Nahemiyaah 5

ghareebon ka qarza mansookh

¹kuchh der baad kuchh mard-o-khavaateen meray paas a kar apnay yahoodee bhaaiyon kee shikaayat karnay lagay. ²baaz nay kaha, “hamaaray bahut ziyaada betay-betiyaan hain, is liyay hamen mazeed anaaj milna chaahiay, varna ham zinda naheen rahengay.” ³doosron nay shikaayat kee, “kaal kay dauraan hamen apnay kheton, angoor kay baaghon aur gharon ko girvee rakhna pada taaki anaaj mil jaaay.” ⁴kuchh aur bolay, “hamen apnay kheton aur angoor kay baaghon par baadshaah ka taiks ada karnay kay liyay udhaar lena pada. ⁵ham bhee doosron kee tarah yahoodee qaum kay hain, aur hamaaray bachchay un say kam haisiyat naheen rakhtay. to bhee hamen apnay bachchon ko ghulaamee men bechana padta hai taaki guzaara ho sakay. hamaaree kuchh betiyaan laundiyaan ban chukee hain. lekin ham khud bebas hain, kyoonki hamaaray khet aur angoor kay baagh doosron kay qabzay men hain.”

⁶un ka vaavaila aur shikaayaten sun kar mujhay bada ghussa aaya. ⁷bahut soch-bichaar kay baad main nay shurfa aur afsaron par ilzaam lagaaya, “aap apnay hamvatan bhaaiyon say ghairmunaasib sood lay rahay hain!” main nay un say nipatnay kay liyay ek badee jamaaat ikatthee karke ⁸kaha, “hamaaray kaee hamvatan bhaaiyon ko ghairyahoodiyon ko becha gaya tha. jahaan tak mumkin tha ham nay unhen vaapas khareed kar aazaad karnay kee koshish kee. aur ab aap khud apnay hamvatan bhaaiyon ko bech rahay hain. kya ham ab unhen dubaara vaapas khareeden?” vah khaamosh rahay aur koee javaab na day sakay.

⁹main nay baat jaaree rakhee, “aap ka yah sulook theek naheen. aap ko hamaaray khuda ka khauf maan kar zindagee guzaarna chaahiay taaki ham apnay ghairyahoodee dushmanon kee laan-taan ka nishaana na banen. ¹⁰main, meray bhaaiyon aur mulaazimon nay bhee doosron ko udhaar kay taur par paisay aur anaaj diya hai. lekin aaen, ham un say sood na len! ¹¹aaj hee apnay qarzdaaron ko un kay khet, ghar aur angoor aur zaitoon kay baagh vaapas kar den. jitna sood aap nay lagaaya tha usay bhee vaapas kar den, khwaah usay paison, anaaj, taaza mai ya zaitoon kay tel kee soorat men ada karna tha.” ¹²unhon nay javaab diya, “ham usay vaapas kar dengay aur aainda un say kuchh naheen maangengay. jo kuchh aap nay kaha vah ham karengay.”

tab main nay imaamon ko apnay paas bulaaya taaki shurfa aur buzurg un kee maujoodgee men kasm khaaen ki ham aisa hee karengay. ¹³phir main nay apnay libaas kee tahen jhaad jhaadkar kaha, “jo bhee apnee qasam today usay allaah isee tarah jhaad kar us kay ghar aur milkiyat say maheroom kar day!”

tamaam jamaashuda log bolay, “aameen, aisa hee ho!” aur rabb kee taareef karnay lagay. sab nay apnay vaaday pooray kiay. ¹⁴

nahemiyaah ka achchha namoonaa

main kul baarah saal sooba yahoodaah ka gavarnar raha yaanee artakhshasta baadshaah kee hukoomat kay 20ven saal say us kay 32ven saal tak. is pooray arsay men na main nay aur na meray bhaaiyon nay vah aamdanee lee jo hamaaray liyay muqarrar kee gaee thee. ¹⁵asal men maazee kay gavarnaron nay qaum par bada bojh daal diya tha. unhon nay r’aaya say na sirf rotee aur mai balki fee din chaandee kay 40 sikkay bhee liyay thay. un kay afsaron nay bhee aam logon say ghalat faaida uthaaya tha. lekin choonki main allaah ka khauf maanta tha, is liyay main nay un say aisa sulook na kiya. ¹⁶meree pooree taaqat faseel kee takmeel men sarf huee, aur meray tamaam mulaazim bhee is kaam men shareek rahay. ham men say kisee nay bhee zameen na khareedee. ¹⁷main nay kuchh na maanga haalaanki mujhay rozaana yahoodaah kay 150 afsaron kee mehamaan-navaazee karnee padtee thee. un men vah tamaam mehamaan shaamil naheen hain jo gaahay-ba-gaahay padosee mamaalik say aatay rahay. ¹⁸rozaana ek bail, chhah behtareen bhed-bakriyaan aur bahut say parinday meray liyay zabah karkay tayyaar kiay jaatay, aur das das din kay baad hamen kaee qism kee bahut see mai khareednee padtee thee. in akhraajaat kay baavujood main nay gavarnar kay liyay muqarrara vazeefa na maanga, kyoonki qaum par bojh vaisay bhee bahut ziyaada tha.

¹⁹ai meray khuda, jo kuchh main nay is qaum kay liyay kiya hai us kay baais mujh par meharbaanee kar.