaah bin haqqooz kee zimmaadaaree thee aur iliyaasib kay ghar kay darvaazay say shuroo ho kar us kay konay par khatm hua.
22zail kay hissay un imaamon nay taameer kiay jo shaher kay gird-o-navaah men rahetay thay.
23aglay hissay kee taameer binyameen aur hassoob kay zer-ay-nigraanee thee. yah hissa un kay gharon kay saamnay tha.
azariyaah bin maasiyaah bin ananiyaah nay aglay hissay kee marammat kee. yah hissa us kay ghar kay paas hee tha.
24agla hissa binnooee bin handaad kee zimmaadaaree thee. yah azariyaah kay ghar say shuroo hua aur mudtay mudtay konay par khatm hua.
25agla hissa faalaal bin oozee kee zimmaadaaree thee. yah hissa mod say shuroo hua, aur oopar ka jo burj shaahee mahel say us jagah nikalta hai jahaan muhaafizon ka sahen hai vah bhee is men shaamil tha.
agla hissa fidaayaah bin paraoos 26aur ofal pahaadee par rahenay vaalay rabb kay ghar kay khidmatgaaron kay zimmay tha. yah hissa paanee kay darvaazay aur vahaan say niklay huay burj par khatm hua.
27agla hissa is burj say lay kar ofal pahaadee kee deevaar tak tha. taqooa kay baashindon nay usay taameer kiya.
28ghoday kay darvaazay say aagay imaamon nay faseel kee marammat kee. har ek nay apnay ghar kay saamnay ka hissa khada kiya.
29un kay baad sadoq bin immer ka hissa aaya. yah bhee us kay ghar kay muqaabil tha.
agla hissa samaayaah bin sakaniyaah nay khada kiya. yah aadmee mashriqee darvaazay ka paheredaar tha.
30agla hissa hananiyaah bin salamiyaah aur salaf kay chhatay betay hanoon kay zimmay tha.
agla hissa masullaam bin barakiyaah nay taameer kiya jo us kay ghar kay muqaabil tha.
31ek sunaar banaam malkiyaah nay aglay hissay kee marammat kee. yah hissa rabb kay ghar kay khidmatgaaron aur taajiron kay us makaan par khatm hua jo paheray kay darvaazay kay saamnay tha. faseel kay konay par vaaqay baalaakhaana bhee is men shaamil tha.
32aakhiree hissa bhed kay darvaazay par khatm hua. sunaaron aur taajiron nay usay khada kiya.