Nahemiyaah 6
nahemiyaah kay khilaaf saazish
1sanballat, toobiyaah, jasham arbee aur hamaaray baaqee dushmanon ko pata chala ki main nay faseel ko takmeel tak pahunchaaya hai aur deevaar men kaheen bhee khaalee jagah nazar naheen aatee. sirf darvaazon kay kivaad ab tak lagaaay naheen gaay thay. 2tab sanballat aur jasham nay mujhay paighaam bheja, “ham vaadee-ay-onoo kay shaher kafeereem men aap say milna chaahatay hain.” lekin mujhay maaloom tha ki vah mujhay nuqsaan pahunchaana chaahatay hain. 3is liyay main nay qaasidon kay haath javaab bheja, “main is vaqt ek bada kaam takmeel tak pahuncha raha hoon, is liyay main a naheen sakta. agar main aap say milnay aaoon to poora kaam ruk jaaega.”
4chaar dafa unhon nay mujhay yahee paighaam bheja aur har baar main nay vahee javaab diya. 5paanchven martaba jab sanballat nay apnay mulaazim ko meray paas bheja to us kay haath men ek khula khat tha. 6khat men likha tha, “padosee mamaalik men afwaah phail gaee hai ki aap aur baaqee yahoodee baghaavat kee tayyaariyaan kar rahay hain. jasham nay is baat kee tasdeeq kee hai. log kahetay hain ki isee vajah say aap faseel bana rahay hain. in riporton kay mutaabiq aap un kay baadshaah banengay. 7kaha jaata hai ki aap nay nabiyon ko muqarrar kiya hai jo yarooshalam men elaan karen ki aap yahoodaah kay baadshaah hain. beshak aisee afwaahen shahenshaah tak bhee pahunchengee. is liyay aaen, ham mil kar ek doosray say mashvra karen ki kya karna chaahiay.”
8main nay usay javaab bheja, “jo kuchh aap kah rahay hain vah jhoot hee jhoot hai. kuchh naheen ho raha, balki aap nay farzee kahaanee ghad lee hai!” 9asal men dushman hamen daraana chaahatay thay. unhon nay socha, “agar ham aisee baaten kahen to vah himmat haar kar kaam say baaz aaengay.” lekin ab main nay ziyaada azam kay saath kaam jaaree rakha.
10ek din main samaayaah bin dilaayaah bin mahetab-el say milnay gaya jo taala laga kar ghar men baitha tha. us nay mujh say kaha, “aaen, ham allaah kay ghar men jama ho jaaen aur darvaazon ko apnay peechhay band karkay kundee lagaaen. kyoonki log isee raat aap ko qatl karnay kay liyay aaengay.”
11main nay etiraaz kiya, “kya yah theek hai ki mujh jaisa aadmee bhaag jaaay? ya kya mujh jaisa shakhs jo imaam naheen hai rabb kay ghar men daakhil ho kar zinda rah sakta hai? hargiz naheen! main aisa naheen karoonga!” 12main nay jaan liya ki samaayaah kee yah baat allaah kee taraf say naheen hai. sanballat aur toobiyaah nay usay rishvat dee thee, isee liyay us nay meray baaray men aisee peshgoee kee thee. 13is say vah mujhay dara kar gunaah karnay par uksaana chaahatay thay taaki vah meree badnaamee karkay mujhay mazaaq ka nishaana bana saken.
14ai meray khuda, toobiyaah aur sanballat kee yah buree harkaten mat bhoolna! nauadiyaah nabiya aur baaqee un nabiyon ko yaad rakh jinhon nay mujhay daraanay kee koshish kee hai.
faseel kee takmeel
15faseel ilool kay maheenay kay 25ven din [a] 2 aktoobar. yaanee 52 dinon men mukammal huee. 16jab hamaaray dushmanon ko yah khabar milee to padosee mamaalik sahem gaay, aur vah ihsaas-ay-kamatree ka shikaar ho gaay. unhon nay jaan liya ki allaah nay khud yah kaam takmeel tak pahunchaaya hai.
17un 52 dinon kay dauraan yahoodaah kay shurfa toobiyaah ko khat bhejtay rahay aur us say javaab miltay rahay thay. 18asal men yahoodaah kay bahut say logon nay qasam kha kar us kee madad karnay ka vaada kiya tha. vajah yah thee ki vah sakaniyaah bin arakh ka daamaad tha, aur us kay betay yoohanaan kee shaadee masullaam bin barakiyaah kee betee say huee thee. 19toobiyaah kay yah madadgaar meray saamnay us kay nek kaamon kee taareef kartay rahay aur saath saath meree har baat usay bataatay rahay. phir toobiyaah mujhay khat bhejta taaki main dar kar kaam say baaz aaoon.